नीदँय् क्यन जगत सुन्दर ब्वनेकुथि

(मांभाय्या माध्यमं आखः ब्वंकीगु नेपाःया हे न्हापांगु स्कुल जगत सुन्दर ब्वनेकुथि नीदँ न्ह्यः गय् यानाः स्वन, उकिया लुमंति कनादी ब्वनेकुथिया वर्तमान प्रिन्सिपल मय्जु माया मानन्धरं)

दछि, निदँ, स्वदँ यायां थौं जगत सुन्दर ब्वनेकुथि नीदँया बुदिं हनाच्वना। ई वंगु हे मचायेकं नीदँ थ्यन। थुगु नीदँ दुने ब्वनेकुथिं यक्व हे थथ्याःक्वथ्याःथाय् पलाः छिछिउँ प्रगति पलाः न्ह्याका हे च्वना तिनि। जिगु अनुभवं धायेगु खःसा २०४७ साल फागुण १२ गते तत्कालिन शिक्षा दिवस कुन्हु औपचारिक कथं कक्षा न्ह्याकागु जुल। दकलय् न्हापां जि मिसा खलकय् मुँज्याया इलय् डा. चुन्दा बज्राचार्यपाखें नेवाः भासं चायेकेत्यंगु ब्वनेकुथिया बारे न्यना। उलि जक मखु, सुं भोलिन्टर शिक्षिका जुइ न्ह्याःपिं दुसा जिउ धइथें जिज्ञासा तयादिल। उगु इलय् जि भचा इलं लानाच्वंगुलिं जि वयाबी धकाः बचं बिया। छुं दिं लिपा थीथी थासय् सहलह जूथाय् ब्वना यंकल, नातिबज्रया छेँय्, श्रीघलय् व राजभाइ जकःमिया छेँय् ।

लच्छि निला ति जिल्ला शिक्षापाखें स्वीकृति कायेगु ज्याय् छपुचः भाषासेवीपाखें कुतः यानादिल। जिल्ला शिक्षापाखें संस्थापकपिनिगु नां लिसें स्वीकृति बियाहल। वय्कःपिं खः विष्णु चित्रकार, अनाररत्न बज्राचार्य, अमेश बज्राचार्य, राजभाइ जकःमि, शरद कसाः व मनुदास श्रेष्ठ। डा. चुन्दा बज्राचार्य व उपिं खुम्ह मध्ये पालंपाः धइथें छेँय् छेँय् वनाः विद्यार्थीत मुंकाः नर्सरी, के.जी. कक्षाय् मुक्कं स्वीम्ह मस्तय्त ब्वंकेगु ज्या जुल। दकलय् न्हापां थुगु हे ब्वनेकुथिया संस्थापक भाजु राजभाइ जकःमिया नकतिनि दयेके सिधःगु छेँय् सञ्चालन यायेगु अनुमति बियादिल। उबलय् रत्नदेवी कसाः प्रिन्सिपल जुयाः भगवती जकःमि व जि स्वयम् स्वम्ह मिसापिंसं पठनपाठनया भालाः क्वबियाः माःगु इलय् डा. चुन्दा बज्राचार्यपाखें सल्लाह कयाः न्ह्याकागु जुल। आर्थिक अवस्था तसकं कमजोर जूगुलिं थीथी थासय् आर्थिक ग्वाहालि काः वना। वहे ग्वाहालिया झ्वलय् यक्व पासापिंसं थःगु गच्छे कथं ग्वाहालि चूलाकादिल। ब्वनेकुथिया सञ्चालक समितिया नायः लक्ष्मीदास मानन्धरपाखें झिम्ह मस्तय्त छात्रवृत्तिया निंतिं एकमुष्ट दां लःल्हानादिल। वहे दामं यक्व ज्या कयाः वहे कथं ब्वनेकुथिइ विद्यार्थीया ल्याः अप्वया वन। कक्षा नं छगू निगू तगिं न्ह्याके फत। थ्वहे इलय् जापानया पासा शोभना श्रेष्ठपाखें जापानया हिकिवानाप स्वापू तयेकाः तःधंगु गुण यानाबिल। गुकुन्हु जापानया हिकिवानाप स्वापू दत, उबलय्निसें जगत सुन्दर ब्वनेकुथियात माःगु इलय् माःगु ग्वाहालि यायेगु क्रम न्ह्यानाः थौं तक नं उगु ज्या निरन्तर कथं न्ह्यानाच्वंगु दु। थुकिया श्रेय हिकिवाया तत्कालिन महासचिव ताकासी खाजितायात बीमाः। वय्कःयागु थुगु ब्वनेकुथिइ हि चःति हाःगु दु। दछिया स्वक्वः जापानं नेपाः वयाः ब्वनेकुथियात छुं मचाः मगाःगु स्वइ, उगु मचाःमगाःगुयात पूवंकाः लिहांवनी। शिक्षक शिक्षिकापिंत नं न्वानाः जिल ला, हालां जिल ला, थःगु मूवंगु सल्लाह बिया थकी। लछिया छक्वः ब्वनेकुथिया अवस्था बारे फोनं न्यनेकने यानाहइ ।

उगु हे क्रमं न्हापा ब्वनेकुथियात जग्गा न्यानाः ग्वाहालि यानादिलसा जग स्वनेगु निसें कयाः स्वतँ तक ता छायेत उलि हे ग्वाहालि बियादिल। नापनापं झी नेवाः दाजु किजापिंसं नं उलि हे ग्वाहालि यानाः छेँ दनागु खः। १ लख स्वयां अप्वः व १ लख दां बियाः ग्वाहालि यानादीपिनिगु नां ब्वनेकुथिया अभिलेखय् दु। गथेकि पियुष बहादुर अमात्य, पद्मज्योति, इच्छा बहादुर, मुकुन्द बहादुर प्रधान, १५ वडाया तत्कालिन वडा अध्यक्ष जीवनराम श्रेष्ठ, ग्वआखः सफू व झिम्ह मस्तय्त छात्रवृत्ति व थीथी कथं लक्ष्मीदास मानन्धर व छाउनीया छेँ बियाः ग्वाहालि यानादीम्ह राजभाइ जकःमि। वयकःपिनिगु ग्वाहालि ब्वनेकुथिपाखें सदां लुमंका च्वनेमाः। तत्कालिन सञ्चालक सदस्य गणेश अपारपाखें जिमित टिचर ट्रेनिङ बियाः सक्षम यानादिल। थथे यक्व नेपाः व जापानया पासापिनिगु ग्वाहालिं ब्वनेकुथि सुथांलाक्क न्ह्याकेत धिसिलाःगु थां जुयाः थौं मा.वि. तक थ्यंके फत। उलि जक मखु, २०६५ सालया एस.एल.सी. लिच्वलं मां भाय्या ब्वनेकुथिया गौरव थकायेत तकं ताःलाःगु दु। ब्वनेकुथिया सल्लाहकार पद्मरत्न तुलाधरजुयागु यक्व सल्लाह थुकी दुथ्याः ।

जगत सुन्दर ब्वनेकुथिं मांभाय्या जक शिक्षा बियाच्वनागु मखु, नेपालभाषा संरक्षणया नापनापं नेवाः सस्कृति, नेवाः लिपिया शिक्षा बीत नं ताःलानाच्वंगु दु। अथेहे आध्यात्मिक शिक्षा दत धाःसा विद्यार्थीया नैतिक शिक्षा बल्लाइ धइगु तातुनाः वंगु प्यदँ न्ह्यवंनिसें प्रत्येक शनिवाः सुथय् बौद्ध परियत्ति शिक्षा सञ्चालन यायेत नं ताःलाःगु दु। थ्व शिक्षायात नं थनया विद्यार्थीया अभिभावकपिंसं यक्व हे ययेकाच्वंगु दु। थथे थीथी शिक्षाया झ्वलय् थनया विद्यार्थी मस्तय्सं अन्तर विद्यालय धेंधेंबल्लाः कासाय् ब्वति कयाः थीथी सिरपाः त्याकाः ब्वनेकुथिया गौरव थकयाच्वंगु सकस्यां सिउगु हे खँ खः ।

थौंकन्हय् थनया विद्यार्थी संख्या स्वसः व स्वीन्याम्ह दुसा शिक्षक शिक्षिका व कर्मचारी यानाः नीच्याम्हेस्यां दैनिक सेवा यानाः थुगु ब्वनेकुथिया विद्यार्थीतय्गु भविष्य शिक्षाया माध्यमं थकायेगु ज्या जुयाच्वंगु दु ।

अन्त्यय्, थौं ब्वनेकुथियात थन तक थ्यंकेफुगु झी सकलसिगु ग्वाहालि चूलानाः हे खः। विशेष यानाः नेपाल हिकिवाया नायः राकेश राजभण्डारी, स्कूलया भाइस प्रिन्सिपल शान्ति मानन्धर नापं शिक्षक, शिक्षिकापिनिगु यक्व ग्वाहालि दुथ्याः। थथे म्हसिउपिं, म्हमसिउपिं, स्वदेशी, विदेशी पासापिंत थौं नीदँया लसताय् यक्व यक्व भिंतुना नापं सुभाय् देछासें ब्वनेकुथिया हितैषीपाखें सदां थें ग्वाहालि व सुखदुःख ब्याका च्वने फयेमा धकाः आशिका यानाच्वना। थुगु ब्वनेकुथिइ मांभाय्या गौरव सदां च्वछाया च्वनेफयेमा धकाः नं थौं नीदँ बुदिंया लसता ब्याकाच्वना ।

More Stories Like this