मन्त्रिपरिषद्य् पासपोर्ट काण्ड
सरकार दुने नं पासपोर्ट छपाईया विवाद
येँ (सन्ध्या टाइम्स)/मेशिन रिडेबल पासपोर्ट तप्यंक भारतय् छापे याना हयेगु धकाः परराष्ट्र मन्त्री सुजाता कोइरालां यानादीगु कुतःयात कयाः थौं मन्त्रिपरिषद्य् सहलह जुइगु खँ धाःगु दु। टेण्डर मकासे तप्यंक छापे याकेगु थ्व ज्याय् घोटाला जुइफु धकाः परराष्ट्र मन्त्रालय दुने हे विवाद जुइवं थ्व विषयय् मन्त्रिपरिषदय् प्रवेश जूगु खः। परराष्ट्रं छगूया ४ डलर पुलाः भारतयाके अज्याःगु पासपोर्ट कायेगु धकाः तयारी याःगु खःसा अमेरिका लगायत मेमेगु देशं व स्वयां दंक बी धकाः प्रस्ताव छ्वया हयाच्वंगु खँ धाःगु दु। विवादया कारणं तप्यंक भारतयाके पासपोर्ट न्यायेगु मन्त्रीया प्रस्तावयात मन्त्रिपरिषदं अस्वीकार यायेफुगु खँ धाःगु दु ।
मन्त्रिपरिषद्या थौंया बैठकय् राष्ट्र बैंकया न्हूम्ह गभर्नर नियुक्तिया विषय नं प्रवेश जुइगु खँ धाःगु दु। गभर्नर नियुक्तिया लागिं स्वम्हेसिया नां वनाच्वंगु दुसा सरकारं उकी मध्ये छम्हेसित नियुक्त याइ। सरकारयात रामेश्वर खनाल, युवराज खतिवडा व विरविक्रम रायमाझीया नां वनाच्वंगु दु। लिसें थौं संसदीय समितिया विरोध जुइक जुइक नं गिट्टी निकासी जुयाच्वंगु बारे नं सहलह जुइ धाःगु दु। समितिं पर्यावरणया कारण क्यनाः गिट्टी निकासी पना बिउगु खःसां उद्योग मन्त्री राजेन्द्र महतों निकासी पंगुलिं राजस्व उठे मजुल धासें उकियात हानं खुले याना बिउगु खः ।
संकल्प असफल
मंकाः संकल्प प्रस्तावय् राष्ट्रपतिया पलाःयात कयाः गज्याःगु भाषा छ्यलेगु धइगु खँय् सहमति कायम यायेत कार्यदल नं असफल जूगु दु। एमाले, कांग्रेस व माओवादी दुथ्याःगु कार्यदलं थ्व सहमति पिकायेगु जिम्मा नं उच्चस्तरीय संयन्त्रयात बिउगु दु ।
