राप्रपा नेपालपाखें सिंहदरवार घेराउ

पुलिसलिसे मदिक्क हे कचमच, झिंनिम्ह ज्वन

येँ (सन्ध्या टाइम्स)/राष्ट्रिय प्रजातन्त्र पार्टी नेपालया कार्यकर्तातय्सं थौं सुथंनिसें हे देय्या प्रमुख प्रशासनिक निकाय घेराउ यानाच्वंगु हुनिं येँया ट्राफिक ब्यवस्थाय् समस्या ब्वलंगु दुसा प्रदर्शनकारी व प्रहरीया दथुइ मदिक्क हे कचमच जुयाच्वंगु दु ।

उगु पार्टीया द्वलंद्वःम्ह कार्यकर्तातय्सं सिंहदरवारय् दुहां वनेगु नाका भद्रकाली, पद्मोदय मोड, कालिकास्थान, माइतिघर मण्डला, बबरमहल, घट्टेकुलो, नापं सिंहदरवारया पूर्वी गेटया निगू नाका यानाः च्यागुलिं हे नाकाय् च्वनाः अथे घेराउ यानाच्वंगु खः। उगु घेराउ सनिलया स्वताः ई तक जुइ धकाः धाःगु दु। घेराउया झ्वलय् प्रहरीं माइतिघर मण्डला लागां झिंनिम्ह कार्यकर्ता ज्वना यंकेधुंकूगु दु धकाः राप्रपा नेपालया सह-महामन्त्री नापं प्रचार विभागया प्रमुख राजाराम श्रेष्ठं 'सन्ध्या टाइम्स' यात जानकारी बियादीगु दु। क्वःछिनातःगु इलय् हे संविधान दयेकेमाःगु, बजाःभाः क्वकायेमाःगु, भ्रष्टाचारीतय्त नियन्त्रण यायेमाःगु, संघीयता, राजसंस्था व हिन्दू राज्यया सवालय् जनमत संग्रह यायेमाःगु माग यानाः उगु पार्टीं थौं सिंहदरवार घेराउ याःगु खः। उगु पार्टीया निगूगु चरणया आन्दोलनया दकलय् लिपांगु दिं कथं थौं सिंहदरवार घेराउ याःगु खःसा थौंया घेराउयात सत्याग्रह धकाः नं धाःगु दु। आन्दोलनय् ब्वति कायेकेगु निंतिं उगु पार्टीं स्वनिगलं पिनेया कार्यकर्तातय्त नं येँय् हयातःगु दु। राप्रपा नेपालं म्हिगः जक स्वनिगः बन्द आह्वान याःगु हुनिं जनजीवन प्रभावित जूगु खः ।

ज्वालासिंहया निम्ह नेता स्यात

येँ (सन्ध्या टाइम्स)/सशस्त्र आन्दोलन याना वयाच्वंगु जनतान्त्रिक तराई मुक्ति मोर्चा ज्वालासिंहया पुचःया निम्ह नेतात सीगु दु। वंगु चान्हय् रौतहटय् ज्वालासिंह पुचःया केन्द्रीय दुजः झमन धइम्ह विजय यादव व कमाण्डर वीरेन्द्र यादव सीगु खः। प्रहरी व ज्वालासिंह पुचःया नेता कार्यकर्तातय् दथुइ गोलीं कयेकाः ल्वापु जूगु इलय् इपिं सीगु खः ।