शेयर बजाःया लगानीकर्ता आक्रोशित

न्हियान्हिथं कुहां कुहां वनाः संकटय् लानाच्वंगु नेपाःया शेयर बजाः लगानीकर्तातय् हडतालं यानाः ठप्प जूवंगु दु। शेयर कारोवार बारे सरकारं कयातःगु नीतिया विरोध यासें थीथी कथंया शेयर कारोवार याइपिं लगानीकर्तातय् संगठनं थःपिनि शेयर कारोवार दिका बीवं शेयर बजाः ठप्प जूगु खः। लगानीकर्तातय्सं शेयर धितोय् बीगु यानाच्वंगु कर्जा ५० प्रतिशतं थकयाः ७० प्रतिशत यायेमाःगु, थज्याःगु कर्जा न्यादँ तक नवीकरण याये दयेमाःगु व मार्जिन कलया सीमा म्होतिं नं ५ प्रतिशत तक जुइमाः धइगु माग तयाः थ्व आन्दोलन याःगु खः। खतुं लगानीकर्तातय्सं वंगु वालंनिसें हे सरकार समक्ष थःपिनि माग न्ह्यब्वयाः असन्तुष्टि प्वंका वयाच्वंगु खःसा सरकारं उकियात वास्ता मयायेवं अन्ततः शेयर लगानीकर्तात नं नेपाःया दकलय् लोकप्रिय व सरल विरोध ज्याझ्वः 'बन्द' या शरणय् वंगु खः ।

शेयर कारोवार थौंकन्हय् खास हे तसकं मन्ह्यानाच्वंगु कारणं थ्व बन्दं तःधंगु हे लिच्वः लाइ धकाः ग्यायेमाःगु खँ ला मदु अथे खःसां नियमित रुपं चले जुयाच्वंगु बजाः थथे आकाझाकां बन्द जुइबलय् उकिं भविष्यय् वनाः बांमलाःगु लिच्वः लाकीगु खतरा धाःसा पिहां वयेफु। शेयर बजाः नेपाःया न्हूगु व्यवसाय जूगु कारणं उकियात नियमित यायेगु सवालय् अनेक परीक्षणत जुयाच्वंगु दु। उकी बांलाःगु व बांमलाःगु नितां वइगु खँय् शंका मदु। बांलाःगुयात लागू हे यानाः बांमलाःगुयात सुधार यायेत सुं नं पक्षं संकोच तायेके माःगु मदु। कारोवार बन्द मयासे सम्बन्धित पक्षतय् दथुइ वार्ता यानाः समस्या समाधान याना वंसां उकिं बजाः स्यंकेगुपाखें बचे जुइगु खः ला ?

More Stories Like this