रहस्य थुइ

नर्मदेश्वर प्रधान

रामसिद्धि। जिमि बाःया पासा। जःलाखःला। उमेर गायेधुंकूम्ह। स्वम्ह कायया बौ। स्वम्ह भौया बाःजु। जिमिथाय् वयाच्वनी। छेँखँ ल्हानाच्वनी। जहान परिवार थें व। वइगु खँ सकस्यां न्यनी। खँय् ब्वति काइ। गुलिस्यां न्ह्यसः तइ। हायेकी। व नं छुकिया कम ! खँ सुचुकी मखु। खँ उलेत लिफः स्वइ मखु ।

"जिमि कान्छिम्ह भौ। व सुकुचा। स्वयादिसँ। गुलि तःधं जुइमाःम्ह। भाःतया चिप नये मखु हं ! जितः ला मिखां मि पिहां वइ लुमन कि। वये वये धकाः स्यालय् तिनाः वल। आः वयाः नातिकुति खँ। पुराय् जा नये मयः हं। अलग देय्मा माः हं। गुलि मात्ते जूम्ह मिसा व।" कायया चिपः नये मखु। भौम्हं धाइ। खँ न्यनी। रामसिद्धियात थ्व असह्य जुइ। थ्व काययात हेपे याःगु खः। वं अनुभव याइ। मिसां फूर्ति याःगु तायेकी। वयात तं थनी। फुक्कसित कनी। मन शान्त यायेत स्वइ।
"राम दाइ छिकपिनि भौ सुतुक्क वःम्ह। उकिं अथे धाःगु जुइ। ह्वंकाः, सब्जं नयाः वःम्हसा अथे मधाइगु जुइ। ह्वंकीबलय् मिजं मिसां थःथःया चिप सवाः थुइ। सब्जं नकीबलय् थाय्भू न्ह्यच्याकी। मिसा मिजनं थःथःगु चिप नइ। चिप कालबिल जुइ। उबलय् मयः धयाच्वनां जी ला...
छिकपिनि भौ सुरुक्क वल। ह्वंकेगु, सब्जंया छुं तन्ता म्वायेक। मिजंया चिपया सवाः काये मनंम्ह जुल... अले अथे मखा धाइ। चिप नयाः इहिपा यानावःम्ह वयात चिपया मन्त्रं थीगु जुइ.. छु याये।" जिमि निनिं रामसिद्धियात हायेकी।
"खः धया नानी स्व रे, गुलि च्वय् च्वय् धाःम्ह मिसा व। सुकापु ज्वनाः वःम्ह मखु। लँय् लूम्ह। ब्वाका हल। अज्याःम्हेसिया गुज्वःगु शान। भाःतया चिपःभुइ नये मखु हं। नये मयः हं। थौंतक सुनां धाये मफु। व झतिंग्वारां हाँक बी।'' रामसिद्धि लुमं लुमं उत्तेजित जुइ ।

जिमि केहेँ। सुभद्रा। व खँ न्यनी। सुम्क च्वने फइ मखु। हाला हइ। "मयः धासेंलि कर याये दइ ला? भौया चिप नये लुइमखाः जुइ।" मनय् च्वंगु खँ प्वंकल। मिस्तय् जक थःगु नुगःखँ प्वंके मदइ ला? चिप नये मखु धाःगु ला बांलाः नि। चिप नयेगु या हानी दु। सुभद्रां भौम्हेसिया पँ ली। वकालत याइ ।

खँ न्यने। जितः लुमनी। उबलय् जिमि मां, काकीपिं फुक्क थः भाजुपिनि चिपय् च्वनाः जा नइगु। अलग्ग भुइ जा नयेगु चलन मदु। छगू कथं चलन हे जुया बी ।

श्रीमानपिनि चिपय् जा नयेगु अनिवार्य थें जुइ। थ्व परम्परा, पुरुषप्रधान सामाजिकताया लक्षण खयेफु। व्यवहारय् अथे मधाः। मनोवैज्ञानिक कारण न्ह्यब्वइ। चिपं निम्हतिपूया माया क्वातुकी। वृद्धि याइ। चिप मायाया लिधंसा। चिं खः। मिजंया चिप मिसां न्हियान्हिथं नइ। थुकिं निम्हेसिया दथुइ भिं याइ। मतिना जायेका बी। चिप महिमा पक्षधरतसें धाइ। औचित्य न्ह्यब्वइ ।

समाजय् चिप बहुअर्थी खने दइ। सांस्कृतिक दृष्टिं इहिपाबलय् ह्वंकीबलय् सब्जं नकीबलय् मिजं व मय्जु दथुइ चिपया महत्व दइ। ह्वंकीबलय् मिसा मिजनं चिप हिलाबुला याइ। सकस्यां लापा थाइ। न्ह्याइपुकी। धार्मिक दृष्टिं चिप बर्जित जुइ। अशुद्ध जुइ। धार्मिक कार्यय् चिपनिपया तसकं ल्याः तइ। चिपं थिउगु अस्वीकृत जुइ। चिपनिप ल्याः मंत। थुज्वःगु आरोप यानाः द्यः वयेकीपिं नं दु। जिमि मांपिं धर्मभिरु। चिपनिपया खँय् तसकं हे ग्याः। पसल्यां च्या त्वनी। व हे ल्हातं सामान मी। छेँय् मांपिंत द्यःयात तइ। मतिइ लुइ। छु चिप ! छु निप !

सरसफाइ। शुद्धीकरण। स्वास्थ्यया सन्दर्भय् चिपपाखें सुरक्षित जुइमाःगु खँ वइ। चिपं अनेक ल्वय् सरे जुइ। सरसफाइया निंतिं चिप नये मजिउ। सरसफाइ विज्ञानं खँ हइ। बसय् नोट चिप याइ। खनी। पसल्यां बिल पुइकी। म्हुतुयात लःदानी तायेकी। पतिंचां ई फ्यइ। लःया ज्या काइ। ईयात चिप धाये। वा गङ्गाजल। अखबारवालातसें अखबार निनी। वहे ज्या। ई फ्ययाः। चिपया व्यावहारिक प्रयोग जुयाच्वंगु खने दइ। सरसफाइया खँ ल्हानां शुद्धीकरणया हल्ला यानाः छु याये? मनूयात मदयेक मगाःगु नोट चिप मजूगु छगू नं दइ मखु ।

चलनकथं फ्वगिंतय्त चिप मुनाः बी। ताजा। चिपं मथिउगु नसा अक्सर इमित बी मखु। गरिब फ्वगिंतय्त बीगु दान जुया बी चिप। क्वय् तायेकाः व्यवहार यायेगु साधन जुया बी चिप। महिलावादीतसें मिजंतय् चिप नयेमाःगु प्रथाय् पुरुष प्रभुत्वया लक्षण खंकी। उकिं विरोध याइ। पुरुषप्रधान समाजय् निपगु खाना मिजंतय्त थयेकी। समाजया अनेक सन्दर्भय् चिपया अर्थ हेला, दमनया प्रतीक जुइ ।

छगू पसलय् न्हियान्हिथं अखबार काःवने। अखबार पसलय् नकतिनिम्ह ल्याय्म्हपिं मिजं व मिसां संचालन यानाच्वंगु। न्यासि चाः इपिं। पसलय् च्वनी। इमि मनस्थितिं पसःयात पार्कया अनुभूति यानाच्वनी। मस्त। छन्हु सुथय्। इमि न्ह्यःने छगू गिलास चिया तयातइ। चिग्वःगु ग्लास। छम्हेस्यां गिलास ल्ह्वनी। त्वनी। अले मेम्हेस्यां व हे गिलासय् काइ। सुतुक्क म्हुतुं साली। छगू गिलासया चिया। वं छकः वं छकः त्वनी। मतिइ लुइ। उलिचा चिया। निगू गिलास कयाः त्वंसा जिउ नि। हानं छकःया खँ। मिसां स्याउ वांन्यानाच्वन। "स्वये जिं नं वां न्याये।" मिजनं धाइ। अखबार काः वइम्ह। जि मखं छु याना, स्वयाच्वना। मिसां मिजंयात स्याउ बी। 'चिप मयाःथाय् वां न्याःसां जिउ।' जिं कपाः स्याकाः बिचाः याना। मिजंम्हं मिसां वांन्याःथाय् हे ताके याइ। मेकुन्हु। वहे निम्ह तिपू। जेरी वांन्यानाच्वन। मेगु जेरी भ्वँतय् दु। मिजंम्हं अनुरोध याइ "स्वये छंगु जेरी वांन्याये।" मिसां चिपगु जेरी मिजंया म्हुतुइ तया बी। निम्हं भाजु मय्जु। पसलय् च्वंसां खुब रोमाय्न्टिक। चिपया खेल क्यनाच्वनी। मतिइ च्वनी, थ्व चिपया हे करामत खः ला? इमि प्रेमक्रिडा खनिं। चिपं माया क्वातुकी। विश्वास यायेमास्ते वइ ।

रामसिद्धिं कायया चिप नये मखु धाःम्ह भौयात छाय् ब्वः
बिल? रहस्य थुइ ।

More Stories Like this