१६ घण्टां अप्वः मत मसीगु

विरोध ज्याझ्वलं सरकारया सातो काल

देशय् लागू जूगु १६ घण्टे लोडशेडिङ विरुद्ध थीथी ख्यलं यानाहःगु विरोध ज्याझ्वलं सरकारयात गम्भीर याना बिउगु खँ सीदुगु दु । थुकियात ध्यानय् तयाः सरकारं म्हिगःनिसें बियातःगु रुटिन स्वयां न्ह्यः मत च्याकेगु ज्या यानाहःगु दुसा फागुनं लोडशेडिङया ई क्वपालेगु खँ नं धाःगु दु ।

विद्युत प्राधिकरण सूत्रं धाः कथं उकुन्हु तिनि तयार जूगु मध्य मस्र्याङ्दीं आः निवाःया दुने हे पूर्ण रुपं उत्पादन शुरु यायेत्यंगु दुसालत्याया दुने कोशीं चुइकूगु टावरत दयेकाः अनं नं मत पिकायेगु ज्या जुइत्यंगु दु । थ्व निता ज्या पूवन कि लोडशेडिङ हटे मजूसां आःया १६ घण्टा स्वयां अप्वः धाःसा मत मसीगु खँ धाःगु दु । थ्व स्वयां न्ह्यः माघ महिनाय् न्हिछिया १८ वा २० घण्टा तक नं लोडशेडिङ जुइफुगु अनुमान यानातःगु खः ।

विद्युत प्राधिकरणं फागुनय् ६ घण्टा लोडशेडिङ क्वपाले फइगु खँ धायेधुंकूगु दु । तर लोडशेडिङयात पूर्ण रुपं हे मदयेका छ्वयेगु बारे धाःसा प्राधिकरणं छुं धाःगु मदुनि ।

थ्वहे झ्वलय् देशय् न्हापा गबलें मजूनि कथं १६-१६ घण्टा मिछ लोडशेडिङ यायेमाःगुया कारणयात कयाः नं थीथी कथंया शंकात ब्वलंगु दु । न्हिं १६ घण्टा मत स्यायेमाःगु आवश्यकता हे मदुसां नं दथुइ गनं षडयन्त्र जुयाः जकं थ्व स्थिति हःगु खः ला धइगु शंका थन यानाहःगु दु । लोडशेडिङया विरोधय् थीथी कथंया ज्याझ्वःत जुइवं प्राधिकरणं म्हिगःनिसें न्हिं प्यघौ धइथें लोडशेडिङया ई क्वपालाः मत च्याका हःगु दु । आः तक नं उत्पादन अप्वयेकेगु छुं हे ज्या जूगु मदुनि अथे खःसां न्हिं प्यघौ मछि मत बीगु क्षमता गनं वल धकाः थन न्ह्यसः तयाहःगु खः ।

उखे लोडशेडिङ क्वपालेगु लागिं सरकारं तत्कालिन अल्पकालिन व दीर्घकालिन धकाः हःगु ३५ सूत्रीय ज्याझ्वः आः तक शुरु तकं मजूनिगु जानकारी नं छगू सूत्रं बिउगु दु । भारतं मत हयेगु खँ 'गफ'या चरणय् दुगु व कोशीया टावर दयेकेगु ज्या मेमेगु थें नियमित रुपं जुयाच्वंगु खँ सूत्रं धाःगु दु । अथे खःसां छगू पुचः धाःसा अझ नं थर्मल प्लान्ट हे हयेगु धकाः लगे जुयाच्वंगु खँ नं धाःगु दु ।