बन्दं स्वनिगःया जनजीवन प्रभावित

महामन्त्री टंक ढकाल नापं निसलं मल्याक कार्यकर्ता ज्वंगु दावी

येँ (सन्ध्या टाइम्स)/राष्ट्रिय प्रजातन्त्र पार्टी नेपालं स्वनिगः बन्द आह्वान यानातःगु कारणं थौं सुथंनिसें स्वनिगःया स्वंगू हे जिल्ला येँ, यल व ख्वपया जनजीवन प्रभावित जूगु दु। क्वःछिनातःगु इलय् हे संविधान दयेकेमाःगु, बजाःभाः क्वकायेमाःगु, भ्रष्टाचारीतय्त नियन्त्रण यायेमाःगु, संघीयता, राजसंस्था व हिन्दू राज्यया सवालय् जनमत संग्रह यायेमाःगु माग यानाः उगु पार्टीं थौं बन्दया आह्वान याःगु खः। बन्द आह्वान यानातःगु कारणं मू मू लँय् छुं छुं मोटरसाइकल व निजी गाडी चलेजूगु दुसा बजाः धाःसा बन्द जूगु दु। गल्ली गल्लीइ च्वंगु पसः धाःसा चालाच्वंगु खनेदु ।

राप्रपा नेपालया सह महामन्त्री नापं प्रचार विभागया प्रमुख राजाराम श्रेष्ठं 'सन्ध्या टाइम्स' लिसे खँ ल्हासें पार्टीया महामन्त्री टंक ढकालयात चाबहिलं ज्वंगु व मेमेगु नं थीथी थासं यानाः निसःम्हं मल्याक कर्याकर्ता प्रहरीं सुथय् हे ज्वना यंकूगु खँ कनादीगु दु। वय्कलं ज्वंपिं कार्यकर्तातय्त मत्वःतल धाःसा व प्रहरी प्रशासनं दमन मदिकल धाःसा अझ सशक्त कथं ज्याझ्वः पित बीत बाध्य जुइ धकाः नं धयादीगु दु। उगु पार्टीं कन्हय् सिंहदरवार धेराउ यायेगु ज्याझ्वः नं तयातःगु दु ।

बन्दं माओवादीया मुँज्या स्थगित
येँ (सन्ध्या टाइम्स)/राप्रपा नेपालं थौं स्वनिगः बन्द आह्वान यानातःगु कारणं एनेकपा (माओवादी)या केन्द्रीय कमिटीया मुँज्या स्थगित जूगु दु। थौं च्वनेगु धयातःगु केन्द्रीय कमिटीया मुँज्या आः कन्हय् जक च्वनीगु जूगु दु। माओवादीया केन्द्रीय कमिटीयात तःधं यायेगु निंतिं सहलह ब्याकेत म्हिगः मुँज्या च्वंगु खःसा उकियात हे निरन्तरता बीगु निंतिं थौं मुँज्या च्वनेगु धयातःगु खः ।

कार्यदलया मुँज्या नं स्थगित
येँ (सन्ध्या टाइम्स)/राप्रपा नेपालया स्वनिगः बन्दं यानाः राजनीतिक गतिरोध अन्त्यया नितिं धकाः दयेकातःगु स्वंगू दलया शीर्ष नेतात दुथ्याःगु उच्चस्तरीय संयन्त्रया कार्यदलया मुँज्या नं स्थगित जूगु दु। राजनीतिक गतिरोध अन्त्यया नितिं माःगु कथं सहमति दयेकेगु नितिं एनेकपा (माओवादी), नेपाली कांग्रेस व नेकपा (एमाले)या निम्ह निम्ह नेतात दुथ्याकाः कार्यदल दयेकातःगु खः। संयन्त्रं राजनीतिक सहमतिया खाका दयेकेगु भाला उगु कार्यदलयात बियातःगु खः ।