तःदँ लिपा - दबुलिइ नेपालभाषाया प्याखं

तःदँ लिपा दबुलिइ नेपालभाषाया प्याखं स्वयेदत । ताः ई निसें दिनांच्वंगु नेपालभाषा छधाः प्याखं धेंधेंबल्ला कासा म्हिगः हाकनं न्ह्याःगु दु । पब्लिक युथ क्यम्पस सँझ्याः साहित्या पाःलाःया ग्वसालय् निदँय् छकः याना वयाच्वंगु थुगु धेंधें बल्ला कासा झिक्वःतक जुइ धुंकूगु खःसा थीथी हुनि दिनाच्वंगु खः । थुकियात हाकनं निरन्तर न्ह्याकावनेगु कथं म्हिगः थनया प्रज्ञाभवन दबुलि येंय् क्षेत्र नं. १ या सभासद् व नेपाली काँग्रेसया न्वकू भाजु प्रकाशमान सिंहं त्वाःदेवाय् मत च्याका उलेज्या यानादीगु खः ।

थीथी न्हय्गु क्याम्पसं ब्वतिकाःगु उगु धेंधें बल्लाकासाय् म्हिगः प्यंगु क्याम्पसं ब्वतिकाःगु खः । म्हिगःया न्हापांगु ब्वज्या पद्म कन्या क्याम्पस पलेस्वां साहित्य पाःलाःया 'बिलागः' (च्वमि व निर्देशन भाजु शुभशान्ति बज्राचार्यं), निगूगु ब्वज्या हिल टाउन ईन्टरनेशनल उच्च मा.बिया 'ब्याँचुलि' (च्वमि व निर्देशक भाजु लक्ष्मी कुमार महर्जन 'उदाश'), स्वंगूगु ब्वज्या ललितकला क्याम्पस तिसा साहित्य पाःलाःया 'झी नं द्यः जुइनु' (च्वमि व निर्देशक भाजु अनुप िसं सुवाल), अथेहे लिपांगु ब्वज्या अमृत साइन्स क्याम्पस निभाः साहित्य पाःलाःया 'न्हू नेपाः' (च्वमि भाजु पुष्प श्रेष्ठ व निर्देशक भाजु अमृत चन्द श्रेष्ठ) खः ।

थौं लिपांगु दिं खुन्हु ब्वज्या अन्नपूर्ण कलेजया 'झ्यारखाना' (च्वमि भाजु निर्मल बज्राचार्य व निर्देशक भाजु मथुरा श्रेष्ठ), निगूगु ब्वज्या त्रिचन्द्र कलेज नेपालभाषा साहित्य पाःलाया 'ब्वलसा' (च्वमि भाजु शरद कसाः व निर्देशक भाजु पसर्ियसलाल प्रधान), अथेहे लिपांगु ब्वज्या विश्वभाषा क्याम्पस विश्वभाषा साहित्य पाःलाःया 'भुखाय' (च्वमि भाजु सुरेश किरण मानन्धर व निर्देशक भाजु नरोत्तम मानन्धर) खः ।

थौं हे ग्वसाः खलः पब्लिक युथ क्याम्पस सँझ्याः साहित्य पाःलाःया पाहाँ छधाः प्याखँ 'घःसू भ्वय' च्वमि व निर्देशक भाजु सुरेन्द्र तुलाधर नं क्यनीगु दु ।

थुगु छधाः प्याखं धेंधें बल्ला कासाया निर्णायक मण्डलय् भाजु प्रा.डा. सुन्दर कृष्ण जोशी भाजु रामशेखर नकःमि व भाजु प्रचण्ड मल्लपिं जुयादी ।

More Stories Like this