अझ नं ल्वाभः हे मुख्य विषय तिनि

सशस्त्र प्रहरीया लागिं धकाः सरकारं विदेशं झिके याःगु ल्वाभःया कारणं सरकार व माओवादी दथुइ हानं तनाव ब्वलंगु दुसा थुकिया लिच्वः उखे वृहत् शान्ति सम्झौताय् तकं लाइगु खः लाकि धइगु ग्याःचिकु ब्वलंगु दु। देशय् छुं नं कथंया ल्वाभः हयेगु ज्या धइगु हे वृहत् शान्ति सम्झौताया अःखः खः धकाः माओवादीं द्वपं बियाच्वंगु दुसा उखे सुरक्षा निकायया गाडी पनाः अवरोध पिकायेगु धइगु हे शान्ति सम्झौताया अःखः खः धकाः सरकारं द्वपं बियाच्वंगु दु। छगू पुचलं मेगुयात शान्ति सम्झौता उल्लंघन यात धकाः द्वपं बिउगु हे थम्हं नं भविष्यय् उकया उल्लंघन यायेगु लँपु चायेकेत खः। थुकियात इलय् हे समाधान मयात धाःसा शान्ति सम्झौता केवल भ्वँतय् जक सीमित जू वनीगु उतिकं हे तःधंगु सम्भावना दु ।

गन तक सरकारं ल्वाभः हःगु खँ दु, थ्व प्रहरीया लागिं हःगु खः धाःसां उकी गज्याःगज्याःगु ल्वाभः तया हल धइगु खँ स्पष्ट याना तःगु मदु। थ्व इलय् ल्वाभः धायेसातकि हे निगुलिं पक्षं शंकाया मिखां स्वइगु जूगुलिं अज्याःगु छुं नं ज्वलं हये न्ह्यः सतर्कता नालेमाःगु अत्यावश्यक खः। वृहत् शान्ति सम्झौताय् ल्वाभः महयेगु जक धयातःगु दु, उकिया अर्थ प्रहरीं समेत हये मजिउ धाःगु खः लाकि मखु, थ्व खुले मजू। तर सम्झौताय् उल्लेख मजू धकाः उकियात अवसरया रुपय् काल धाःसा उकिं मेमेगु नं अवसरया लुखा चायेका बी। उकिं मुख्य खँ सम्झौताया आखः मखु, उकिया भावना खः। सम्झौताया भावना छु खः, उकियात निगुलिं पक्षं पालना यायेमाः। यदि मजुल धाःसा देय्या शान्ति, संविधान व समृद्धि फुक्कं खतराय् लाइगु निश्चित दु ।

More Stories Like this