माया-मतिनाया पर्व अबिर रंगयाया नखः होली चीर थनाः सुरु

होली प्राचिन कालं निसें बसन्त ऋतुइ लाइगु तसकं न्ह्याइपुसेच्वंगु छगू विशिष्ट पर्व खः । बसन्त ऋतुइ रोगब्याधी मदया ताःन्वः चिकु मजुइगु म्ह स्वस्थ जुयाः मन आनन्दित जुयाच्वनीगु ई खः । स्वांमाय् चुलि ह्वयाः नस्वाना लकस बांलाइगु ई खः । झीगु नेपाः देशय् थ्व पर्व भारत पाखें वःगु धाइ । न्हापा न्हापा रसरंग यायेत बसन्त महोत्सव कथं रंगं लुकाः होली म्हितेगु चलन दु । न्यने दुकथं मल्ल जुजु गुणकामदेवया पालय् धालसिक्वय् च्वंपिं तूचिकंया साःतया वःपिं साय्मि खलःतयेत चीर स्वायेगु जिम्मा लः ल्हानातःकथं आःतक नं हनुमानध्वाखा लाय्कुया न्ह्यःने माहेनकाजि चुकय् चीर स्वायेगु यानावयाच्वंगु दु । मल्लकाल व राणाकालया परम्परागत मेगु चीर धाःसा हनुमानध्वाखाया पश्चिम मूलुखा न्ह्यःने तयातःगु दु । शाह जुजु पृथ्वीनारायण शाहया पालय् मल्ल जुजुपिन्सं गाडेयाइगु चीर स्वयां विस्कं कथं रामं रावण बुकाः त्याकूगु उत्सवकथं होलिका दहन पर्व व कृष्णद्यःपाखें चीर हरण याःगु लुमन्तिइ रंगीचंगी कापःया चीर स्वानाः वयाच्वंगु दु ।

चिल्लाथ्व अष्टमि निसें चिल्लाथ्व पुन्हि च्यान्हू तक हनीगु थुगु पर्वया सुरुया दिं चिल्लाथ्व अष्टमिकुन्हू थाय्थासय् चीर स्वायेगु यानाः चीर अष्टमि वा होली अष्टमि न्यायेकी । चीर थनेवं होली सुरु जूगु धायेगु परम्परा दु । दलके लिपा चिल्लाथ्व पुन्हिखुन्हू चीर क्वथला दाह याइ गुकियात होली पुन्हि धायेगु याः । चीर येँया हनुमान ध्वाखा लाय्कुया मूलुखा न्ह्यःने ख्वप लाय्कू व यल लायकूया कृष्ण देगः न्ह्यःने सिमा कचाय् थीथी कापःया टुक्रा स्वानाः चीर स्वाइसा बसन्तपुरय् नीगू फिट ताःहाकःगु पथय् स्वंगु तल्लाया छत्रथें गोलाका रंगीचंगी कापः चिनाः यःसिं थंथें साइस स्वयाः साय्मितय्सं थनेगु याइ ।

थ्वहे भुवःयात निरन्तरता बियाः फागुण १० गते सोमवाः हुनमानध्वाखाया मू लुखा न्ह्यःने ७ बजे जुया ५१ मनेटया साइटय् सिमा कचाय् चीर स्वाना होली पर्वया सुरु यात । उगु इलय् होलीया म्ये लोक लयय् हालेगु ज्या तकं जुल ।

अथेहे उगु हे साइटय् बुसन्तपुर कुमारी छेँ न्ह्यःने नं नीगू फिट ताःहाकःगु पथय् स्वंगु तल्लाया छत्रथें गोलाका रंगीचंगी कापः चिनातःगु चीर यःसिं थंथे थनेगु ज्या जुल । उगु इलय् गुरुजुया पल्टनं हर्ष बढाइ याना स्वंगः तोपया सलामि नं ब्यूगु खः। चीर थने धुंकाः स्थानिय मनूतय्सं होली सुरु जूगु प्रतिक कथं अविर छ्वाकाः अविर इका होली सुरु यात ।

उगु हे साइटय् यल लायकू न्ह्यःने कृष्ण देगलय् नं चीर थन ।

चीर छाय् थनेगु यात धैगु बिषयसं स्वयेगु खःसा चीर धैगु वसः अले वसः इज्जतया चिं खः । द्वापर युग अर्थात् दैविकालय् गोकुलय् कृष्णं थीथी लिला क्यंगु मध्ये छगू रास लिला खँनाप स्वापू दुगु धाइ । भारतया बृन्दाबन गोकुलया गोपीनित छन्हू यमुना खुसिइ म्वःलुहइत थःपिनिगु वसः दक्वं खुसि सिथय् तयाः थःपिं खुसिइ दुनां च्वंगु जुयाच्वन । उगु इलय् कृष्णं नं गोपीनित म्वःल्हुयाः च्वंगु यमुना खुसिइ थ्यंकवल । गोपिनीतय्सं वसः त्वःता म्वःल्हुयाच्वंगु कृष्णं खनाः दक्वः वसः कयाः सिमाय् खानाः म्हःल्हुया च्वंपिं गोपिनीतय्त हायेका यात । थथे कृष्णं थःपिनिगु लँ सिमाय् खायाबिइवं गोपिनीतय्सं आवली थःपिं गबलें पचिनांगाः म्वःलुहइमखु अनुसाशनय् च्वनाः चीर तयाः म्वःलुहइ धकाः बाचा यायेवं कृष्ण गोपिनीतय्गु वसः लितविल । थुगु लिलायात चीर हरण धायेगु यानावयाच्वंगु दु । उकिया हे लुमन्तिइ होली पर्व सुरु जूगु व चीर स्वायेगु धकाः गोपिनीतय्सं वसः कृष्णदेवं सिमाय् खायाब्यूगु प्रतिक कथं चीर थनेगु यानावयाच्वंगु खः ।

होली पुन्हिया धार्मिक किम्वदन्ती स्वयेगु खःसा हिरण्यकशिपु जुजुं थः विष्णुभक्त काय् प्रल्हाद यात अनेक कथं विष्णुया भक्ती त्वःतकेत जुक्ति पिकायेगु यानाच्वन । तर गबलें ताःमलात । अथेजूगुलिं थः काय् प्रल्हादयात स्यायेगु बिचाः यानाः थः केहेँ मिं भष्म यायेमपुूम्ह धयातःम्ह होलीकायात सःता होलीका नापं प्रल्हादयात मि होमेयायेगु ज्या तकं यात । तर दुर्भाग्य मिं विष्णुभक्त प्रल्हादयात छुं हे मजू मिं भष्म मजुइगु बरदान कयातःम्ह होलीका थः हे मिं भष्म जुल । थुकथं सत्यया न्ह्यःने असत्य पराजित जूगु व होलीका नाश जूगु लुमन्तिइ होली पर्व हनेगु यानावयाच्वंगु खः ।

होलीपुन्हियात राष्ट्रिय पर्वकथं दकलय् लिपांगु दिं अथेधयागु चिल्लाथ्व पुन्हिकुन्हू छन्हू होली म्हितेगु निंतिं देय्न्यंकं विदा बीगु यानावयाच्वंगु दु । होली सहरय् जक मखु गां गामय् नापं तराई लागाय् तकं तःजिक हनेगु याना वयाच्वंगु दु ।

होली पुन्हिकुन्हू थाय्थासय् थनातःगु चीर क्वथलाः छगू क्वःछिनातःगु थासय् दहन यायेगु चलन दु । थुकथं दहन यायेवं होली क्वचागु धैगु मान्यता दु । बसन्तपुरय् थनातःगु चीर धाःसा क्वःथलाः तिंख्यलय् यंकाः दहन यायेगु चलन दु । होली पुन्हिया चान्हय् इतुंबहालय् गुरुमापायात म्येय् छम्हेसिया ला झिंनिफा जाकिया जा थुयाः उकियात ल्वय्क ल्वसाघासा दयेकाः किलाघःया ज्यापुतय्सं तिंख्यलय् भ्वय् नकेयंकेगु चलन दु । थ्व ज्या न्हापा विशेष यानाः पःमाय् जातिं यानाः वयाच्वंगु खःसा लिपा किलाघःया ज्यापुतय्सं जिम्मा काःगु धाइ ।

होली पुन्हिया दिं लोक लसय् होलीया म्ये हालाः होली म्हितेगु याइ ।

More Stories Like this