नेवाः ५३५ लोकवार्ता नांया सफू पिहांवइगु

त्रिभुवन विश्वविद्यालय नेपालभाषा केन्द्रीय विभागं स्नातकोत्तर तिगंया निंतिं नेवाः ५३५ लोकवार्ता नांया सफू पिकायेत्यंगु दु ।

यलया पाटन संयुक्त क्याम्पसय् स्वन्हूयंक जूगु लोकवार्ता कार्यशाला गोष्ठी क्वचायेकेगु ज्याझ्वलय् आइतवा: सभासद तीर्थराम डंगोलं थ्व सफू पिकायेत तुइगु ध्यबा ग्वाहाली यायेगु बचं बियादीगु ख: । कार्यशाला गोष्ठीइ न्ह्यब्वःगु झिंप्यंगू कार्यपत्रयात परिमार्जन यानाः सफू पिकायेगु व नेपालभाषा विभागयात स्तरीय प्राज्ञिक संस्था दयेकेगु कुतः जुयाच्वंगु खँ नेपाल भाषा केन्द्रीय विभागया प्रमुख प्रा. प्रेमशान्ति तुलाधरं जानकारी बियादीगु दु ।

वंगु शुक्रवा: कार्यशाला गोष्ठीइ रवि शाक्यं लोकबाखं, जीवनकुमार महर्जनं नेवाः भौतिक संस्कृति, लेलिन शाक्यं क्वाः कासा व श्रुति शाक्यं खँत्वाः खँभाय् विषयस कार्यपत्र न्ह्यब्वयादीगु खः । शनिवा: जूगु गोष्ठीइ रास जोशीं अन्धविश्वास लोक, ओमकारेश्वर श्रेष्ठं लोकभाषा, तुलसीलाल सिंहं लोकम्येया प्रारम्भिक, बज्रमुनि बज्राचार्यं प्रदर्शनकारी संस्कृति, ईश्वरीमैंया श्रेष्ठं नेवाः तिसा वसः व काजीमान डंगोलं नेवाः कृषि प्रणाली विषयस कार्यपत्र न्ह्यब्वयादीगु खः ।

अथेहे आइतवा: जूगु गोष्ठीइ योगेन्द्र राजकर्णिकारं नेवाः लोक म्ये, शरद कसाःपाखें नेवाः जातिया म्हसीका, तेजप्रकाश श्रेष्ठं लोकसाहित्यया म्हसीका व राजितबहादुर श्रेष्ठं नेवाः लोकसाहित्यविद् आदि विषयसं कार्यपत्र न्ह्यब्वयादीगु खः ।

More Stories Like this