पिनें हःगु ल्वाभलं हानं तनाव
प्रहरीया गाडीइ तयाः सेनाया ल्वाभः हःगु दावी
येँ (सन्ध्या टाइम्स)/प्रहरी व सशस्त्र प्रहरीया लागिं धकाः गृह मन्त्रालयं झिके याःगु ल्वाभः ज्वना वःगु ट्रकयात माओवादीं पना बीवं सरकार व माओवादी दथुइ जुयाच्वंगु शान्ति सम्झौता भंग यायेगु ज्या जुल धकाः निगुलिं पक्षं छम्हं मेम्हेसित द्वपं बिउगु दु ।
वृहत् शान्ति सम्झौताय् सेनाया लागिं जक ल्वाभः हये मजिउ धकाः च्वयातःगु कारणं प्रहरी व सशस्त्र प्रहरीया लागिं ल्वाभः हयेत गनं नं पनी मखु धकाः सरकारं दावी याःगु दु। प्रधानमन्त्री माधव नेपालं नं थ्व सम्बन्धी थःपिनि बिचाः बियादीधुंकूगु दु ।
उखे गृह मन्त्री भिम रावलं नं गृह मन्त्रालय अन्तर्गतया सुरक्षा निकायया लागिं हःगु ल्वाभः तकं हयेके बी मखु धकाः पनेगु अधिकार माओवादीयात कदापी मदु धयादीगु दु। सुरक्षा निकायया गाडीयात गजुरीइ पनाः खोले यानाः स्वये धायेगु माओवादीया ज्या गैर जिम्मेवारपूर्ण खः धासें वय्कलं धयादिल, 'छम्ह ब्यापारीया सामान तयाः हःगु ट्रक ला लँय् दथुइ तयाः लाक्वपाक्व मनूतय्सं स्वये मदु धाःसा सुरक्षा निकायया गाडी अथे खोले यानाः स्वये धायेगु उचित खः ला?'
उखे माओवादी नेता जनार्दनं सशस्त्र प्रहरीया गाडीइ तयाः सेनाया लागिं ल्वाभः हःगु खः धकाः द्वपं बियादीगु दु। वय्कलं धयादी, 'सेनाया लागिं हःगु जुइमा वा प्रहरीया लागिं हःगु जुइमा, अन्ततः उकिया प्रयोग याइगु ला जनताया विरुद्ध हे खः ।'
देशय् आः थवंथवय् संवाद यानाः समस्या ज्यंकेगु धकाः कुतः न्ह्यानाच्वंगु इलय् बन्दुक छाय् हयेमाल धकाः नं वय्कलं न्ह्यसः तयादीगु दु। 'आःया समस्या यदि संवादं हे ज्यंकेगु खःसा बन्दुक छाय् झिके यानाच्वने माल?' वय्कलं न्ह्यसः तयादी ।
शान्ति सम्झौताय् सेनाया लागिं ल्वाभः हये मजिउ धकाः च्वयातःगु बुँदायात छले यानाः सरकारं प्रहरीया लागिं धकाः ल्वाभः हः थें आः माओवादीं नं लडाकुया लागिं मधासे वाईसीएलया लागिं धकाः ल्वाभः हल धाःसा उकियात छु धायेगु धकाः नं न्ह्यसः तयादीगु दु ।
सरकारं प्रहरी व सशस्त्र प्रहरीया तालिमया लागिं धकाः छुं विष्फोटक पदार्थ हयागु खः धकाः दावी याःसां माओवादीं धाःसा उकी इन्सास राइफल नं दु धकाः द्वपं बिउगु दु। भारतं नेपाःया सेनायात माओवादीलिसे प्रतिकार यायेगु लागिं धकाः थःथाय् दयेकूगु इन्सास राइफल कम जक शुल्क कयाः बिउगु खः ।
