विदेशी षडयन्त्रया विरुद्ध वनेमाः

डि. आर. खड्गे

नेपाः सिबें यक्व तःधंगु २८ गू राज्य दुगु भारतया संसद भवनय् ५०४ म्ह जक सभासद दुथ्यानाच्वंगु दु। नेपाः भारतया न्ह्यःने अति हे चीधंगु देशय् ६०१ म्ह सभासदत च्वनाच्वंगु दु। भारतया अनुपातय् नेपालय् खालि ६०, ७० म्ह सभासद जक पाय्छि जू। नेपाःया सभासदतय्गु व्यक्तित्व, आचरण, व्यवहार, शिक्षा व बौद्धिकता स्वत धाःसा ९० प्रतिशत सभासदयाके नेतृत्व यायेगु गुण खने मदु। अप्वः सभासदत राजनीति गतिविधि स्वयाः नं अपराधी क्रियाकलापय् अप्रत्यक्ष रुपं वनाच्वंगु खनेदु। सभासदतय्गु चरित्र व गतिविधि शंकालु खने दयाच्वंगुलिं जनता छु जुइ धया वयाच्वंगु नं खः। संविधानसभाया चुनाव त्यानावःपिं सभासदतय्सं देय्या नितिं छुं हे याये मफइगु जक मखु, अझ ला देय्यात बर्बाद याना वनेफु ।

करोडौं करोड ध्यबा फुक्क संविधानसभाया चुनाव यात। चुनावं त्यानावंपिं सभासदपाखें तलब सुविधाया कथं ५० द्वः तका कया वयाच्वंगु जनतां मसिउगु मखु। अझ थीथी समिति व उपसमितिया नामं नं लखौं भत्ता झ्वाम्म यानाच्वंगु दु। निदँ फुइन, अझ नं संविधान इलय् च्वये मफइगु खँ तसकं प्रचार याना हयाच्वंगु दु।
शुरु शरुइ ला इलय् सभासदतय्सं सविधान दयेकेगु ज्या पूवंकेगु धकाः फूर्ति याना जुल। आः जब निदँ फुइगु ई न्ह्यःने वःलिसे नेतातय्सं हाकनं थथे धायेगु याना वयाच्वंगु दु - न्हूगु संविधान इलय् पिहां मवल धाःसा आँटे जुइमाःगु मदु, ग्यायेमाःगु मदु, छाय्धाःसां संविधान इलय् पिहां मवल कि सर्गः कुतुं वइगु नं मखु। थथे धकाः उकिसं ततःधंगु न्वचु बीगु याना वयाच्वंगु दु। जनतां थ्व नं मसिउगु मखु स्वार्थी, लोभी नेतातय्सं बांलाःगु संविधान दयेके फइ मखु। यदि संविधान दयेकल धाःसां नं जनताया मिखाय् धुलं छ्वाकेगु याना वनेफु धकाः जनतां शंका यानाच्वंगु दु। संविधान च्वयेगु विषयय् माओवादी नेतातय्सं नं ततःधंगु न्वचु बीगु यानाच्वंगु दु। यदि संविधान इलय् पूमवन धाःसा जन बिद्रोह जुइ धकाः धया वयाच्वंगु दु। थुलि जक मखु राष्ट्रपतिया पद तकं स्वतः अवैधानिक जुइ धकाः नं माओवादीतय्सं धायेगु याना हयाच्वंगु दु ।

थ्व स्वंता खँत नेतातपाखें हल्ला यानाच्वंगु दु - १) सर्गः कुतुं वइ मखुगु खँ, २) राष्ट्रपति अवैधानिक जुइगु खँ व ३) जनबिद्रोह जुइगु खँ। नेतात न्ह्याक्व हे हाला जूसां जनतां नेतातय्गु खँयात विश्वास यानाच्वंगु खनेमदु। छाय्धाःसां नेतातय्सं देय् व जनतायात बर्बाद यायेगु बाहेक मेगु ज्या यानाच्वंगु मदुगुलिं खः। अझ ला जनतां शंका यानाच्वंगु दु, नेतातय्सं सिक्किमया अवस्था हयेफु धकाः। सिक्किम सन् १९७१ सालपाखे संविधानसभाया चुनाव त्यानावंपिं सभासदतय्गु अत्यधिक बहुमतं भारतनाप विलय यायेगु धकाः भोट बिउगु खः। नेपाःया सभासदतय्सं नं अथे हे मयाइ ला धकाः शंका तकं यानाच्वंगु दु। शंका याइगु नं स्वाभाविक खः। छाय्धाःसा नेतातय्सं गुलि नं भारतनाप जलस्रोत व प्राकृतिक स्रोत बाँडफाँडया विषययय् सम्झौता यानावइ, व फुक्क राष्ट्रघात जुयाच्वंगु दु। जनमानसं थथे धायेगु नं यानाच्वंगु दु, नेतातय्सं संविधान इलय् च्वयेगु धकाः फूर्ति नं यात, हाकनं इलय् च्वये फइ मखु धकाः धया नं च्वन। थ्व छु पहःयापिं धकाः न्ह्यसः तयाच्वंगु दु। जनमानसं खालि थुलि जक आशा याःगु खः, बांलाःगु संविधान दयेकाः देशय् शान्ति, अमन चयन, आनन्द वइ ला धकाः उत्साहित जुयाः चुनावय् ब्वति काःगु खः। जब चुनाव क्वचाल, संविधान दयेकेगु भवनय् थ्यन, २० ला तक खालि सरकार दयेकेगु व क्वःथलेगु कासाय् जक तक्यनाच्वंगु खनाः जनता दिक्क जुयाच्वंगु खः। अथेहे नेतातपाखें भिंगु ज्या ला मजुल तर अशान्ति व अराजक स्थिति हयाच्वन धकाः दिक्क जुयाच्वंगु खः। जनता आक्रोशित जुयाः थथे धायेगु नं यानाच्वंगु दु कि देशय् १०४ दँ तक राणातय्सं शासन यातं नं सर्गः कुतुं मवः, शाहपाखें तानाशाही शासन लागू यातं नं सर्गः कुतुं मवः, माओवादी पार्टीं भिषण जनयुद्ध न्ह्याकलं नं सर्गः कुतुं मवः। आः इलय् हे संविधान मवल धाःसां नं सर्गः कुतुं वइ मखु धकाः जनतां बांलाक हे सिउ। बरु जनतायात आःया नेतातय्सं भचा अप्वः दुःख बीगु ज्या यायेफु। बिहारीतय्त धमाधम नागरिकता बियाः देशय् संकटया अवस्था ब्वलंकेफु। अझ ला नेतातय्सं देय्यात यक्व बर्बाद यायेगु नितिं जातिया नामं, धर्मया नामं साम्प्रदायिक दंगा याकेफु। साधारण जनतायात दुःख कष्ट, भयया लकस ब्वलंकेगु निंतिं हत्या हिंसा, अपहरण, चन्दा आतंक अप्रत्यक्ष कथं यानाच्वंगु जनतां मसिउ नं मखु। यदि देय्या अवस्था थथें तुं जुयावन धाःसा संघर्षं वःगु छुं छुं उपलब्धित हाकनं तंकेमाली मखु धकाः धाये मफु ।

संविधान च्वयेगु इलय् राष्ट्रपतिया अवैधानिक निर्णय व नागरिक सर्वोच्चताया मुद्दा ज्वनाः माओवादीं आन्दोलन यानाः यक्व ई फुकेधुंकल। वास्तवय् जनपक्षीय पार्टी माओवादी ला जनताया सरोकारया विषययात कयाः आन्दोलनयात गति बीमाःगु खः। जनताया सरोकारया विषय खः १) बजाःया चर्को भाःया बिरुद्ध, २) हाकुबंजाःपाखें जनतायात दुःख बियाच्वंगु बिरुद्ध, व ३) देशय् भ्रष्टाचारया बिकास चरम रुपं जूगुलिं देय् बर्बाद जुयाच्वंगु नापं बदनाम जुयाच्वंगु बिरुद्ध। अझ ला देय्या नितिं संवेदनशील विषय खः बिहारीतय्त धमाधम नागरिकता बियाच्वंगुयात बिरोध यानाः नागरिकता खारेजीया निंतिं सशक्त आन्दोलन याये फयेकेमाः। यदि माओवादी पार्टी थज्याःगु मुद्दायात ज्वनाः संघर्ष याःगु खःसा जनतां नं अवश्य साथ बी नापं संघर्ष नं ताःलाइ ।

थौंकन्हय् नं माओवादीं राष्ट्रियतायात कयाः आन्दोलन यानाच्वंगु दु। आन्दोलन ताःलाकेत मेमेगु पार्टीया देशभक्त शक्ति व जनतायात साथ कयाः न्ह्याः वनेमाः। अले जक आन्दोलन याउँक ताःलाइ ।

More Stories Like this