वयेत्यंगु शान्ति पनेगु मेगु छगू पलाः

संघीय नेपाःया न्हूगु संविधान दयेकेगु ज्यायात सहज यानाः न्ह्याकेगु पलेसा उकियात झन् जक मछिंकेगु कथंया ज्याखँत जुया वःगु दु। संविधान दयेके न्ह्यः माओवादी लडाकुतय् समायोजन यायेमाःगु मू ज्या दुगु खः। तर सेना समायोजनया ज्यायात सहज याना यंकेगु सिबें झन् जक जटिल याना यंकेगु ज्या जुयाच्वंगु दु। माओवादी सेनायात नेपाली सेना लगायत थीथी सुरक्षा निकायय् समायोजन याना यंकेगु धइगु सहमति दुगु खःसां आः वयाः माओवादी सेनायात नेपाली सेनाय् समायोजन याये हे फइ मखु धकाः रक्षा मन्त्रीं न्ववाना हयाच्वंगु दु। जनयुद्ध ल्वाःपिं फुक्क माओवादी लडाकुयात लडाकुया मान्यता बी मखु धकाः प्यद्वःयात शिविरं पितिना छ्वयेधुंकल। आः वयाः दुपिं लडाकुतय्त नं तलब बी फइ मखु, उकियात रोके यायेगु धइगु न्हूगु विवाद पित हःगु दु। थुकिं अवश्य नं सेना समायोजन व संविधान दयेकेगु ज्यायात सहज याइ मखु। चुनावय् बूम्ह मनूया प्रधानमन्त्रीत्वय् बासः धइथें मनूतय्त मन्त्री दयेकाः भत्ता नका तःगु दु। सरकार व संसदय् छुं हे सरोकार मदुपिं नेतातय्सं तकं पुलांम्ह मन्त्री धइगु नामय् महिनाय् लखौं दांया सुविधा नयाच्वंगु खँ आः नकतिनि खड्ग ओलीया गाडी ज्वंगु प्रकरणं सी दत। थज्याःगु हन्ताःयात चिउताः मतसे थौं शान्ति प्रक्रियाया प्रमुख कडी जुयाच्वंगु माओवादी लडाकुया तलब रोक्का यायेगु धकाः वःगु खँ देशय् वयेत्यंगु शान्तिया लँ पनेगु बाहेक मेगु छुं हे मखु। राजनीतिक दल व उकिया नेतातय्सं थज्याःगु पहः मत्वःतेगु खःसा नेपालय् संविधान जक मखु शान्ति तकं वइ धकाः आशा यायेगु बेकार जुइ ।

More Stories Like this