पूर्वांचलय् नेवाः नसा दयेकेगु तालिम

पूर्वांचलया इटहरी च्वंगु नेपाः बहूउद्देश्यीय सहकारी संस्थाया ग्वसालय् छवाःयंकंया नेवाः नसा दयेकेगु तालिम क्वचाःगु दु । झी नेवाःतय् थःगु हे मौलिक नसा ज्वलं झीसं बुलुहुँ बुलुहुँ त्वःता वनाच्वंगु इलय् थुगु तालिमया ग्वसाः ग्वःगु खः । वंगु सिल्लाथ्व अष्टमीनिसें चतुर्दशीतक न्ह्याःगु थुगु तालिमय् थ्यंमथ्यं सच्छिम्हेसिनं ब्वतिकाःगु खः । १६ दँ निसें ६० दँ तकयापिंसं ब्वतिकाःगु थुगु तालिमय् ९० प्रतिशत मय्जुपिं हे दुगु खँ धाःगु दु ।

मध्यपुर कला परिषद्, थिमिया ईश्वरी प्रजापति व विद्या प्रजापति निम्हेसिनं थ्व तालिम बियादीगु खः । जाकि चुंया थीथी नसा त चतांमरी ग्वःजामरी योमरी अथेहे छुचुंमरी मतुमरी ल्वंचामरीनिसें थीथी वः समेबजी व सगंज्वलं दयेकेगु स्यनादीगु खः ।

नेवाःतय् राष्ट्रिय संगठन नेवाः देय् दबूया मू दुजः भाजु पूर्णकृष्ण श्रेष्ठया मू पाहाँसुइ छगू ज्याझवःयासें थुगु तालिम क्वचायेकूगु खः । ज्याझ्वलय् ब्वतिकादीपिं सकलसित मतिनाया चिं व दसिपौ लःल्हानादीगु खः ।

More Stories Like this