लडाकुया तलब दिकूसा शान्ति भंग

येँ (सन्ध्या टाइम्स)/प्रमुख प्रतिपक्षी एनेकपा (माओवादी) या वरिष्ठ उपाध्यक्ष डा. बाबुराम भट्टरार्इं यदि सरकारं शिविरय् च्वनाच्वंपिं जनसेनाया तलब दिकल धाःसा शान्ति प्रक्रिया भंग जुइगु ख्याच्वः बियादीगु दु।
'जनसेनाया तलब दिकेगु धइगु हे शान्ति प्रक्रियाया उल्लंघन खः' वय्कलं धयादीगु दु ।

जनसेनाया पुनःस्थापना व समायोजनया सवालय् माओवादी असहयोगी व उदासिन जूगु द्वपं बिसें सरकारं फागुनया निगूगु वाःनिसें जनसेनाया तलब दिकेत प्रारम्भिक गृहकार्य यानाच्वन धइगु समाचार पिहां वयेवं माओवादी नेता डा. भट्टराई आक्रोशित जुयादीगु खः।
थौं सुथय् शान्तिनगरया थःगु हे छेँय् नेपालय् च्वंगु संयुक्त राष्ट्र संघीय मिसन अनमिन प्रमुख करिन ल्यानग्रेननाप खँ ल्हासें नेता भट्टराईं उगु ख्याच्वः बियादीगु खः ।

वय्कलं जनसेनाया तलब दिकेगु तयारी याःगु खँ न्यनाः थः तसकं हे गम्भिर जुयागु खँ नं कनादीगु खः। थ्व बारे थःपिंसं न्यनकेन यानाच्वनागु खँ वय्कलं धयादीगु दु।
सहलहया झ्वलय् मय्जु ल्यानग्रेनं सेना समायोजन न्हापा यायेगु लाकि संविधान न्हापा दयेकेगु धकाः न्यंगु न्ह्यसःया लिसलय् नेता भट्टराईं सेना समायोजन धइगु शान्ति प्रक्रियाया अभिन्न अंग जूगुलिं संविधान निर्माण व सेना समायोजन नापनापं हे जुइमाः धइगु पक्षय् थःपिं दुगु बिचाः नं स्पष्ट यानादीगु खः ।

'जनसंविधान मवःसा विद्रोह'

येँ (सन्ध्या टाइम्स)/एनेकपा (माओवादी)या नेतातय्सं 'गुगुं नं हालतय् जनसंविधान दयेकेगु जुइ व यदि जनसंविधान दयेके मबिल धाःसा विद्रोह यायेत तयार जुयाच्वनेमाः' धकाः न्याद्वः कार्यकर्तायात प्रशिक्षण बिउगु दु ।

माओवादीया म्हिगः व म्हीग निन्हुयंकं खरिपाटीइ न्ह्याःगु केन्द्रीय प्रशिक्षण ज्याझ्वलय् अध्यक्ष प्रचण्ड, उपाध्यक्षपिं डा. बाबुराम भट्टराई, मोहन वैद्य, नारायणकाजी श्रेष्ठ व महासचिव रामबहादुर थापा बादलं खँ कनादीगु खः। आःया अवस्थाय् शान्ति व संविधान आन्दोलनया मू एजेण्डा खःसां नापनापं विद्रोहया तयारी नं यायेगु प्रशिक्षण वय्कःपिंसं बियादीगु खः। देशय् सामन्तीतय्गु अधिकार मदुगु नापं राष्ट्रिय स्वाधीनताया संविधानयात हे माओवादीं जन संविधान धायेगु याना वयाच्वंगु खः ।

विद्रोहया निंतिं तालिम कयावंपिं कार्यकर्तातय्सं थःथःगु लागाय् वनाः कार्यकर्तातय्त जनसंविधानया खँ जुइकेगु, जनता नाप जानाः थीथी कथंया गतिविधि यायेगु, प्रशिक्षण यायेगु, थुइकेगु नापं विद्रोहया निंतिं माःगु कथं तयारी तकं याइ धाःगु दु। विद्रोह धाःगु जनसंविधान दयेकेत पंगः वल धाःसा बल प्रयोग यानाः जूसां न्ह्याः वनेगु खः धाःगु दु ।