सभासद्तय् विदेश भ्रमण रोक्का

संविधान दयेकेगु लागिं ई मगाना वःलिसे थ्व ज्यायात याकनं याकनं न्ह्याकेगु लागिं संविधानसभाया अध्यक्ष सुभाष नेम्वांगं कडा पलाः ल्ह्वना हःगु दु। वय्कलं संविधान दयेकेगु ज्यायात हे महत्व बीगु लागिं थःगु फुक्क हे विदेश भ्रमणयात रद्द यानादीगु दुसा थीथी जिम्मेवारी दुपिं सभासद्तय्त नं विदेश वनेगुपाखें रोके यानादीगु दु। संविधान दयेकेगु लागिं अनुभव कायेगु धकाः सभासद्त विदेश वनेगु क्रम अझ नं दिउगु मखुनि। तर देशय् संविधान दयेके क्वचायेकेमाःगु ई थुलि सतिना वयेधुंकल कि आः वय्कः सभासद्तय्सं विदेशय् वनाः न्ह्यागु हे अनुभव कयादीसां नं उकियात कार्यान्वयन याये फइगु अवस्था मदु। आःया इलय् विदेशय् अनुभव काः वनेगु सिबें नेपालय् हे च्वनाः संविधान च्वयेगु लागिं थःत बियातःगु जिम्मा पूवंकेगु ज्या धाःसा वहे दकलय् तःधंगु योगदान जुइ। सभासद्त नेपालय् च्वनाः संविधान दयेकेगु ज्याय् गम्भीरतापूर्वक लगे जुइगु सिबें नं अनुभव कायेगु नामय् विदेश ब्वाँय् वनेगुपाखे अप्वः सक्रिय जुयाच्वंगुलिं नं वय्कःपिं वास्तवय् संविधान दयेकेगु ज्याय् धाथें गुलि गम्भीर धइगु खँ स्पष्ट जुइ। अध्यक्ष नेम्वांगं अज्याःगु फुक्क हे विदेश भ्रमणयात स्थगित यानाः सकलें सभासद्तय्त संविधान च्वज्यापाखे हे केन्द्रित याकादीगु च्वछायेबहः जू। तर विडम्बना छु धायेबलय् संविधानसभाय् दुपिं सकलें सभासद्त सक्रिय जूसां नं संविधान इलय् वइगु सम्भावना धाःसा अझ नं मदुनि, यदि फुक्कं पार्टीया नेतात सहमत मजूसा। सभासद्तय्सं नेम्वांगया आग्रह पालना याःसां नेता धाःपिंसं वय्कःया आग्रहयात गुलि तक मान्यता बीगु खः थें ?

More Stories Like this