स्वंगू दल स्वखे - गबले तयार जुइ संविधान?

संविधान निर्माणया नितिं स्वला जक ल्यं दनिगु इलय् स्वंगू तःधंगु दल स्वंगू जिल्लाय् फैलेजुयाः मुँज्या च्वनाच्वंगु दु । खय्त ला यलया सानेपाय् पार्टी ज्याकू दुगु कांग्रेसया मुँज्या स्थगित जूगु दु तर मुँज्या क्वचा:गु धाःसा मदुनि । अथेहे येँया बल्खुइ एमाले व ख्वपय् माओवादीया मुँज्या जुयाच्वंगु दु ।

छकलं स्वंगु दलया मुँज्या ब्यागलं ब्यागलं थासय् च्वंगु हे छगू संयोग जुइफु तर सल्लाह मखु ।

संयोग नं थुलि जक मखु मेगु नं दु । स्वंगु दल स्वखे मुँज्या च्वनेत ब्यस्त जूगु दु तर स्वंगुलिं दल आन्तरिक कचवंया चमम रुप काःगु दु । थ्वहे आन्तरिक कचवं ज्यंकेमफयेवं कांग्रेसया मुँज्या स्थगित जूगु दुसा सदाबहार कचवंया छेँ धयातःगु एमाले दुने झन कचवं मजुइगु खँ हे मन्त । दुने ला कचवं द हे दुगु जुल पिने नं उगु ज्याखँ खनेदत बिहीवाः बल्खुइ । शायद थुगु एरिया हे थज्यागु खःला । मखुसा सानेपाय् कांग्रेस दुने ब्वलंगु ल्वय् बल्खुया एमाले दुने नं छाय् सरेजुल ?

थ्व निगू ल्वापुखिचा पार्टी स्वयां तसकं तापाक्क ख्वपय् च्वंगु माओवादी मुँज्या नं कचवं मुक्त धाःसा जुइमफुत । कम्युनिष्ट उकिसनं माओवादी । गुलि कडा जुइ धैदिसँसा ? तर छु याये नः थें जाःगु अनुशासन व कडा गोपनियता हाजाँगाया पिहाँवःगु दु खबरत माओवादीइ एमालेकरण जुल धासें कार्यकर्तां कुँ खिन धकाः । छु थ्व चीधंगु कचवं खःला ?

पार्टीइ आन्तरिक कचवं झीगु सरोकारया बिषय मखु । तर थुगु कचवंखं संविधान दयेकेगु राष्ट्रिय अभियान व दलया लोकतन्त्रीकरणय् शंका ब्वलंगु दु । संविधान निर्माणया निंतिं स्वंला जक ल्यं दनि । अले दलत थःथःगु हे मुँज्याय् ब्यस्त । चाःन्हि संविधान दयेकेत खटेजूपिं चाहिं दलया असहमतिया हुनिं संविधान दयेकेगु प्रक्रियाय् एक इञ्च नं न्ह्याःवने मफुनि धकाः च्यूता कयाच्वंगु दु ।

धाथें धायेगु खःसा दलीय सहमतिया अभावय् संविधानसभां सहलह यानाच्वंगु प्रतिवेदनय् छ्याता नापं संवैधानिक समितियात छ्वये तकं मफुनि । गुकिं यानाः फागुन २१ गते तकया दुने एकीकृत मस्यौदा तयार मजुइगु पक्का जुइधुंकल । नापनापं थुकिं कार्यतालिकाय् तकं ह्यूपाः जुइगु जूगु दु । तर निकास बिइमाःगु दल धाःसा ल्वापुया पुचा पिनाच्वंगु दु । छु थुकथं हे संविधान तयार जुइला दलत थुकथं आरामनक्सा छुं हे गृहकार्य मयासें च्वनाच्वंगु नीछला बिइधुंकल । थुकिया दथुइ इमिसं तच्वयेक भाषण वाहेक मेगु छुं हे मयात । आः ला झन दकले तःधंगु दल माओवादी हे थःगु नेतृत्वय् सरकार बनेमजूतले संविधान हे बनेमजुइगु जकं धयाच्वंगु दु । नीछला ला संविधान दयेकेगु धकाः खँ जक ल्हाना फुकल । आः ल्यं खनिगु स्वलाया दुने छुं संविधान तयार जुइला ?

More Stories Like this