प्रकाशमानं राजीनामा बीगु !
येँ (सन्ध्या टाइम्स)/नेपाली कांग्रेसया उप सभापति प्रकाशमान सिंहं पार्टी एकता प्रक्रियायात कयाः ब्वलनाच्वंगु समस्या समाधान यायेगु निंतिं दयेकूगु समितिपाखें राजीनामा बीगु तयारी यानाच्वंगु दु ।
लिपांगु इलय् वयाः म्हिगः ओखलढुंगाया कार्यकर्तातलिसे पार्टी केन्द्रीय कार्यालय सानेपाय् ल्वापु जूगु नापं येँ जिल्लाया तरुण दलया कार्यकर्तातय्सं आन्दोलन यानाः महानगर समितिया अध्यक्ष रमेश महर्जन आमरण अनसन तक च्वंगु कारणं वय्कलं राजीनामा बीगु तकया मनस्थिति दयेकादीगु खँ कांग्रेसया छम्ह नेतां 'सन्ध्या टाइम्स'यात कनादीगु दु। संस्थापन पक्षया नेपाल तरुण दलया येँ जिल्लाया सभापति मय्जु जीवन डंगोलयात हे सभापति दयेकेमाः धइगु माग यासें वय्कः आमरण अनसन च्वनादीगु खः। उप समितिया कजि तकं जुयादीम्ह नेता सिंहं उगु उपसमितिपाखें राजीनामा बीगु जुल धकाः पार्टीया नेतातय्त धयादीगु खँ सीदुगु दु ।
पार्टी एकता यायेगु झ्वलय् थीथी जिल्लाया निगू पार्टीया निम्ह निम्ह सभापतित दुगु कारणं छम्ह छम्ह जक सभापति ल्ययेमाःगुलिं पार्टी दुने समस्या ब्वलंगु खः। पार्टी दुने ब्वलंगु उगु समस्यायात समाधान यायेगु भाला म्हिगःया केन्द्रीय समितिं आः पार्टीया केन्द्रीय पदाधिकारीतय्त बिउगु दुसा केन्द्रीय कमिटीया मुँज्या तकं अनिश्चित जुया बिउगु दु। म्हिगः केन्द्रीय ज्याकुथी जूगु ल्वापुइ अन च्वंगु मेच तकं स्यंक तोडफोड जूगु खः। थौं धाःसा सुं कार्यकर्ता वयाच्वंगु दु ।
