सिक्किमय् नेवाः कक्षा क्वचाल

[ मीना प्रधानपाखें ]

भारतया छगू प्रान्त सिक्किमय् वंगु लछि न्ह्यवंनिसें न्ह्याना वयाच्वंगु नेवाः भाषा, कला व संगीत सम्बन्धी तालिम आः नकतिनि छगू समारोहया दथुइ समापन यात। थनया देन्ताम नांगु थासय् उगु कक्षा जूगु खःसा समापन समारोह नं अन हे सम्पन्न जूगु खः ।

अखिल सिक्किम नेवार गुथि देन्तामया ग्वसालय् थुगु ज्याझ्वः जूगु खः। 'नेवाः भाषा व संस्कृति' धइगु शीर्षकय् वंगु डिसेम्बरंनिसें उगु कक्षा सञ्चालन जूगु खः ।

सिक्किम सरकारया खेलकुद तथा युवा मन्त्री एन.के. प्रधानं ध्वाँय् ब्वयेकुसें त्वाःदेवाय् मत च्याकाः उगु ज्याझ्वःया उलेज्या यानादीगु खः। ज्याझ्वलय् उगु लागाया सभासद् मय्जु चन्द्रा सुब्बा, पुलांम्ह मन्त्री दीपाल गुरुङ्ग, देन्ताम सिनियर स्कूलया प्रिन्सिपल पीपी शर्मा, नेपालं झाःम्ह पाहां नापं गुरु गणेशराम लाछिपिंसं नं मू पाहांकथं ब्वति कयादीगु खः ।

मन्त्री प्रधानं अन न्ववासें हरेक मांबौपिंसं थः मस्तय्त अनिवार्य रुपं स्कूलय् छ्वयेमाः धासें हरेक भाषा जातिया कला संस्कृति संवर्द्धन यायेत सिक्किम सरकार तत्पर दुगु खँ कनादिल। वय्कलं धयादिल, 'संगीतया छुं हे भाषा दइ मखु। तर संगीतं छगू भाषाया जनतायात छधी छप्पँ यायेत ग्वाहालि यानाच्वंगु दइ ।'

सभासद् सुब्बां नं सिक्किमया फुक्कं जाति व भाषाया म्हसीकायात राज्यं मान्यता बीगु ज्यायात लसकुस यानादिल ।

नेपालं झाःम्ह संस्कृतिविद् नापं मध्यपुर कला परिषद्या जः गणेशराम लाछिं सिक्किमया नेवाः जक मखु मेगु नं सकलें जाति दथुइ क्वातुगु मेल दु धयादिल ।

निला तक न्ह्याःगु उगु भाषा व संस्कृति सम्बन्धी कक्षाय् ४५ म्ह प्रशिक्षार्थीतय्सं ब्वति काःगु खः ।

उगु हे ज्याझ्वलय् मन्त्री प्रधानं नेपालं झाःपिं बाजं व भाषाया गुरुपिं गणेशराम लाछि, शर्मिला महर्जन, बालमुकुन्द प्रजापति व कुलरत्न मानन्धरयात हनापौ नं लःल्हाःगु खः।
समापन समारोहस अन काःगु कक्षाया विद्यार्थीतय्सं हे थीथी हुलाप्याखं न्ह्यब्वयेगु कथं छगू सांस्कृतिक ज्याझ्वः नं याःगु खः। उकी थीथी नेवाः हुलाप्याखंया ब्वज्या जूगु खः।
ज्याझ्वलय् सिक्किम जक मखु नेपालय् नं नेवाः भाय्, संस्कृति व संगीत म्वाका तयेगु लागिं योगदान बिउगु थीथी खलः पुचःयात सुभाय् बीगु ज्या नं जूगु खः ।