छाय् मजुयाच्वन कांग्रेसया महाधिवेशन ?

नेपाली कांग्रेसय् महाधिवेशनया तिथि क्वःछीगु खँयात कयाः जुयाच्वंगु विवाद अझं समाधान जुइ फयाच्वंगु मदुनि। बरु अझ तच्वया वनीगु खतरा पिहां वयाच्वंगु दु। महाधिवेशन यायेमाःगु ई त्ययेधुंकाः तक नं पार्टी नेतृत्वं उकिया मिति मबिउगुलिं थुकिया लिउने छु गज्याःगु षडयन्त्र सुलाच्वंगु दु थें धइगु आशंका नं पार्टी दुने जुयावःगु दु।
कांग्रेसया आः जुइगु महाधिवेशन ऐतिहासिक जुइगु खँय् शंका मदु। छाय्धाःसां थ्व महाधिवेशनं कांग्रेसयात नेतृत्वया ल्याखं जक मखु वैचारिक, सैद्धान्तिक व सांगठनिक ल्याखं नं न्हूधाः यायेत्यंगु दु। न्हूगु नेपाःयात ल्वःगु पार्टी दयेकेगु खःसा कांग्रेसया थ्व पुनर्संरचना आवश्यक नं खः। तर थज्याःगु न्हूगु लँपुइ यंकीगु ऐतिहासिक महाधिवेशन याकेगु ज्याय् तकं छाय् थथे पंगः थनाच्वंगु खः, व धाःसा अजूचायापुगु खँ जुयाच्वंगु दु। कांग्रेसयात थुकथं मुक्कं न्हूगु याये चाहे मजूपिंसं थथे पनाच्वंगु जुइफु। उलि जक मखु, कांग्रेसया नेतृत्व अझ नं छगू परिवारं पित मछ्वयेगु षडयन्त्र कथं नं थ्व विलम्ब यानाच्वंगु खयेफु। वर्तमान सभापति गिरिजाप्रसाद कोइरालां थः धुंकाःया कांग्रेस नेतृत्व थः हे म्ह्याय्या ल्हातय् त्वःता थकेगु म्हगस खंकाच्वंगु जुइफु। तर थः म्ह्याय्यात कांग्रेस सभापति दयेकेगु वातावरण धाःसा थीथी कारणं यानाः अझ नं तयार जुइ फयाच्वंगु मदुनि। सम्भवतः वय्कः उगु वातावरण निर्माणया अवसरय् दी। अज्याःगु वातावरण वल धइगु खँय् थः ढुक्क मजूतले वय्कलं महाधिवेशन याके मबीगु हे खनेदु। कांग्रेस महाधिवेशन जुइ मफयाच्वंगुया मू रहस्य सखे थन हे सुलाच्वंगु दु ।

More Stories Like this