सेना समायोजनय् माओवादीया अनिच्छा

इलय् जुइत्यंगु सेना समायोजनया ज्यायात राजनीतिक पार्टीतय्सं म्वाः मदुगु खँ ल्हानाः अलमल याना बीवं आः माओवादी थम्हं हे सेना समायोजनया ज्याय् व्यवधान खडा याना बिउगु दु। उकुन्हु तक सेना समायोजन याये सिधयेवं न्हूगु संविधान निर्माणया ज्या न्ह्याकेगु खः धयाच्वंपिं माओवादी नेतातय्सं आः देशय् विद्यमान राजनीतिक गतिरोध अन्त्य मयायेकं सेना समायोजन यायेगु पाय्छि जुइ मखु धयाहःगु दु। अझ गुलिखे माओवादी नेतातय्सं ला न्हूगु संविधान जारी मयाःतलय् सेना समायोजन याये मजिउ तकं धयाहःगु दु। राजनीतिक गतिरोध अन्त्य मजुइकं सेना समायोजन याये मखु धायेगु वा संविधान जारी मजूतले सेना समायोजन याये मखु धायेगु धइगु वास्तवय् थ्व ज्यायात आः सेना न्ह्यःने तयाः ख्यानाः जूसां याकेगु ग्वसाःया रुपय् कायेफु। लिसें वर्तमान राज्यसत्तां संविधान हयेगु ज्याय् पंगः थनेफु व राज्य सञ्चालनय् वयाच्वंगु गतिरोध चीकेगु ज्याय् छुं हे भूमिका मम्हितेफु धइगु आशंका यानाः हे माओवादीपाखें थज्याःगु तयारी याःगु जुइफु। यदि उकथंया षडयन्त्रपूर्ण ज्या जुल धाःसा हानं थःपिनि सेना छ्यले मालेफु धकाः हे माओवादीं सेना समायोजनया ज्या लिपा जक याःसां जिउ धयाहःगु जुइमाः। तर माओवादीं धयाहःगु थज्याःगु खं यानाः माओवादी प्रति मेमेगु राजनीतिक पार्टीत धाःसा सशंकित जुया वःगु दु स्वाभाविक नं खः। थुकिं माओवादीया बन्दुके मानसिकतायात हानं छक्वः उजागर लाना बिउगु ला द हे दु, लिसें माओवादीयात बन्दुक त्वःतकाः मूलधारय् हयेत थनया पार्टीत अझ नं तयार मदुनि धइगु खँ नं थुकिं क्यना बिउगु दु ।

More Stories Like this