बरफ मिमिउँ, चित्र च्वच्वं

कृष्ण

हरिशरण खानिबञ्जारयात ख्वपय् बरफ मीम्ह मनू कथं सकसिनं म्हसिउ। अथे खःसां वयात पूवंक म्हसिउपिं धाःसा म्हो हे जक दइ। ख्वपय् २०३२ सालंनिसें आः तकं वय्कलं थीथी थासय् वनाः बरफ मीगु ज्या निरन्तर याना हे वयाच्वंगु दनि। थौंकन्हय् बैशं न्यय्दँ क्यने धुंकल। अथे खःसां झिंच्यादँ तिनि दुम्ह ल्याय्म्हया थें फुर्ति वय्कःया ज्याय् दु। ज्या नं उलि हे मतापं यानाच्वनी। वय्कः झिंखुदँ दुबलय्निसें थथे बरफ मीगु ज्या याना च्वनादीगु खः। सिन्का बरफ मीगु ज्याय् जक वय्कलं झिंगुदँ बैश फुकादिल। च्याम्हसिंहया बागीश्वरी उच्च माविया न्ह्यःने लँय् च्वनाः बरफ मियाच्वनीगु इलय् अन आखः ब्वं वइपिं मस्तय्त बरफ मीगु बाहेक अन हे च्वनाः धाःम्हेसित धाःधाःगु चित्र च्वयाः बिया छ्वयेगु नं वय्कःया मेगु विशेषता खः। उकिं मस्त वय्कःयाथाय् बरफ नयेगुया नापं चित्र च्वकेत नं लालायित जुयाः वयेगु याः। चित्र च्वयेगु वय्कःया मेगु विशिष्ट प्रतिभा खः ।

न्हापा वय्कलं सुकुलध्वाखा साक्वथाय् च्वंपिं तम्वःतय्थाय् च्वंगु बरफ मीगु शुरु यानादीगु खः। लिपा २०४६ साल आन्दोलनय् गोलीं कयाः मदुम्ह सहिद निर्मलकुमार शाक्यया मां अबुपिंसं चले याःगु बरफ कारखानाया बरफ मीगु यानादिल। अथेहे क्वःने मरिकःमिपिंथाय् नं वय्कलं ज्या यानादिल। अबलय् न्यागः झिगः वंगु बरफ मियाः न्हिं झितका ति आम्दानी जुइगु खः। २०३२/३३ साल तक ज्यामि ज्याला नं मिजंतय् च्यातका व मिस्तय् न्यातका जक खः। अज्याःगु इलय् न्हिं झितका आम्दानी जूसा नयेत
गाः। २०३७ सालं जगतबहादुर मानन्धरयाथाय् ज्या यानादीम्ह वय्कः लिपा ६ वडा पलिखेलय् च्वंम्ह न्हुछेराज शाक्यया छेँय् च्वंगु बरफ कारखानाया बरफ मीगु ज्याय् लगे जुयादीगु खः ।

बोलाछेँ बःननीइ च्वंम्ह गुरुजु मणिराज बज्राचार्यया बरफ कारखानां नं दच्छि दत्या तक बरफ यंका मीगु यानादिल। वयां लिपा इच्छु छेँय् च्वंम्ह बीरेन्द्र हाडाया पसलं सिन्का बरफ व थर्मसय् तयाः खुवा बरफ मीगु शुरु यानादिल। नापं तापालाछिइ च्वंम्ह हरिशरण मानन्धरयाथाय् च्वंगु बरफ नं मीगु यानादिल। ख्वपय् वय्कःयात बरफ मीकेगु लागिं जूगु तानातानं कायल जुयाः आखिर वय्कलं ख्वपय् च्वंगु बरफ मीगु ज्या हे त्वःता बिल। उकिया पलेसा थिमिया राधाकृष्ण थापाश्रेष्ठया बरफ कारखानां बरफ हयाः मीगु यानादिल। २०४९ निसें २०५४ साल तक वय्कलं गोल्मढी व तचपालय् बरफ मियादिलसा अनंलि सानुकान्छा साहुं बरफ कारखाना तयेवं आः तक अनयागु हे बरफ मीगु यानाच्वंगु दनि।
वय्कःया बरफ मीगु नं थःगु हे शैली दु। सुनां वय्कःया बरफ नइ व एसएलसी पास जुइ धाधां बरफ मियादी। धाथें वय्कःया बरफ नयाः एसएलसी पास याःपिं विद्यार्थीत थौं डाक्टर, इन्जिनीयर, पत्रकार व थीथी लागाया विशिष्ट व्यक्ति जुइधुंकल। तर वय्कःया बरफ मीगु लागा धाःसा ख्वपं तचाः जुयाः थौंकन्हय् लौहकिन्थली, कौशलटार, सानोथिमि, बोडे, निलबाराही व चपाचो तक बिस्तार यानादीगु दु ।

अबु गणेशमान खानिबञ्जार व मां दिलमाया खानिबञ्जारया माहिलाम्ह काय हरिशरण खानिबञ्जरया दाजु रामशरण खानिबञ्जार कलाकार नापं समाज सुधार इन्ष्टिच्यूत निमावि तकया प्रधानाध्यापक नं खः। वय्कःया निम्ह किजापिं कृष्णशरण व शिवशरण धाःसा बरफ मीगु पसः तयाः हे थःगु लजगाः न्ह्याकाच्वंगु दु। रात्रि मावि खौमाय् ५ कक्षाय् ब्वनाच्वँच्वं लय् खुतका दां पुले मफयाः वय्कः बरफ मीगु ज्याय् संलग्न जुयादीगु खः। लिपा बरफ मियाः ध्यबा दयेवं नवरात्री माविया ८ कक्षाय् छक्वः भर्ना जुयादिल। लिपा तीर्थलक्ष्मीनाप इहिपाः यायेधुंकाः आः काय आशिस व म्ह्याय् अस्मिता नापं वय्कः बरफ मीगु लजगालं हे मस्तय्त आखः ब्वंकाः जीवन निर्वाह यानाच्वनादीगु दु ।

थिमिइ बरफ मीगु ज्याय् संलग्न जुइधुंकाः न्ह्याथाय् वंसां बस मगसे न्यासि हे वनेगु यानादीम्ह वय्कलं बरफ मीगु ज्या याये न्ह्यः पाकेट दुरु मवःगु इलय् गामं दुरु हयाः मीगु ज्या यानादीगु खः ।

More Stories Like this