माओवादीपाखें विद्रोहया तयारी
थनिंनिसें कार्यकर्तायात विद्रोह सम्बन्धी विशेष प्रशिक्षण
येँ (सन्ध्या टाइम्स)/एनेकपा (माओवादी)या न्याद्वः कार्यकर्तायात विद्रोहया नितिं तयार जुइत थनिंनिसें प्रशिक्षण न्ह्याकूगु खँ सीदुगु दु। ख्वपया खरिपाटीइ थौं न्हिनंनिसें केन्द्रीय प्रशिक्षण धकाः माओवादी राज्य समितिया दुजःतय्त उगु प्रशिक्षण बिउगु खः। उकी माओवादी अध्यक्ष प्रचण्ड, वरिष्ठ नेतात मोहन वैद्य, डा. बाबुराम भट्टराई नापं मेमेपिंसं प्रशिक्षण बीगु ग्वसाः दु।
पार्टीं न्ह्याकाच्वंगु जन आन्दोलनयात आः जनविद्रोहया रुप बिया यंकेमाःगु वातावरण सिर्जना जुजुं वनाच्वंगु दु धइगु विश्लेषण यासें माओवादीं उकिया हे तयारी कथं थज्याःगु प्रशिक्षण शुरु याःगु खँ छम्ह केन्द्रीय नेतां 'सन्ध्या टाइम्स'यात कनादिल ।
माओवादीं न्ह्याकूगु आन्दोलनया झ्वलय् आः न्यागूगु चरणया जन आन्दोलन जुयाच्वंगु दु। थ्व इलय् संविधान व शान्तियात मू एजेण्डाया रुपय् हःगु खः। माओवादीं न्हापांगु चरणया आन्दोलनय् नागरिक सर्वोच्चतायात मू एजेण्डा दयेकूगु खःसा अनं लिपा राष्ट्रिय स्वाधीनतायात मू एजेण्डा दयेकूगु खः। माओवादीं विद्रोहया निंतिं धकाः तयार याःगु न्यागू एजेण्डा मध्ये आः स्वंगूगु व प्यंगूगु थासय् लानाच्वंगु शान्ति व संविधानयात न्हापांगु एजेण्डा दयेका हःगु दु। अनं लिपा राष्ट्रिय संयुक्त सरकारया एजेण्डा दु। शान्ति व संविधानया एजेण्डा कथं चैत्र २४ गते तक थीथी कथंया अभियान न्ह्याकाः आन्तरिक तयारी क्वातुकी धाःगु दु। अनं लिपाया जनआन्दोलन धाःसा विद्रोहया रुपय् वनीगु खँ नेतातय्सं धाःगु दु। आः शुरु जूगु प्रशिक्षणय् नं थ्वहे खँ ध्वाथुइकेगु ज्या जुइगु खँ नं धाःगु दु ।
थौं अध्यक्ष प्रचण्डं उलेज्याझ्वःया न्वचु तयादीधुंकाः राज्य समितिया इन्चार्ज व जवस मोर्चाया नायःतय्सं थःथःगु रिपोर्टिङ न्ह्यब्वयेगु ज्या जुइ ।
थ्वहे झ्वलय् माओवादीया केन्द्रीय कमिटी, स्थायी समिति नापं पोलिटब्यूरो नं विस्तार याइगु जूगु दु। थौंकन्हय् माओवादीया केन्द्रीय कमिटीइ १४० म्ह दुजः दुसा आः उकियात विस्तार यानाः १७५ स्वयां अप्वः थ्यंकीगु खँ धाःगु दु। केन्द्रीय कमिटी विस्तार जुइधुंकाः पार्टीया स्थायी समिति व पोलिटब्यूरो नं स्वतः विस्तार जुइगु जानकारी माओवादी नेतां बियादीगु दु ।
