थनिंनिसें एकिकृत माओवादी

निगुलिं पार्टीया कार्यकर्ता सन्तुष्ट मदु

ताःई न्ह्यः निसें जुयाच्वंगु कुतः लिपा नेकपा माओवादी व एकता केन्द्र मशाल एकीकरणया सार्वजनिक घोषणा थौं यायेत्यंगु दु । थौं सनिलया १ बजे येँया खुलामाचय् छगू सभा यासें थ्व एकीकरण घोषणा यायेत्यंगु खः ।

न्हूगु पार्टीया नां 'एकीकृत नेकपा (माओवादी)' धकाः तयेत्यंगु दुसा उकिया अध्यक्ष पुष्पकमल दाहाल प्रचण्ड हे जुयादी । एकीकरणया लागिं माओवादीं प्रचण्डपथ धइगु लाइनयात त्वःतूगु कारणं माओवादी कार्यकर्तात रुष्ट जुयाच्वंगु दुसा पार्टीया नांयात कयाः एकता केन्द्रया कार्यकर्तात रुष्ट जुयाच्वंगु दु । थ्व नामं थःगु पार्टी माओवादी दुने एकिकृत जूवंगु थें आभास बिउगु खँ उमिसं धयाच्वंगु दु । न्हूगु पार्टीइ माओवादीया १०१ व एकता केन्द्रया ३६ म्ह यानाः १३७ म्ह दुजः दुगु केन्द्रीय समिति नीस्वनी ।

पार्टी एकीकरण जूसां २०४८ सालय् थ्व निगू पार्टी गुगु कारणं विभाजित जूगु खः व फुक्क कारणत धाःसा कायम हे जुयाच्वंगु दनि । अबलय् थ्व निगू पार्टी खास यानाः जनयुद्ध, प्रचण्डपथ व माओवाद धायेगु कि माओ विचारधारा धायेगु धइगु विवादं यानाः विभाजित जूगु खः । आः एकीकरण जूबलय् नं थ्व स्वंगुलिं विवाद यथावत् हे दनि । वाम बुद्धिजीवी श्याम श्रेष्ठं थ्व एकीकरणयात कयाः टिप्पणी यानादीगु दु 'थ्व ला निगः छ्यों गथे खः अथे हे तयाः आंग्सा जक चिना बिउ थें च्वनाच्वंगु दु ।'

आः गठन याइगु केन्द्रीय समिति दुने माओवादीया बहुमत दइगु स्वाभाविक खः । तर अथे धकाः बहुमतया बलं पूर्व एकता केन्द्रवालातय् छुं हे सुझाव ग्रहण मयात धाःसा पार्टी हानं विभाजित जुइफुगु खतरा नं वय्कलं व्यक्त यानादीगु दु ।

माओवादीया प्रचण्डपथ आःयात 'ड्रप' याःसां थुकिया बारे महाधिवेशनं निर्णय यायेगु सहमित जूगु दु । महाधिवेशनय् छुं जुयाः बहुमतया बलं थ्व लाइन हानं पारित यायेत स्वत धाःसा पार्टी एकता खतराय् लाइगु वय्कःया बिचाः दु । वय्कलं धयादिल 'आः त्वःतूसां प्रचण्डपथ लिपा हानं वयेफु ।'

थौं एकता सभा न्ह्यः थीथी थासं जुलुस पिकयाः खुलामाचय् मुनीगु ग्वसाः दु ।