इलाम बजारय् तःधंगु मि

करोडौंया क्षति, झिखा छेँ ध्वस्त, प्यखा छेँ थुना छ्वत

येँ (सन्ध्या टाइम्स)/इलाम बजारय् वंगु चान्हंनिसें थौं सुथय् तकं तःधंगु मिं नयाः करोडौं तकाया धनमाल नष्ट जूगु दु।
इलामया निकुन्जपथ लागाय् च्वंम्ह स्थानीयवासी ईश्वर चितालुया छेँय् दकलय् न्हापां मिं नःगु खःसा वयां लिपा वहे मिं लिक्कसं च्वंगु जःलाखःलाया झिखा छेँय् नं थिउ वनेवं फुक्क हे छेँ ध्वस्त जुइक च्याःगु खः ।

ईश्वर चितालुया छेँय् विद्युत सर्ट जुयाः मि च्याना वःगु अनुमान याःगु दु। छक्वलं ह्वानाक्क च्याना वःगु उगु मियात इलय् हे स्याये मफयाः जःखः च्वंगु झिखा छेँ नं बांमलाक च्याःगु खः। म्हिगः बहनी १० बजेनिसें च्याःगु उगु मि थौं सुथय् ४ बजे तिनि नियन्त्रणय् कायेत ताःलाःगु खँ धाःगु दु।
तच्वकं मि च्याःगु कारणं स्थानीय दमकल, स्थानीय जनता नापं अनया प्रहरी, सेनां मि स्याये मफुगु खः। उकिं मि स्यायेत झापा व सुनसरीया दमकल लगायत अन च्वंपिं नेपाली सेना, सशस्त्र प्रहरी, जनपद प्रहरी समेत वयाः मि स्यायेत ग्वाहालि याः वःगु खः। मि अझ यक्व थासय् न्यना मवनेमा धकाः जःलाखःलाया प्यखा छेँ थुना छ्वःगु खः।

बाँकेय् सर्च अप्रेसन तीब्र

येँ (सन्ध्या टाइम्स)/लिपांगु इलय् वयाः हत्या व अपहरणया घटना झन झन तच्वया वनाच्वंगु कारणं स्थानीय प्रहरीं बाँके जिल्लाय् सर्च अप्रेसन तीब्र रुपं न्ह्याकूगु दु ।

छुं दिं न्ह्यः जक अन निम्ह नेवाःत सीतापुर गाविसया सचिव ईन्द्रबहादुर श्रेष्ठ व व्यवसायी प्रकाश श्रेष्ठयात म्हमसिउपिं मनूतय्सं आक्रमण यानाः स्याना बिउगु नापं अनया समाजसेवी कुमार कक्षपतियात नं स्यायेगु धकाः ख्याच्वः वयेवं बाँकेया प्रहरीं उज्वःपिं अपराधीत मालेगु नितिं थाय्थासय् सर्च अप्रेसन अभियान तकं तीब्र रुपं न्ह्याकेगु ज्या याःगु खः ।

सर्चया झ्वलय् अनया ईन्द्रपुर लागां अत्याधुनिक ल्वाभः नापं स्वम्हेसित ज्वंगु खदु। थौं छगू पत्रकार सम्मेलन यानाः प्रहरीं आपराधिक ज्याय् संलग्न जूपिन्त सार्वजनिक याइ धाःगु दु ।