नेपाली नेतातय् भारत मोह

कृष्ण प्रजापति

फै फैचालिसे च्वले च्वलेचालिसे धइगु नेपाली उखान नेपाली राजनीतिइ नं पाय्छि खने दयावःगु दु। म्हिगः तक थःपिं राष्ट्रभक्त, देशभक्त व राष्ट्रिय मामिलाय् क्वातुपिं धयाच्वंपिं नेतात थौं छम्ह छम्ह यानाः भारतपरस्त, देशघाती र स्वार्थी सिद्ध जुजुं वनाच्वंगु दु। थुलि तक कि देशया राष्ट्रपतिं तकं थौं भारतं निमन्त्रणा जक यायेवं हथाय् पथासं उखे वनाः थः मालिक न्ह्यःने क्वछुइगु पुलांगु नेपाली संस्कारयात सार्थकता बिउगु दु। नेपालय् जलविद्युत मिउगु खँय् थीथी कथं भारतया जनतां विरोध प्रदर्शन यानाच्वंगु इलय् हे नेपाःया राष्ट्रपतिया भारत भ्रमण जुयाच्वंगु दु। नेपाःया नेतात भारत वनीगु इलय् न्ह्याब्लें हे नेपाःया छु सम्पत्ति लःल्हाना थकीगु खः धकाः ग्याःचिकु जुयाच्वनी ।

नेपाः ताः ई न्ह्यवंनिसें हे भारतपाखें अपहेलित जुयाच्वंगु राष्ट्र खः। थनया नेतात अप्वः धइथें भारतीय राजनीतिपाखें प्रशिक्षित व भारतीय भूमिइ हे निर्वासित जुयाः राष्ट्रिय राजनीतिइ वःपिं जुयाः न्ह्याब्लें हे धइथें भारतं धाःथे च्वनेगु परिपाटी विकास जुजुं वल। छगू इलय् ला भारतया प्रतिनिधि तकं नेपाःया सार्वभौम सदनय् प्रत्यक्ष उपस्थित जुयाः निर्णायक मत तयेगु चलन दुगु खः। लिपा जुजु महेन्द्रं उकियात मदयेका बिल। त्रिभुवन जुजु सपरिवार भारतय् निर्वासित जीवन हनेत वंगु, बीपी, गणेशमानपिं भारतय् हे बिसिउँ कारणं नं थ्व प्रभाव लानाच्वंगु जुइफु। गिरिजा, मातृका थेंज्याःपिं प्रधानमन्त्रीया पालय् भारतलिसे जूगु थीथी सन्धि सम्झौतां नं नेपाःया स्रात साधनया उपयोग भारतं हे अप्वः याये खनीगु खँयात ध्यानय् तयाः स्वयेगु खःसा झी नेतात न्हापांनिसें हे भारतपरस्त जुया वःगु सीदु।
गणतान्त्रिक शासन लागू जुयाःलि नं अज्याःगु संस्कारयात झीसं चीके मफुगु धइगु झीगु देशया तःधंगु हे कमजोरी खः। खय्त ला गणतन्त्र वयेधुंकाः देशया प्रधानमन्त्री तकं जुइधुंकूम्ह माओवादी अध्यक्ष प्रचण्डं सन् सुगौली सन्धि जूगु थाय् सिन्धुलीगढी वनाः आः भारतलिसे जूगु फुक्कं असमान सन्धित खारेज यायेगु व न्हूगु हे ढंगं सन्धि सम्झौता यायेगु धकाः घोषणा यानादीगु दु। नापं सन् १९५० या सन्धि अमान्य खः, उकियात नेपालं माने यायेत बाध्य मदु धकाः नं धयादिल। तर थःपिं सरकारय् दुगु इलय् धाःसा अज्याःगु सन्धि सम्झौता खारेज मयाःगु जक मखु कि खारेज यायेगु छुं कथं कुतः तकं जूगु खने मदु। अथे जुयाः नं खँ छता ज्या मेता याइपिं झी नेतातय्त विश्वास यायेगु थाय् झन झन गौण जुजुं वनाच्वंगु खः ।

गुम्हेसित नेपाली जनतां विश्वास याइ, उमिसं हे नेपाली जनतायात धोका बिया वयाच्वंगु दु। भारतपरस्त जुयाः शासन चले यायेमाःगु कारणं वा भारतया आशिर्वाद मदयेकं थ्व देशया शासन सत्ताय् ताः ई टिके जुइ मफइगु कारणं बरु नेपाली जनतायात धोका बियाः जिं सन्धि याना वयागु मदु सम्झौता जक याना वयागु खः धकाः सार्वभौम सदनयात हे दँदँ तक गुमराय् तयातल। तर भारत तंचाइ, भारतयात मछिनी धकाः बरु थःगु पुतला च्याकूगु तुलुतुलु स्वयाच्वन। गिरिजाप्रसाद कोइरालाया उगु चरित्र आः वयाः नेपाली कांग्रेसया नेता डा. रामबरण यादव गणतन्त्र नेपाःया न्हापांम्ह राष्ट्रपति जुयाः जक क्यनाच्वंगु मदु, थीथी राजनीतिक पार्टीया नेतातय्सं नं थःपिं झिदँ तक भारतय् निर्वासनय् च्वंच्वनापिं, जिलाजं थें लहिनातःपिं वा थीथी खँया गुण लुमंकाः भारतपरस्त हे जुयाच्वंगु दनि।
नेतातय्गु थज्याःगु भारतमोहयात अन्त्य यायेगु निंतिं धाःसा झीगु देशय् आः थें मेपिंसं धाःथे मौन च्वनेगु परिपाटीयात त्वःताः राष्ट्रिय स्वाधीनताया आन्दोलनयात म्हिगः थें हे निरन्तर कायम याना हे तये फयेकेमाः। थज्याःगु ज्याय् छगू निगू राजनीतिक पार्टी जक मखु तमाम नेपाली जनताया साथ काये फयेकेमाः। झीगु देशया चिचीधंगु राजनीतिक घटक व वर्गीय संगठनया प्रतिनिधित्व यानाः सिमा लागाय् वनीगु इलय् नं भारतं तसकं संवेदनशील रुपं स्वयेगु याः। अखिलया प्रतिनिधि मण्डल लक्ष्मणपुर बाँध स्वःवंगु इलय् भारतीय सीमा लागाय् मेसीनगन सहितया सशस्त्र सेनाया टोली नेपाःपाखे हतियार स्वकाः सतर्क अवस्थाय् तयातःगु खः। अथेहे नेपाःया राजधानीइ जक छुं छगू भारत विरोधी जुलुस प्रदर्शन जूसां उकियात भारतीय राजदूतावासं तसकं हे संवेदनशील रुपं कायेगु याइ। छुं छगू घटना जुइवं दूतावासं प्रेस विज्ञप्ति पिथनाः प्रतिक्रिया बीधुंकी। आः अज्याःगु परिपाटीयात नेपाः सरकार व थनया राजनेतातय्सं नं सयेकेमाःगु दु। झीगु देश चीधं जूसां सार्वभौमिकता धइगु चीज उलि हे तःधं धइगु शिक्षा सकसितं स्यनेमाः ।

देश न्हूगु संविधान दयेकेगु ज्याय् प्रत्यक्ष रुपं न्ह्यज्याये धुंकूगु थ्व इलय् राष्ट्रिय स्वाधीनता व राष्ट्रिय एकतायात क्वातुका तये मफुत धाःसा देश झन झन कमजोर जुयाः थ्व देश कन्हय् वनाः हानं पराधीन जूवनीगु खतरा उलि हे दयाच्वनी। बुद्धया जन्मभूमि, शान्तिया अग्रदूत धयातःगु देशय् नं थःगु स्वाधीनताया लागिं हे निरन्तर रुपं द्वन्द्व कायम जुयाच्वन धाःसा थ्व देशया विकास जुइ फइ मखु। अथे जुयाः नं आः हे न्हूगु संविधानय् समान हक अधिकार स्थापित जुइकथं निगू देशया दथुइ सन्धि सम्झौता यायेगु स्वयेमाः। गुलि नं असमान सन्धि सम्झौतात दु, उकियात खारेज यायेगु पहल यायेमाः। निरन्तर रुपं थःगु देशया चिन्ता याइपिं राजनेतातय्सं थः कार्यकर्तातय्त भारतलिसेया सीमा, भारतीय पक्षं यानाच्वंगु सीमा अतिक्रमण, हस्तक्षेप व थीथी दवाबया बारे ध्वाथुइकेगु याना तयेमाः। अथेहे नेपाली पाठ्यक्रमय् थःगु देशया राष्ट्रियता, स्वाधीनता व राष्ट्रिय एकताया पक्षय् सः थ्वयेकाच्वनेगु परिपाटी नं विकास जुइमाः। नेतातय् भारतपरस्त नीति हिलेगु निंतिं तमाम नेपाली जनता हे सचेत व संगठित जुयाः उमिगु भ्रष्ट मतियात हिलेगु स्वयेमाः। अले हे जक धाथेंया स्वाधीन व गणतन्त्र नेपाःया सच्चागु लिच्वः पिहां वःगु झीसं वाःचायेकेफइ। मखुत धाःसा जुजुया थासय् राष्ट्रपति वःसां थ्व देशय् 'वल वल फसिक्वाः' धाःथेंज्याःगु धापू सत्य साबित जुइ। राष्ट्रपति डा. रामबरण यादवया भारत भ्रमण लिपा थज्याःगु हे समानता व न्यायया सासः ल्हाये खनी धकाः झीसं कामना याये ।

More Stories Like this