चाबही दुवाःया यातायात अस्तव्यस्तता

येँया चाबही लागाय् धुवांधू जुयाच्वंगु सवारी दुर्घटनाया कारणं तःक्वःमछि तनाव ब्वलनेधुंकूगु दुसा म्हीग नं अज्याःगु छगू दुर्घटना जुयाः मनू सीगु थ्यंकया घटना जुलसा उकियात कयाः स्थानीय जनतां आः तकं विरोध प्रदर्शन यानाच्वंगु दनि। उगु लागाय् खास यानाः रिंगरोड चाःहिलाः चले जुइगु स्वयम्भु यातायातया गाडीपाखें तःक्वःमछि मनूया ज्यान हे वनी कथं दुर्घटना यायेधुंकूगु दुसा आः स्थानीय मनूतय्सं उगु यातायातया गाडीयात हे प्रतिबन्ध तयेमाः धकाः माग याना हःगु दु ।

खतुं छगू हे जक यातायातया गाडीं तःक्वःमछि मनू क्ययेकाच्वंगु कारणं सम्बन्धित यातायातया लापर्वाही थुकी मदुगु मखु। तर उगु यातायातयात प्रतिबन्ध तयेवं जक थ्व समस्या समाधान जुइगु धाःसा मखु। छगू यातायात सेवायात प्रतिबन्ध तःसा उकिया सञ्चालकं मेगु यातायात चायेकी, उकिया चालक मजदूरत मेगु यातायातय् वनाः ज्या याइ। उकिं मुख्य खँ नीति व व्यवस्थापन सुधार जुइमाः। चाबही लागा न्हापा न्हापा नं आपालं दुर्घटना जुइधुंकूगु थाय् खः। उगु दुवाःयात सुधार यायेगु लागिं आः तक छुं हे ठोस कुतः जूगु खने मदु। उगु थाय्या लागिं सवारी चले यायेगु बिस्कं हे नीति दयेकाः लागू याःसा आः थथेंया लागिं समस्या समाधान जुइफु। नीति नाला मकाइपिंत कडा कारवाही याःसा व्यवसायीत नं सतर्क जुइ। यदि व्यवस्थापन छ्वासुल धाःसा लँ तबाला यानाः जक नं समस्या ज्यनी मखु। समस्या चाबही दुवाः जक मखु, मेमेगु नं आपालं थासय् दु। ठोस नीति व चुस्त व्यवस्थापनं जक उकियात सुधार याये फइगु खँ ल्वःमंके मजिउ ।

More Stories Like this