थुमित म्हसीके अःपु मजू

नर्मदेश्वर प्रधान

मंगलवाः वइ। च्वसु तयार यायेमाल। आदित्यवाःपाखेर हे जिगु ल्हाः चासुइ। छु च्वये? विषय ल्यये? क्वःछी। टावा देछुइ ।

क्वाके। विषय छु खः। ।झ्वाँय् याये। ह्वाये। च्वसु च्वयेगु थ्व जिगु लेखन प्रक्रिया जुइ। थुगु मंगलवाःया लागि तयार यानागु पकवान। न्ह्यःने तयाच्वना। पाख वं मवं। चि गाः मगाः। कचि तिनि ला। क्वल ला। न्यालु ला। पालु ला। भपियाः स्वयादिसँ। मसाःसां मिखा तिस्सिनाः घुर्का छ्वयादिसँ। इनाप दु ।

थौंकन्हय् मनूत धर्म, राजनीति विषय तसकं हे संवेदनशील। सुं मनू नापलाइ। व छु विचारधारायाम्ह मनू खः? गुगु खेमाय् लाः? मेम्हेसिया गहन चिउताः जुइ। सुनां नं खँ ल्हाइ। व हिन्दू अनुयायी खः ला? बुद्धमार्गी खः ला? मेम्हेस्यां होश यानाच्वनी। पहचह, खँल्हाबल्हाया विश्लेषण याइ। थःगु न्ह्यसःतय् लिसः मालेत कुतः यानाच्वनी
।
छम्हं मेम्हेसित म्हसीकेगु बांलाःगु खँ खः। आवश्यक नं जुइ। पारस्परिक सम्मानया लागिं छम्हं मेम्हेसिया विचार, दर्शनया पहिचान यायेमाः। याये फयेकेमाः। सयेकेमाः। पारस्परिक समझदारीं हे थःथः दथुइ सद्भावना ब्वलनी। राजनीतिक दर्शन जुइबिउ वा धार्मिक दर्शन। मूलभूत कथं इमिसं मानव हित, कल्याण नाली। नालेमाः। मानवया अहित, अकल्याणपाखेर न्ह्याइगु गुगुं राजनीतिक, धार्मिक दर्शन स्वीकार्य जुइ मखु। व सुनावनी। तनावनी। फुनावनी।
विश्वय् अनेक धर्मत दु। धर्म, अधर्मया खँग्वः सकस्यां छ्यली। धर्मया अर्थ हित खः। अधर्मया अर्थ अहित खः। मूलभूत अर्थ जुइ थुपिं सम्पूर्ण धर्मय्। तर व्यवहारय् हरेक धर्मयात थःथःगु संकीर्ण अहम् दयेकी। थःथःगु धर्म हितकारी खंकी। कर्किया धर्म अहितकारी। धार्मिक साम्राज्य न्यंकेत स्वइ। धर्मतय् दथुइ धार्मिक वैरीभाव लुइ। प्रतिस्पर्धा खने दइ। धार्मिक शीतयुद्धया वातावरण लुइ। मूलभूत धार्मिक सन्देश छखे लाइ। धर्म अनेक कथंया स्वार्थया न्ह्यवःसा जुइ। धाये निम्ह मनू दथुइ जग्गा क्वत्यलाः काःगु विषयय् ल्वापु जुइ। ल्वापु इमि निजी, व्यक्तिगत स्तरय् जुइ। ल्वापुइ संलग्न मनूत निगू धर्मयापिं जुइ। व्यक्तिगत ल्वापुं धार्मिक रङ्ग काइ। धार्मिक आस्थाया दुरुपयोग याइ। थःगु निजात्मक स्वार्थय् धर्मयात छ्यली। शक्ति प्रदर्शन याइ। धार्मिक द्वन्द्व सृजना याइ। अनेक क्षति जुइ। धार्मिक सद्भावना क्षतविक्षत जुइ। इतिहासय् महत्वाकांक्षी शासकत ल्वाइ। धर्मयात थःथःगु स्वार्थया निंतिं अधिकतम छ्यली। धर्मयात मनूतय् कमजोरी खंकी। थःगु पक्षय् शोषण याइ। धर्म दर्शनया नामय् व्यवहार, ल्वापु जुइ। मनोमालिन्य खनेदइ। अनेक हानथाप, द्वन्द्व जुइ। तर थुज्वःगु द्वन्द्व, कलहं धर्म दर्शनया सकारात्मक मूलभूत मान्यता गन लाः गन जुइ। गुलिं नं धर्म दर्शन व्यवहारय् खनेदइ, इपिं अधिकांश मूलभूत खइ मखु। अनेक स्वार्थं विकृत जुइ।
गिरिजाप्रसाद प्रजातन्त्रवादी। अथेहे शेरबहादुर देउवा नं प्रजातन्त्र पक्षधरया जुइ। प्रजातन्त्र दर्शन खः। थःगु हे मूल्य मान्यता दइ थ्व दर्शनया। गिरिजाप्रसाद, शेरबहादुर देउवा प्रजातन्त्रवादी धाये फइ। तर प्रजातन्त्र दर्शनया मापदण्ड हे इपिं मखु। गिरिजाया कमजोरी दइ। गिरिजायात कुंखिनेगु हजार लँ दइ। गिरिजाया आलोचना यायेगु अर्थ प्रजातन्त्रया विरोध यायेगु तायेकीपिं नं दु। गिरिजायात हे प्रजातन्त्र दर्शन खंकीपिं दु। थ्व सरासर गलत खः। तर व्यक्तिगत हित, स्वार्थया निंतिं प्रजातन्त्र दर्शनयात व्यक्ति केन्द्रित यायेफु। व दुस्साहस जुइ। अथेहे समाजवाद, कम्युनिष्ट दर्शनया नं गलत प्रयोग जू। कम्युनिष्ट दर्शनया थःगु हे आकर्षण दइ। महत्ता दइ। उपादेयता दइ। तर थःगु कसूर, अपराधयात त्वपुइगु स्वार्थं सुनां नं कम्युनिष्ट दर्शन छ्यलेफु। समाजवादी दर्शनयात थःगु स्वार्थया लागि अधिकतम छ्यलीपिं दइ। दर्शनयात ख्वाःपाः कथं छ्यलाः थःगु पक्षय् काइपिं दु। थुज्वःपिंत आलोचना यात कि स्वयं समाजवाद विरोधी प्रमाणित याना बीफु। जनसाधारणया नुगलय् अनेक भ्रम थनाः धार्मिक, राजनैतिक खेल थौं व्यापक रुपं म्हितीपिं दु। थुमित म्हसीके अःपु मजू ।

More Stories Like this