नेवाः स्वायत्त राज्यया थां धस्वाकेनु

सम्पादकजु,

छगू इलय् झी देय् थुवाः खः
वंगु पुलां खँ धइच्वंगु दु ।
न्ह्यानाच्वंगु ईया लकस दुने
थौं नं व ई वइच्वंगु दु ।
इलं इसारा यायेधुंकल झीत
नेपालमण्डल नेवाः प्रदेश खः ।
नेवाः स्वायत्त राज्यया भूमि
स्वनिगः व जःखःया नेवाः बस्ति खः ।
संयुक्त राष्ट्र संघया क्वःछिना
आत्मनिर्णया अधिकार खः ।
स्वशासन व स्वायत्तता हे
सकल नेवाःया मंकाः सः खः ।
तर नं झीपिं न्ह्यलं मचाःनि
न्ह्यःसू पहः अझ नं वःनि ।
फसं हः न्ह्याक्व हेरफर संसां
दुनुगलय् तिक्क अझ नं मत्यूनि ।
आदिबासी भूमिपुत्र पुत्री झीपिं
दुनुगः झीसं छाय् क्वतुंकेगु
संस्कृति सम्पदाया थुवाः झीपिं
धस्वाःगु छ्यं छाय् क्वछुइकेगु
सदियौं निसेंया दुघाःया स्याःचाः
त्वपुयाः मखु उलाः हे न्ह्यायेनु ।
नेवाः नस्लया चिम्संप्वाःपतिकं
मुक्तिया सासः हथासं थनेनु ।
विभेद याईपं मिहतातय् विरुद्धय्
शस्त्र मखु तर्कया तलवार ल्ह्वनेनु ।
सभासदपिनिगु बहुसंख्यक मतं
स्वायत्त राज्यया थां धस्वाकेनु ।

- ज्ञानेन्द्र वज्राचार्य,
च्वय्बुँ, धिमेल्वहं ।

 

More Stories Like this