चाबहिली थौं सुथंनिसें प्रदर्शन
स्वयम्भु यातायात खारेजीया माग, छगः गाडी तोडफोड
येँ (सन्ध्या टाइम्स)/चाबही लागाय् म्हिगः बहनी स्वयम्भु यातायातया बा. २ ख ५९३ नम्बरया बसं ठक्कर नकाः डम्बकुमारी नेपाली सीगु नापं मेपिं प्यम्ह घाःपाः जूगु घटनायात कयाः विद्यार्थी व स्थानीय मनूतय्सं थौं सुथंनिसें विरोध प्रदर्शन यानाच्वंगु दु। प्रदर्शनकारीतय्सं उगु लागाय् स्वयम्भु यातायातया गाडीं ठक्कर नकाः यक्व हे मनूत सीधुंकूगु खँ न्ह्यथँसें स्वयम्भु यातायात हे खारेज यायेत माग याःगु दु। प्रदर्शनकारीतय्सं सीम्हेसिया परिवारयात क्षतिपूर्ति बीमाःगु, घाःपाः जूपिंत वासः याये माःगु माग समेत यानाः थ्व प्रदर्शन याःगु खः। थौं सुथय् जूगु प्रदर्शनया झ्वलय् प्रहरीं लाठीचार्ज तकं याःगु दुसा प्रदर्शनकारीतय्सं छगः गाडी नं तोडफोड याना बिउगु दु ।
म्हिगः दुर्घटना जुइधुंकाः स्थानीय मनूतय्सं प्रदर्शन यायेगु नापं स्वयम्भु यातायातया स्वंगः गाडी च्याका बिउगु खः। लुमंकेबहः जू, उगु लागाय् वंगु खुलाया दुने गाडी दुर्घटना जुयाः न्याम्ह मनू सीधुंकूगु दुसा झिंन्याम्ह घाःपाः जुइधुंकूगु दु। गाडी दुर्घटना अप्वः यानाः स्वयम्भु यातायातया हे गाडीपाखें जुयाच्वंगु नं सीदुगु दु ।
स्वयम्भु यातायातया गाडी निषेधित क्षेत्र घोषणा
चाबहिली म्हिगः बहनी स्वयम्भु यातायातं ठक्कर नकाः छम्ह मिसा सीगु नापं प्यम्हेसित घाःपाः याना बिउगु घटनाया विरोधय् अनया पशुपति क्याम्पसया विद्यार्थीतय्सं थौं सुथंनिसें चाबही लागाय् यातायात बन्द यात ।
विद्यार्थीतय्सं गौशालांनिसें ओम हस्पिटल तक स्वयम्भु यातायातया गाडी निषेधित क्षेत्र धकाः घोषणा याःगु दु ।
अथे हे विद्यार्थीतय्सं अन कोणसभा नं याःगु दु। थ्वहे दथुइ पशुपति क्याम्पसय् दुगु विद्यार्थी संगठनत नेपाल विद्यार्थी संघ, अनेरास्ववियू व अखिल क्रान्तिकारीया मंकाः मुँज्या च्वनाः थौं हे यातायात मन्त्रालयय् वनाः स्वयम्भु यातायात खारेज यायेत इनाप यायेगु धकाः निर्णय जूगु खँ पशुपति क्याम्पसया स्ववियू सभापति मनोज वैद्यं 'सन्ध्या टाइम्स'यात कनादिल ।
