राष्ट्रपति राजपाक्षेया प्रतिशोधपूर्ण ज्या

दशकौं ताःहाकःगु तामिल गुरिल्ला युद्धया अन्त्य लिपा श्रीलंकाय् मेगु कथंया आन्तरिक समस्या ब्वलंगु दु। उकुन्हु क्वचाःगु राष्ट्रपतिया चुनावय् विजयी जुयादीम्ह महेन्द्रा राजपाक्षें थः प्रतिद्वन्द्वी जनरल फोन्सेकायात ज्वनाः कुना बीवं अन मेगु कथंया राजनीतिक समस्या ब्वलंगु खः। जनरल फोन्सेकां थः सेनापति जुयाच्वंगु इलय् राष्ट्रयात घात याइगु ज्या याःगु दु धइगु द्वपं बियाः वय्कःयात ज्वंके बिउगु खः ।

राष्ट्रपति राजपाक्षेया थ्व पलाखं वय्कः प्रतिशोधया लँपुपाखे वनाच्वंगु संकेत बियाच्वंगु दु। थः प्रतिद्वन्द्वी जुयाः सुं नं वल धाःसा वयात थम्हं थज्याःगु हे सजाय बीगु जुइ धकाः क्यनेगु कथंया ज्या वय्कःपाखें जुयाच्वंगु खनेदु। उलि जक मखु, लिट्टेयात समाप्त यायेत जूगु अन्तिम युद्धय् लिट्टे नायः प्रभाकरणयात ज्वनेधुंकाः लिपा यातना बियाः स्याके बिउगु धइगु द्वपं राष्ट्रपति राजपाक्षेयात वयाच्वंगु दु। थुकिं मानव अधिकारया तःधंगु उल्लंघन जूगु सः नं विश्व दबुली थ्वयाच्वंगु दु। गनं थ्व खँ पिहां वइ धकाः जकं वय्कलं तत्कालिन सेनाया कमाण्डर जनरल फोन्सेकायात ज्वनाः कुना बिउगु मखु ला? थज्याःगु अनेक आशंका आः पिहां वयाच्वंगु दु ।

लिट्टेपाखें न्ह्याकाच्वंगु स्वंगू दशक ताःहाकःगु युद्धया अन्त्य लिपा आः श्रीलंका सकलें राजनीतिक पार्टीत छप्पँ जुयाः विकासया लँय् न्ह्याः वनेमाःगु खः। तर राष्ट्रपतिया थ्व पलाखं यानाः अनया एकतायात स्यंकाः शक्तिशाली बौद्ध भिक्षुतय्त तकं विभाजित याना बिउगु दु। थुकिं युद्धं मुक्त जूसां नं राजनीतिक अस्थिरतां श्रीलंकायात हानं अनिश्चित भविष्यपाखे यंकीगु खतरा पिहां वयेफु ।

More Stories Like this