अबलय् द्यःया ख्वाः खिउँ

सुनिता साय्मि

जिमि बाज्यां मुलय् तयाः कनातःगु बाखं

मोतिकृष्ण तुलाधर, ९६ दँ

जिगु जन्म येँया असं त्वालय् जूगु खः। जि बःचाधिकः जुइवं हे तेलकासा, कबर्दी म्हितेगु। तिंख्यः व सिंहदरवार लिउने छचाःलिं बुँ फाँट, अन दरवारय् बिजुली यंकेत पावरहाउस दयेकातःगु। पावरहाउसया तारय् यग्गानाः हुस्लं पुयाः उखेंथुखें जुइगु। मोहनि जुलकि महाराजधिराज (श्री ५ त्रिभुवन) छाउनी वनाः भुतुमालि ब्वयेकः वनीगु। च्वं महाराजधिराजं भुतुमालि ब्वयेका हइ, क्वय् जनतातय्सं भुतुमालि ब्वयेकी। सुनां धिराजया भुतुमालि चाना बिल, वयात छम्वहः पाँय्म्वः बक्सिस बी। अन भुतुमालि लाः वइपिं व स्वः वइपिं नं म्वःम्वः हे दइ ।

उगु इलय् छम्वहः पाय्म्वः धयागु अतिकं मू वं। न्याम्हसिया नयेत न्यागः ध्यबा जक दःसा गाः। न्यागः ध्यबां बांलाःगु भुतुमालि ब्वयेकेगु सुका वः। न्हापा हलुवाइ पसलय् नागया मरि न्यायेगु दु। प्यंगःया मरि न्याःसा न्यापाः बियाहइ। जिमि घ्यः चिकं पसलय् घ्यः पाउया छसुका। लिपा ख्वानात्या (२६ पैसा) थ्यंबलय् सकसिनं घ्यः थिके जुल, आः घ्यः न्यानाः नये फइ मखुत धकाः धाल। धिब्छःया घ्यः न्याःसा छेँजः सकसितं गाः। आपाःसिनं धिब्छगःया हे घ्यः न्याः वइ। धार्निका धार्नि घ्यः न्याइपिं राणात व बर्मूत जक खः ।

अबलय् घण्टाघरया लिउने आखः ब्वंकीगु याः। च्वय् कलेजयापिंत आखः ब्वंकी, क्वय् दलानय् तयाः मस्तय्त आखः ब्वंकी। आखः ब्वनेत वर्णमाला छपाः व नेपाली भ्वंया कापी बी। तिंकथिया कलमं च्वयेगु। अडडाय् च्वंपिंसं मसि छगः बिया हइ। अले उकिं हे च्वयेगु। छपु कलमया स्वंगः दामं बिउ। बांलाःगु बुट्टा दुगु च्वसा जूसा न्यागःति ध्यबा काः। अबलय् मिसापिं आखः ब्वं मदु। नीन्याम्ह ति मिजं मस्त जक जिनापं आखः ब्वंगु ।

न्हापा जि न्ह्याबलें बिज्यासलय् द्यइके वनेगु। अन देवा तः वनेमाःगुलिं सुथ न्हापां दनाः वनेगु। हाम्वः संल्हू कुन्हु द्यइके वनाबलय् याकःचा, सुं मदुगुलिं द्यःया ख्वाः स्वयाः च्वना। द्यःया ख्वाः स्वस्वं ख्वाः हे खिउँसे च्वं थें च्वन। द्यःपाःलाः वयेवं वयात देवा बियाः मेगु कयाहयाः छेँय् वया। छेँय् वयाकथं मांयात द्यःया ख्वाः खिउँसेच्वंगु खँ कना ।

कन्हय् कुन्हु भचा म्हाइपुसे च्वन। लैं कया हयाः जस्ताय् (पलिइ) निभाः पापां लैं नयाच्वना। जि तलय् च्वँच्वं हे भुखाय् ब्वल। मामं हा हा धाधां हे नापसं च्वंपिनिगु छेँ दुनावल। जि नं मांया जनी ज्वज्वं कुहां वया। मातनय् थ्यनेवं छेँया च्वय्या ब्व दुनावल। सकलें असंया फलय् च्वंवल। नापसं च्वंगु बजि पसलय् वनाः प्वः प्वः बजि न्यानाहल। अन हे च्वनाः स्वकं बजि नल। मरि पसल्या नं अन हे च्वनाच्वंगु। वया छेँया च्वय्या ब्व नं दुन। जि चाद्वँय् गयाः वयागु पसलय् च्वंगु मरिया भुनापं ल्ह्वना हया। सकसिनं वहे मरि इनाः नल ।

बहनी जुइवं फुक्क धयाथें असंया दबुली द्यन। छम्ह निम्ह जक थःथःगु छेँय् द्यंवन। जि नं छेँय् द्यंवना। चान्हय् निकः स्वकः ला छेँ दुनावइ थें धलिं हे किरिकिरि सः वः ।

कन्हय् कुन्हु जुइवं सकलें तिंख्यलय् वन। छेँ दुनेवं कापः पसः दुपिं मारेतसें दक्व कापः पिने हल। वहे कापः कयाः तिंख्यलय् पाल ग्वल। राणातय्सं पं बियाहल। सकलें तिंख्यः दथुइ हे च्वन। छम्ह निम्हेसित क्याम्पय् नं थ्यने यन। इलय् ब्यलय् कर्नेल वयाः स्वः वइ। भुखाय् ब्वयाः च्यान्हु/बाःछिति लिपा खुं दुःख बिल। खुँतय्त ज्वनाः तिंख्यःया चाकलाः सिमाक्वय् तयेहल। थौंकन्हय् तिंख्यलय् च्वंगु चाकलाः सिमाया भचा उखे मेगु सिमा नं दुगु, तर थौंकन्हय् व न्हनावन। उगु हे सिमा क्वय् खुँयात ची हइगु।
उबलय् छक्वः जि बाःछि बिकाः पैदल हे मनकामना नं वनागु दु। स्वयम्भ लिउनें वनाः न्यागःमणि जुयाः लिहां वया। जिपिं मिजंत छपुचः नापं लँय् बाय् च्वना। नसा नयेगु निंतिं भरियातय्त नसा ज्वंकाः यंकेगु। थःथःगु म्हिचाय् जायेक कःनि मुस्या तयाः लँ धुछि कःनि मुस्या ननं कागति लः त्वँत्वं पाः गया। खुसि सिथय् च्वनाः अय्लाः कयाच्वनी। न्यागः ध्यबाया अय्लाः त्वंसा गाः। लँय् म्हाइपुसे च्वनी धकाः फोन हायेकाः वनेगु। अन दुगुचा गुलि चीधिकः जुल, उलि हे थिके। अबलय् अन चीधिकःपिं दुगुचा जक भाकल यानाः स्याइ। तःधिकःपिं नीतका काःसा चीधिकःपिं स्वीतका काइगु। अनया प्रसाद कथं दुगुचाया तुति छपा छपा ज्वना वया ।

अबलय् त्वाःयापिं पासापिं मुनाः द्यः सीकः वनेगु जितः थौंतलें लुमं। उगु इलय् पासि हे छदोको ज्वनाः च्यान्हुया छकः महाकाल द्यःयाथाय् समय् नयेगु। छन्हु झ्यालय् च्वनाः पाहांचःर्‍हे द्यः जात्रा स्वयाच्वनागु इलय् जिं क्वखाना तयागु लुँया रुद्राक्ष हे कुतुंवन। लिपा मेपिंसं बी हल। बहीद्यः स्वः वनेगु इलय् मचा जुतले पसलय् ज्या याइपिंसं बुया यंकी। याउँसे च्वं। न्हियान्हिथं भान्तां लं पुनेगु खःसां बहीद्यः स्वःवनेबलय् न्हूगु लं सुरुवाः व बुट लाकां न्ह्याना वनेगु।
छन्हु दश अवतार स्वः वनाबलय् मरुया तग्वः चिभालय् झितोला लुँया द्वःछिया दरं बैना बियाः लुँ न्याना। अनं लिपा झिंनिसः दामं तालाछिया छेँ न्याना। न्हापा असं दुने सकसियां ज्वलिंज्वः छेँ जक। दकलय् तजाः हे न्यातँजाः। अन उराय्, गुभाजु, बरे नापं झा बर्मू छथ्वः नं दु। असंया अन्नपूर्ण द्यःयाथाय् च्यान्हुया पालंपाः यानाः बर्मू व गुभाजुं पूजा याइ ।

अबलय् सकसियां बिश्वास दु। जि न्हापांनिसें कृष्ण लीलाय् च्वना। छन्हु छेँय् जहानया बाहाः पूजा वनेत तिसा माल धाल। जि अन वनाः तिसा फ्वनाः पिचानापं न्ह्यःने तयेहल। सिखः प्यपु, चुरा प्यपु कयाः कन्हय् हे लित बी यंका।
जिगु ब्याहाया खँ नं न्ह्यइपुसे च्वं। भुखाय् ब्वयाः सकलें तिंख्यलय् च्वनाच्वंबलय् हे जितः भमचा ल्यया तयेधुंकल। अबलय् जि शोभा भगवतीइ न्हिंन्हिं वनेगु। छन्हु अन दाजु छम्ह नापलायेवं वं ग्वय् कयाः जिगु निंतिं धकाः ल्ययातःम्ह मिसा बांलाक म्हसिउ धाल। जि वनाप हे वनाः नःघलय् हितिइ लः काःवःम्ह मिसायात स्वः वना। मिसा ला छ्याकः खनी। जि छेँय् वनाः छ्याकःम्ह मिसा मयः धकाः ग्वय् लित बिया। अनं लिपा जितः मेम्ह हे मिसा माला बिल।
न्हापा छत्रपाटीइ नारांहितिइ ज्या याइम्ह खरदार बुरा छम्ह दु। व तुतां चुया जुइ। व न्हियान्हिथं पशुपतिइ वनीम्ह। मंगलवाः जूसा मरु गणेद्यःयाथाय् व शनिवाः जूसा भिंद्यःयाथाय् वनी। अबलय् लँय् गुच्चा म्हिताच्वंपिं सकलें मस्तय्त मुनाः लँ धुछि मार हायेकाः यंकी। लँय् गन पसः ध्वदुल अनया मरि, तिलौरा दक्व हे थम्हं न्याना काइ। थः लिउ लिउ मार हालावःपिं दक्व मस्तय्त थम्हं तुं न्यानागु भागं थछि इनाः नकी। धिब्छः ध्यबा छगः छगः नं बी। असनय् थ्यन कि मार हालेगु ज्या क्वचाइ। कन्हय् कुन्हु हाकनं थुकथं हे मार हायेकाः यंकी। वं इलय् ब्यलय् मस्तय्त नारांहिति दरवारय् यंकाः ब्वःताय् तयाः मरि नं बिया हइ।
न्हापा ल्हाती न्ह्यायेगु घडी मदुसां लुँया सिखः दुगु म्हिचाय् घायेगु घडी दु। स्वतकां निसें न्यातका तक काइगु उगु घडी जिं नं घाये नं ।

More Stories Like this