बिदा देय् नेपाः

- सुशाल नेवाः

याः हू… । थौं बिदा हं ह्वाउ क्या मज्जा ! धाधां मचा तिंतिं न्हुयाः प्याखं हुली ।

थौं छुकिया बिदा हं आम्थे तिंतिं न्हुयाः प्याखं हुलेत ? थौं यःमरी पुन्हिया बिदा, कन्हय् शनिवारया, कंस फष्ट शन डेया बिदा, उखुन्हु मुस्मांतय्गु ईदया बिदा, हाकनं निन्हु स्वन्हु स्कुल वनेमानि हाकनं (छ्यं
उसिउसि यानाः लुमंके भनं) सँय्तय्गु नखः तमु ल्होछारया बिदा क्या मज्जा ह्वाउ ! धाधां हानं प्याखं हुली ।

जि पक्क मचाया पहः खनाः । घौछि वाताहां च्वना । थ्व छु जूगु हां झीथाय् ? न्ह्याबलें बिदा न्ह्याबलें बिदा । निन्हु मपाः बिदा । मोहनि नखः, स्वन्ति नखः, घ्यःचाकु संल्हू, यःमरी पुन्हि, ल्हुति पुन्हि, येँयाःपुन्हि, यलय् मतयाः, बुंगद्यः जात्रा, शिवरात्री मेला, बुढानीलकण्ठ मेला, ऋषिपंचमि, तिज, श्री कृष्ण मेला, माघे संव्रुान्ति, श्रीपंचमि, गाई जात्रा, शहिद दिवस, गौरा पर्व, कुशे औशी, फागु पूर्णिमा, प्रजातन्त्र दिवस, नारी दिवस, तमु ल्होछार, सोनम ल्होछार, बकर इद, वि्रुशमश छू छु का ।

हाकनं गबलें मास्टर सीगुया बिदा गबलें विद्यार्थी सीगु, अपहरण याःगु मोटरसाइकल आक्सीडेन्ट जुयाः मनू सीगुलिं चक्का जामया बिदा । क्या मज्जा का मास्टरतय् नं । छगू छगू त्वहः चिनाः बिदा बिल । थन मौबौपिनि कमाई मदयाः प्यनय् आफ्वःस्वां ह्वःगु सुनां खंगु मखु ।

छि आमथे हालां छु याये… । कलातं खँ त्वाःथलेत स्वइ ।

महालां छु याये ले ? कमाई दुगु मखु न्हिं हे उलिमछि खर्च माः । हाकनं स्कुल बिदा जूगुया ध्यबा मकाइगु नं मखु । लछिया द्वलंद्वः ध्यबा पुलेमाः । मस्तय्त खर्च उतिकं हे माः । बिदा जुल कि ला झन थ्व माल व माल धकाः दुःख बीगु । गबलें नये माल, गबलें व न्यायेमाल थ्व न्यायेमाल अले म्वाःल ला ध्यबा गन काः वनेगु ?

ख ला खः… । कलातं छ्यं संकाः सहमति क्यनी । अय्सां छि छम्ह हालां छु याये । थन नेता धाःपिं फुक्कं खुँया खँ लात । अले छु माल दक्वं धुँ जुइत ?

मखु थ्व लोकतन्त्र धइगु छु खः हां ? लोक… धइगु समाज मखु ला ? तन्त्र धइगु छु ? थःपिनि यत्थे यायेगु मनपरी तन्त्र लाकि छु हां ? न्ह्याम्हेस्यां न्ह्यागु नं याये जिउ ला ? गुम्हेस्यां मोटरं क्यलाः सीम्ह मनूयात शहिद घोषणा यायेमाल, क्षतिपूर्ति बीमाल धकाः चक्का जाम याइगु । गुम्हं तलब बढे यायेमाल, मत स्याःगुया विरोध, लः मवःगुया विरोध लँय् बँपसः मतयेकूगुया विरोध आदि इत्यादि न्ह्याग्गु याःसां बन्द अले बिदा जुइ, स्कुल नं बन्द !

लोककल्याणया निंतिं भिंगु ज्या यायेगु वा समाजया निंतिं छुं नं तःधंगु ज्या यायेया निंतिं छन्हु बिदा बीगु बांलाःगु खः धाये । छम्ह व्यक्तिया छगू छगू मागयात कार्यान्वयन याये माल धकाः हाल धायेवं बिदा बीगु गन तक उचित खः ? झीगु देय् प्यंगू जात स्वीखुता वर्णया जनता दुगु देय् धाइ । हाकनं थन मेमेगु देय्या जनता नं वयाच्वंगु दु । व फुक्कसिया छगू छगू जक माग याःसां न्हिं छन्हु छगू छगू उत्सव, पर्व लाना हे च्वनी । अले न्हिंन्हिं हे बिदा बिया वनेगु खःसा छु जुइ ? ३६५ दिनय् ३६५ दिन हे बिदा बीगु ला ? अले झीगु देय् बिदाया हे बिदां जाःगु देय् मजुइ ला हमिलय् गनं मदुगु देय् 'बिदा देय् नेपाः' धइगु नां तये माल लाकि छु ?

का थिनंनिसें धाये 'बिदा देय् नेपाः !' थनिनिसें बिदा काये मदुपिंत नं बिदा माल धकाः जोडदार माग तये । थिनंनिसें जिमित नं बिदा माल मखुसा आन्दोलन याये ।

'जय् बिदा देय् नेपाः ! दक्वसितं बिदा दये हे माः ।' मखुसा नेपाल बन्द ।

More Stories Like this