राष्ट्रभक्त जनता छप्पँ जुइ मफयाच्वन

डी.आर. खड्गे

देश स्वर्ग अथवा नर्क जुइगु ईश्वरया कृपां मखु। स्वर्ग अथवा नर्क जुइगु उच्च नेतातय्गु ल्हातय् खः। यदि राज्य संचालन याइपिं लोभी, लालची, ढोंगी जुल धाःसा व देश नर्क जुइ धयागु झीसं सीकेमाः। नेतात भिंपिं सकारात्मक सोच दुपिं जुल धाःसा व नेतातय्सं देशयात स्वर्ग यानां त्वःती। नेपाःया इतिहासं क्यनेधुंकूगु दु, लिच्छवी शासकं स्वर्ण युगया अवस्थाय् देय्यात थ्यंका बिल। लिच्छवी शासक धुंकाः मल्ल जुजुतय्सं नं देय्यात बिकास यानाः जनतायात शान्ति बीगु कुतः मयाःगु ला मखु। मल्ल शासनया अन्तिम इलय् मल्ल जुजुत नं भारतया शरणय् वनाः देय् विकास यायेगुपाखे ध्यान बी मफुत थें च्वं। जयस्थिति मल्लं भारतया दबाबय् जाति बिभेद नीति लागू यानाः जनताया दथुइ दयाच्वंगु सद्भाव ध्वस्त यात ।

नेपाःया विभाजित राज्य एकीकरणया लागिं जुजु पृथ्वी नारायण शाहं अभियान शुरु यात। एकीकरणया अभियान झ्वलय् भारतया प्रभाव व षडयन्त्रयात ध्वस्त यानाः पूर्वया टिष्टा (सिक्किम), पश्चिमया उत्तराखण्ड तक नेपाःया सीमा बिस्तार यानाः राज्य संचालन यात। जुजु पृथ्वी नारायण शाहं खालि भारतया प्रभाव व षडयन्त्रयात असफल जक याःगु मखु देय्यात नं विकासया लँपुइ यंकूगु खनेदु। जब जुजु पृथ्वी नारायण शाहया मृत्यु जुल, वयां लिपा पृथ्वी नारायण शाहया किजा बहादुर शाहं दाजुया नीतियात ज्वनाः नेपाःया सीमा रक्षा यायेगुली ध्यान केन्द्रित याःगु खनेदु। पृथ्वी नारायण शाहया मृत्यु लिपा विदेशी शक्तिया रणनीति नं परिवर्तन जूगु खनेदु। अथे धयागु नेपाःयात सैनिक शक्तिं मखु, थःगु स्वार्थ पूर्ति याइपिं नेतात मालाः उमित दरबार दुनेया शक्तिलिसे ल्वाकाः फाइदा कायेगु नीति ज्वंगु खनेदु। विदेशी शक्तिया षडयन्त्र उगु इलय् वयाः पूरा सफल जुल धायेमाः जब जुजु राजेन्द्र बीर बिक्रमया शक्तियात माइनस याये फत। उगु इलय् भारतय् शासन यानाच्वंपिं ब्रिटिसतय्सं राणा जंग बहादुरयात ल्हातय् कयाः देशभक्त भारदारतय्त कोतपर्वया नामं सामूहिक हत्या यायेत सफल जुल। कोतपर्व धुंकाः नेपाः अर्ध औपनिवेशय् लाःवन। राणा शासकं ब्रिटिसया कठपुतली सरकार जुयाः १०४ दँ तक जनतायात अन्धकारय् तयाः शासन यात। जब सन् १९४४ पाखे भारतया भूमिं ब्रिटिसतय्त देशं पितिना छ्वयेत सफल जुल नेपालय् नं प्रजातन्त्रया नामं भारत हानं अर्धऔपनिवेशिक शासन यायेत सफल जुल। २००७ सालपाखे भारतया ग्वाहालिं राणा शासनपाखें मुक्ति ला जुल तर देश चाहिं स्वतन्त्र जुइ मफुत। नेपालय् न्ह्याग्गु ज्या यायेत नं भारत सरकारया इशारा पियाच्वने माःगुलिं नेपाः बिकास मजूगु सकस्यां सिउ।
जुजु महेन्द्रया नीति भारतया प्रभाव व षडयन्त्रयात प्रभावहीन यायेत सफल जुयाः देय् स्वतन्त्र रुपं बिकास यायेगु अवसर वल। महेन्द्रया कुटनीतिं यानाः समाजवादी देश चीन व सोभियत संघं चिनी उद्योग, बाँसबारी लाकां उद्योग, कापः उद्योग, कृषि औजार उद्योग, भृकुटी कागज उद्योग व मेमेगु उद्योगत नं स्थापना यानाः देय् बिकासया लँपुइ न्ह्यायेगु शुरु जुल। जुजु महेन्द्रया पालय् विदेशी प्रभाव व षडयन्त्रयात असफल यायेफुगु हे विदेशीमूलया नागरिक व लोभी लालची ब्यक्तिवादी खसब्रम्हूतय्त महत्वपूर्ण पदय् थाय् मबिउगु कारणं खः। महेन्द्रं खाली राष्ट्रवादी शक्तितय्त जक महत्वपूर्ण पदय् तयाः सेवा यायेगु अवसर बियाच्वंगु कारणं बिदेशी शक्तिं छुं हे याये मफुगु खः। जुजु बीरेन्द्रं नं महेन्द्रया नीति ज्वनाः न्ह्याः वनेगु कुतः याःगु खः तर वय्कः सफल मजुल धायेमाः। जुजु बीरेन्द्र सफल मजूगुया कारण बीरेन्द्रया पालय् दरबारय् देशघाती ज्या याइपिं नोकरशाहत दुहां वयेत सफल जूगुलिं खः। जब देश घातक नोकरशाह दरबारय् दुहां वल वीरेन्द्रया शक्ति कमजोर याना यंकेत उपिं सफल जुजुं वन। जब २०४६ सालय् प्रजातन्त्रया नामं आन्दोलन तच्वः यात, वयां लिपा बीरेन्द्रया शक्तियात अझ कमजोर याना यंकल। व हे मौकाय् पार्टीया खसब्रम्हू नेतातय्सं समाजवादी देय्त चीन व सोभियत संघं उपहार स्वरुप बिया तःगु फुक्क उद्योगत ध्वस्त यानाः भारतयात खुसी याना बिल। जुजु वीरेन्द्र विदेशी शक्तियात प्रभावहीन यायेत असफल जूगुया कारण विदेशीमूलया नागरिक व लालची व्यक्तिवादी खसब्रम्हूतय्त धमाधम देय्या महत्वपूर्ण पदय् तयाः ज्या यायेगु मौका बिउगुलिं खः ।

निक्वःगु जनआन्दोलन लिपा नेपाः स्यना वनाच्वंगु जक मखु, देय्या अस्तित्व हे समाप्त जुइगु अवस्थाय् थ्यनाच्वंगु दु। थौंकन्हय् नेपाःया राष्ट्रभक्त शक्ति अति हे कमजोर जुया वनाच्वंगु दु। राष्ट्रभक्त शक्ति छप्पँ जुइ मफयाच्वंगु दु। छप्पँ जुइत कुतः यात कि नेपाःया स्वार्थी पार्टी नेतातय्सं राजावादीत छप्पँ जुइन धकाः हल्ला यानाः हतोत्साही याना बीगु। बहुदल पार्टी मध्ये नं माओबादी पार्टीया कार्यकर्तातय्सं जुजुवादी धकाः आक्रमण तकं यायेत स्वयाच्वनी। मेगु कारण खः फुक्क पार्टीतय्त विदेशी ध्यबाया शक्तिं राष्ट्रभक्त जनतायात अनेक तरिकां माइनस यानाच्वनी। निक्वःगु सफल आन्दोलन धुंकाः नेतात भारतया इशाराय् प्याखं हुलाच्वंगु जक मखु, लखौं बिहारीतय्त नेपाली नागरिकता बियाः देय्या उच्चपदय् बिराजमान याकाच्वंगु दु। यदि थ्व क्रम बढे तुं जुया वन धाःसा कन्हय् नेपाःया न्यायपालिका, कार्यपालिका व ब्यवस्थापिका स्वंगुलिं अंगय् बिदेशी नागरिकं कब्जा यानां त्वःती। यदि पुलांम्ह जुजु ज्ञानेन्द्र थःगु गद्दी बचे यायेत देशघातक सम्झौता यायेत स्वःगु खःसा निक्वःगु आन्दोलन सफल जुइ मखु जुइ। छाय्धाःसां जुजुयात थःपिंसं वांछ्वयागु खः धकाः फूर्ति याःम्ह माओबादी पार्टीं सेनापति छम्ह हे चीके मफु। थुकिं स्पष्ट जू, यदि बिदेशी शक्तिया इशारा जक मदुसा माओबादीं नं छुं याये मफु। व नं बिदेशीया इशारा दुसा हे जक ज्या याइगु राजनीतिक पार्टी ख: ।

More Stories Like this