आकाझाकां पिहां वःगु क्षेत्रीतय्गु माग
आः नकतिनि हे राजधानी येँय् क्षेत्रीतय्सं छगू र्याली पिकयाः जातीय राज्य दयेके दइ मखु धकाः माग याःगु दु। उमिसं याःगु उगु ज्याझ्वःयात देय्या सञ्चार माध्यमं नं माक्व स्वयां अप्वः थाय् बियाः प्रचार याःगु दुसा आः यदि थज्याःगु आन्दोलन तच्वया वन धाःसा छु यायेगु धकाः चिउताः प्वंकाः उकियात सकस्यां सरोकारया विषय दयेकेगु कुतः नं याना हःगु दु। देशय् जातीय आधारय् संघीय राज्य दयेकेमाः वा म्वाः धइगु खँयात कयाः जुयाच्वंगु ध्रुवीकरणया थ्व छगू मेगु कडी खः। जातीय राज्य दयेके मजिउ धकाः जातीय रुपं हे छगू पुचः पिहां वःगु कारणं धाःसा थ्व कडीया मेगु रोचक पक्ष जुयाच्वंगु दु ।
देशय् जातीय आधारय् राज्य विभाजन याये मजिउ धकाः छगू पुचः पिहां वयेवं तुं सर्गः कुतुं वः थें तायेके माःगु आवश्यकता मदु। छाय्धाःसां देशय् जातीय आधारय् हे राज्य दयेकेमाः धकाः मेगु ५९ गू पुचः न्हापांनिसें हे कुहां वयाच्वंगु दु। जातीय आधारय् हे संघीय व्यवस्था दयेकेमाः धकाः नेपाःया बहुसंख्यक जातितय्सं आन्दोलन याना वयाच्वंगु नं आः मखु। थज्याःगु आन्दोलन जुयाच्वंगु हे करिब स्वंगू दशक दइन जुइ। अबलय् जातीय आधारय् संघीय व्यवस्था माः धकाः आन्दोलन न्ह्यानाच्वंगु इलय् थ्व क्षेत्री समाजं गनं नं उकिया विरोध याःगु खने मदु। थौं अन्तिम इलय् वयाः उकिया विरोध याःगुया अर्थ देशय् अस्थिरता ब्वलंकेगु व हानं क्षेत्री जुजु स्थापना याकेगु ग्राय्ण्ड डिजायन जक खः धकाः गथे मधायेगु? थःत माःगु वस्त फ्वनेगु अधिकार सकसितं दु, तर कर्पिंत बी त्यंगु वस्तु बी दइ मखु धया जुइगु अधिकार सुयातं मदु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
