संयन्त्रयात विदेशी समर्थन मदु

चीन व भारत राजनीतिक संयन्त्रया विरोधय्?

येँ (सन्ध्या टाइम्स)/देशय् ब्वलनाच्वंगु राजनीतिक असहमति फुक्क न्हंकाः सहमति कायमा याना वनेगु लागिं धकाः गठन याःगु उच्चस्तरीय राजनीतिक संयन्त्रया निर्माणयात कयाः आः तक नेपाःया जःलाखःला देय् चीन व भारतं छाय् छुं हे टिप्पणी मयाःगु जुइ ?

राजनीतिक संयन्त्रया वैधतायात कयाः राजनीतिक ख्यलय् थीथी न्ह्यसः वयाच्वंगु इलय् कुटनैतिक ख्यलय् धाःसा थ्व न्ह्यसलं थाय् कया हःगु दु। जःलाखःला देय् चीन व भारतं थ्व संयन्त्रपाखें गय् यानाः ज्या याना वनेमाली धकाः आः तक सुझाव नं मवःनिसा उकियात कयाः थ्व निगू देशय् अनौपचारिक रुपं तकं छुं मधाःनिगु खँ सूत्रं धाःगु दु।
वास्तवय् थ्व संयन्त्रयात थम्हं वास्ता याये मखु धकाः प्रधानमन्त्री माधव नेपालं फुर्ति यानाच्वंगुया कारणं नं थ्वहे खः धइगु सूत्रया दावी दु। नेपाःया शान्ति प्रक्रियाय् ग्वाहालि यानाच्वंगु देय्त चीन व भारतं नं आः तक थ्व संयन्त्रया वैधतायात मान्यता मबिउनि। उकिं थ्व संयन्त्रं याइगु छुं नं कथंया निर्णययात यदि सरकारं पालना मयात धाःसा उकियात पालना यायेमाः वा मयाःसा लोकतान्त्रिक मान्यताया अःखः जुइ धकाः अन्तर्राष्ट्रिय समुदायपाखें
सरकारयात दवाव वइगु छुं हे सम्भावना मदु। अन्तर्राष्ट्रिय समुदायं मान्यता मबिउगु निकाय जूगुलिं उकियात थम्हं स्वीकार याये मखु धइगु प्रधानमन्त्रीया अडान वयाच्वंगु खः।
सूत्रया कथं राज्य सत्तायात हे प्रभावित याइगु निकायय् माओवादीयात नं दुथ्याकूगु खँयात भारतं स्वीकार याये फयाच्वंगु मदु। उकिं थुकियात भारतं महत्व मबीत स्वयाच्वंगु खँ नं सूत्रं धाःगु दु ।

बल्ल बल्ल च्वंगु बैठक नं बेकार

ताःई तकं बैठक हे च्वने मफयाच्वंगु संयन्त्रया बैठक म्हिगः बल्ल च्वनं नं छुं हे निर्णय मयासे क्वचाल। बैठकया शुरुइ हे माओवादी व एमाले-कांग्रेसया बिचाः ल्वायेवं छुं हे निर्णय याये मफुगु खः। संयन्त्रपाखें सेना समायोजनयात प्राथमिकता बीमाः धकाः एमाले व कांग्रेसं बः बिउगु खःसा माओवादीं राष्ट्रपतिया पलाः भिंकेगु ज्यायात संयन्त्रया न्हापांगु प्राथमिकता दयेकेमाः धकाः अडान काःगु खः। माओवादीं उकिया निंतिं सरकार परिवर्तन यायेमाः धासें वर्तमान राजनीतिक गतिरोध अन्त्य मजुइकं मेगु समस्या समाधान जुइ फइ मखु धायेवं बैठक अथें क्वचाःवंगु खः ।