विश्वन्यंक हनाच्वन मतिना दिवस

थौं फेब्रुअरी-१४ तारिख । भ्यालेन्टाइन्स डे अथे धयागु मतिना दिवस । सन्त भ्यालेन्टाइनया नामय् मतिना याइपिं दथुइ गुलाफया स्वाँ नापं द्वहलपा कालबिल यानाः हिलंन्यंकं थुगु दिवस हनाच्वंगु दु । पश्चिमी संस्कार नालाः नेपालय् नं ल्याय्म्ह ल्यासे त थुगु दिवस तःजिक व झःझःधायेक हनाच्वंगु दु । म्हिगः निसें हे स्वाँ पसलय् गुलाफया स्वाँ न्याःवःपिं ल्याय्म्ह ल्यासेतय्गु भीड हे जूगु खः ।

ऐतिहासिक महत्व कःघानातःगु भ्यालेन्टाइन डे क्रिष्चियन परम्परायात कःघानातःगु दु । क्याथोलिकतय्सं फेब्रुअरी-१४ यात रोमान्सया दिं कथं हनेगु यानाच्वंगु दु । स्वंगूगु सताब्दीइ भ्यालेन्टाइन रोमया मतिनामि खः धैगु किम्बदन्ती दु । रोमया शासक क्लाउडियसं तिरिमय्जु व छेँजःपाखें तापापिं मनूत जक बांलाम्ह सेना जुइफइगु मान्यता तइम्ह खः । उकिं शासकं बांलापिं सेनातय्त इहिपा यायेगु पाखें प्रतिबन्ध तयाबिल । तर सेन्ट भ्यालेन्टाइनं क्याउडिसया निर्णय न्यायसंगत मजूगु धासें सैनिकतय्त गोप्य रुपं इहिपा याकाब्यूगु धापू दु । थुकथं गैरकानुनी इहिपा याकूगु द्वपनय् सेन्ट भ्यालेन्टाइनयात थौंया दिं अथेधयागु फेब्रुअरी १४ य् स्यानाबिल । अथेजूगुलिं वय्कःया लुमन्ति थुगु दिंयात भ्यालेन्टाइन डे कथं हनेगु यानावयाच्वंगु धापू दु ।

अथेहे थौं यक्वः हे मतिनामित थःपिनिगु ताःईतकया मतिनाया कामना यायेत मतिनाया प्रतीक कथं कयातःगु पाल्पाया रानी महलय् तकं वनेगु या । पाल्पाया बौघागुम्बा कालीगण्डकीया तीरय् राणा खड्ग शमशेरं रानी तेजकुमारीया लुमन्तिइ दयेकूगु रानीमहलय् थ्यंपिं मतिनामि जोडीं इमिगु थें हे ताःई तकया मतिनाया कामना यायेगु याइ । भारतया सम्राट शाहजहां थः मदुम्ह रानी मुमताजया लुमन्तिइ आगराय् ताजमहल दयेकाब्यूगु दुसा नेपाःया राणा खड्गशमशेरं रानी तेजकुमारीया लुमन्तिइ पाल्पाय् रानीमहल दयेकाब्यूगु दु । भारतया ताजमहल यमुना खुसिया सिथय् दुसा नेपाःया रानीमहल कालीगण्डकीया सिथय् दु । विक्रम संवत् १९४९ य् रानी तेजकुमारी सीवं वयं थें जूम्ह खड्गशमशेरं वय्कया लुमन्तिइ रानीमहल दयेकूगु खः । ताःई तक खड्गशमशेर उगु हे रानीमहलय् च्वनेगु द्यनेगु याःसां परिस्थिति अनुकूल मजुइवं वय्कः भारत पलायन जूगु खः ।

More Stories Like this