झीसं नं सुझाव बीमाली

सम्पादकजु,

संविधान दयेकेगु ज्याय् लगे जुयाच्वंपिं सभासद्तय्सं आः चाहिं संविधान च्वयेगु ज्या धाथें नी यानाः हे न्ह्याकी थें च्वनाच्वंगु दु । छाय्धाःसां संविधानसभाया थीथी समितितय्सं जिमित थ्व थ्व विषयलय् सुझाव बियादिसँ धकाः पत्रपत्रिकाय् विज्ञापन बियाः छापे यानाहःगु झीसं खनाच्वना । अज्याःगु विज्ञापन वइगु छगू जक समिति मखु यक्व हे समितित दु थें च्वं । संविधानसभाय् झिंप्यंगू ला समिति हे दु धाःगु दु । थ्व विज्ञापन बियाहःगुलिं संविधान दयेकेगु ज्याय् जनताया बिचाः नं काइगु जुयाच्वन धइगु खँ सीदत । आः झी नेवाःतय्सं नं अज्याःगु विज्ञापन स्वयाः थःगु बिचाः बीमाः थें च्वं । झी नेवाःतय्सं आर्थिक, सामाजिक, श्रोत परिचालन, शासन व्यवस्था, कानुनी व्यवस्था, आदि आदिखय् छु माग यानाच्वनागु खः, झीगु बिचाः छु खः धकाः लिखित रुपं बुझे यायेमाः थें । पिने सडकय् च्वनाः आन्दोलन यायेगु ला द हे दु तर थथे दुने दुने नं झीगु भूमिका जुयाच्वनेमाः । मखुसा झी पिने हाःगु हालं तुं जुयाच्वनी दुने याईपंसं ज्या तमाम याना तयेधुंकी । लिपा धाः वंसा छिमिसं जिमित सुझाव हे बी महः धयाहल धाःसा झी नाजवाफ जुइमाली । कन्हय् उमिसं झीत अज्याःगु मबीमा धकाः नं झीसं तयारी याना तयेमाः । झीसं छु छु माग तयाः आन्दोलन यानाच्वना आः व आन्दोलनया खँ थासय् थ्यंकेगु ई वयाच्वंगु दु । बरु झीसं बियागु सुझाव संविधानय् समावेश याये हे माः धकाः शरु पिने च्वनाः संघर्ष यानाच्वनेमाः । माःथाय् खँ मथ्यंकुसे पिने जक हालाच्वन धाःसा झुलं पिने पत्ति हाले थें जक जुयाच्वनी । थ्व बारे न्ह्यलुवाः भाजु मय्जुपिंसं बिचाः यानादी धकाः छकूचा ध्यान सालाच्वना । सुझाव ।

- छम्ह भाषा चिउताःमि, येँ ।

More Stories Like this