संयन्त्रय् माओवादीया एजेण्डा

खँ जुयाच्वंगुलिं आन्दोलन स्थगित: डा. भट्टराई

येँ (सन्ध्या टाइम्स)/सरकार त्वःताः प्रमुख प्रतिपक्षय् च्वनेधुनेवं हे एनेकपा (माओवादीं) ल्ह्वनाच्वंगु नागरिक सर्वोच्चता, राष्ट्रिय स्वाधीनता, संयुक्त राष्ट्रिय सरकार, शान्ति व न्हूगु संविधान यानाः न्यागू एजेण्डा आः उच्चस्तरीय राजनीतिक संयन्त्रय् सहलहया विषय जुयाच्वंगु दु ।

नेपाली कांग्रेसया सभापति गिरिजाप्रसाद कोइराला कजि जुयादीगु उगु संयन्त्रया दुजलय् एनेकपा (माओवादी)या अध्यक्ष प्रचण्ड व नेकपा (एमाले) या अध्यक्ष झलनाथ खनाल दुजः च्वनादीगु दु। उच्चस्तरीय राजनीतिक संयन्त्रप्रति शंका याना च्वनादीम्ह प्रधानमन्त्री माधव कुमार नेपालयात लिपांगु इलय् वयाः उगु हे संयन्त्रया आमन्त्रित दुजः कथं दुथ्याकूगु खः। मधेसवादी दलतय्सं नं उगु संयन्त्रय् थःपिनिगु प्रतिनिधित्व दयेमाः धकाः माग याना वयाच्वंगु दु
।

माओवादीं धाःसा थःपिंसं ल्ह्वनाच्वनागु एजेण्डा बारे आः उच्चस्तरीय संयन्त्रय् हे सहलह जुयाच्वंगु कारणं आन्दोलन छगू कथं स्थगित यानागु खँ धाःगु दु ।

माओवादीया उपाध्यक्ष डा. बाबुराम भट्टराईनं उच्चस्तरीय संयन्त्रय् थःपिनि मागयात कयाः सहलह जुयाच्वंगुलिं आन्दोलन स्थगित यानातयागु खँ कनादीगु दु। थौं विराटनगरय् संचारकर्मीतय्गु न्ह्यसःया लिसः बिसें वय्कलं थ्व खँ धयादीगु खः। थःपिनि मागयात कयाः संयन्त्रय् हे सहलह जुयाच्वंगु दु, संयन्त्रं निकास बी मफुत धाःसा जक थःपिं हाकनं गुकथं न्ह्याः वनेगु जुइ धकाः रणनीति दयेकेगु खँ नं वय्कलं कनादिल। माओवादीं आन्दोलनया निंतिं धकाः दयेकूगु संयुक्त राष्ट्रिय जनआन्दोलन नेपालया संयोजक समेत जुयादीम्ह नेता भट्टराईं उच्चस्तरीय राजनीतिक संयन्त्रय् राष्ट्रपतिया असंवैधानिक पलाः, न्हूगु संविधान निर्माण, सेना समायोजन नापं फुक्क खँय् सहलह जुइ धकाः नं जानकारी बियादिल ।

कन्हय् मुँज्या

ताःई न्ह्यवंनिसें च्वने मफयाच्वंगु उच्चस्तरीय राजनीतिक संयन्त्रया मुँज्या कन्हय् च्वनीगु जूगु दु। संयन्त्रया संयोजक गिरिजाप्रसाद कोइरालाया निवास महाराजगंजय् कन्हय् मुँज्या च्वनेत्यंगु खः। विहिवाःपतिकं च्वनेगु धयातःगु मुँज्या म्हिगः कोइराला म्हं मफुगुलिं मच्वंगु खःसा वंगु विहिवाः नेतातय् लिमलाः धकाः मच्वंगु खः। कन्हय्या मुँज्याय् मधेसवादी दलतय्त नं संयन्त्रय् दुथ्याकेगु बारे सहलह जुइ धाःगु दु। संयन्त्रं सहलह यायेमाःगु यक्व विषय दया वयेधुंकूगु दु ।