सरकारपाखें हानं मेगु लापर्वाही

जमीम शाहया हत्याय् देय्या सुरक्षा निकायं क्यंगु हद दर्जाया लापरवाहीं सम्पूर्ण जनतायात क्षुब्ध याना बिउगु ला द हे दु, आः हत्या लिपा सरकारं छानबिनया नामय् क्यंगु मेगु लापरवाहीं जनतायात मर्माहत नं याना बिउगु दु। हत्या जुइवं हे सरकारं उकिया छानबिन याकेगु धकाः पुनरावलोकन अदालतया पुलांम्ह न्यायाधीश गोविन्द पराजुलीया संयोकजकत्वय् छगू छानबिन आयोग नीस्वंगु खः। तर दुःखया खँ, सरकारं थ्व आयोग गठन याःबलय् न संयोजक जुइम्ह मनूयाके छसः न्यंगु दु न गठन यायेधुंकाः वयात सःताः थुकिया बारे छुं सहलह हे याःगु दु। आयोगया संयोजक जूम्ह गोविन्द पराजुलीं थःगु संयोजकत्वय् आयोग गठन जूगु खँ पत्रिका ब्वनाः तिनि सिउगु व गठन जुइधुंकाः नं प्यन्हु तक थःत सुं नं सरकारी पदाधिकारीं नाप तकं मलाःगु जानकारी बियादीगु दु। सरकारपाखें क्यंगु थ्व ति घटिया लापर्वाही मेगु छु जुइ फइ? अपराधीयात धाथें ज्वँ हे च्वनेगु धइगु सिबें नं सर्वसाधारण जनता व सीम्ह मनूया छेँजःयात थामथुम यायेगु नियतं हे जक थ्व आयोग गठन याःगु खँ प्रस्ट दु। सरकारया लागिं घटना अझ नं दुःखदायी मजूनि। घटनायात कयाः मेगु विरोध ज्याझ्वः जुइ ला वा सीम्हेसिया छेँजःपिंसं छुं धाइ ला धइगु चिउतालं जक सरकारं ज्या यानाच्वंगु सीदु। थ्व ति संवेदनहीन ज्या मेगु छु जुइ? आयोग गठन यायेधुंकाः तुरुन्त हे उकिया बैठक सःताः छानबिनया पलाः न्ह्याका छ्वयेमाःगु खः। केवल अपराधीया लिक्क थ्यनेधुंकल धइगु फय्गं आश्वासन बियाः जनतां पत्याः याइगु स्थिति आः मदु। सरकारं थज्याःगु नाटक बन्द याःसा हे कल्याण जुइ ।

More Stories Like this