जमिम शाह, भरत नेपाली व भारत

राजेन्द्र महर्जन

धात्थें झीगु देशय् सरकार दु ला? जनताका शान्ति-सुरक्षायात प्रत्याभूत याइगु राज्य दु ला? देशय् सरकार व राज्य दुगु खःसा जनताया शान्ति-सुरक्षा बेपत्ता जूगु कारण छु जुइ? खः, थुज्वःगु हे न्ह्यसः दंगु दु, जमिम शाहयात स्याःगु घटनां ।

देशय् दुने शान्ति-सुरक्षा मदुसा मनूत राजधानी वइ। तर, राजधानीइ हे अशान्ति र असुरक्षाया राज जुइबलय् मनूत गन वनी ?

राजधानीया नुगःचुइ हे जमिम शाहयात स्याःगु घटनां थुज्वःगु न्ह्यसः ब्वलंकूगु दु। येँया लाजिम्पाटय् न्हिनय् हे मिडिया व्यवसायी जमिम शाहयात गोलीं कयेकाः स्याना बिउगुलिं यक्व हे न्ह्यसःया धिनाच्व थना बिउगु दु। शाहया हत्याया कारणं सन्त्रस्त मनूतय्गु मनय् यक्व-यक्व हे न्ह्यसःया धिनाच्व दु, तर लिसः गनं लुयावःगु मदुनि। सरकार वा राज्य स्वयम् हे न्ह्यसःया धिनाच्व क्वय् दनाच्वंगुलिं जनताया न्ह्यसः अनुत्तरित हे तिनि।
वास्तवय् जमिम शाहया हत्या छम्ह मिडियाकर्मी वा मिडिया साहुया हत्या जक मखु, छम्ह नेपाःमिया हत्या नं खः। येँया पुलांपिं मुस्मां समुदायया कायमचा जमिमयात स्यानाः अल्पसंख्यक जनतायात ख्यायेगु कुतः याःगु जुइफु। जुइफु, थ्व हत्या मिडियाय् लगानी याइपिं नेपाःमितय्त ख्यायेगु व म्हुतुप्वाः तिकेगु दाउ नं खयेफु। अले नेपाःया मिडियाय् थःगु वर्चस्व स्थापित यायेगु मनसाय सुचुकाः हत्याया चक्रब्यूह दयेकूगु नं जुइफु। हत्याया जिम्मेवारी काःम्ह भारतया डन भरत नेपालीया म्हुतु पिहां वःगु शब्दय् भारतया बांमलाःगु नियत ह्वास्स नवःगु ला सकसिनं चाः हे जुइमाः। भारतया विदेशमन्त्री एसएम कृष्णा नेपाः वये न्ह्यः नेसनल टेलिभिजनया अध्यक्ष युनुश अन्सारीया गिरफ्तारीं थुज्वःगु गन्धया संकेत क्यनेधुकूगु दु। अले युनुश अन्सारीयात स्यायेत वःगु ग्यांङं हे जमिम शाहयात स्याःगु आशंका जूगुलिं भारत र भरत नेपालीया अन्तर्सम्बन्धयात न्ह्यसःया घेराय् लाका बिउगु दु।
खय्त ला भारतया सत्ताधारी वर्ग व मिडियां जमिम शाहयात पाकिस्तानी जासुसी संस्था आइएसआइया एजेन्ट धायेत गबले नं लिमस्वः। थ्व हत्याया सन्दर्भय् नं इमिसं आइएसआइया एजेन्टतय् दथुइ जूगु ग्याङवारया रुपय् व्याख्या यायेगु कुतः याःगु खनेदु। तर भारतीय डन भरत नेपालीया दावी स्वल धाःसा शाहयात भारतविरोधी जूगु कारणं हे स्याःगु खनेदु। निश्चित रुपं शाहयात ठोस प्रमाण मदयेकं आइएसआइया एजेन्ट, दाउद इब्राहिमया मतियार वा नक्कली नोटया कारोबारी आरोप बीगुया अर्थ खः, हत्यायात न्यायोचित ठहर यायेगु प्रपंच रचना यायेगु। नेपाःया मुस्मां जुइवं हे ह्याम्ह नं मनू थुज्वःगु फुक्क आरोपया लागिं 'योग्य' जुइगु भारतीय शासकवर्ग व मिडियाया मिखाय् 'फुक्क मुस्मांतय्त शत्रु तायेकेगु' दृष्टिदोषं भुनातःगु खने दु। इमिगु हे दोषी चस्मां स्वयेगु खःसा मुस्मां धइपिं फुक्क आतंकवादी खः, कट्टरपन्थी खः, उकिं स्याये बहः जू। मुस्मां जुइपिं फुक्क हे स्याये बहः जू धकाः थुइकेगु फासीवादी व्याख्यां भारतयात भिं याइ मखु, नेपाःयात नं अल्पसंख्यक मुस्मांतय्गु न्हूगु 'कत्लगाह' हे दयेकेफु।
भारतया चस्मा तयाः स्वइपिं नेपाःया राज्य र सरकारं आः लिसः बीमाः, छु नेपालय् नं भारतय् थे हे मुस्मां जुइगु हे अपराधी जुइगु स्थिति वल ला? अकाल मृत्युया लागि दाबेदार जुइगु अवस्था वल ला ?

थ्व हत्याया कारणं नेपाःया अल्पसंख्यक मुस्मां समुदायया दथुइ ग्याःचिकु पहः ब्वलंकूगु खनेदु। थःगु देशय् हे शान्ति-सुरक्षा मदुगु व थःगु जीवनया रक्षा मदुगु खनाः इमित सुरक्षाया लागि उपाय मालेत बाध्य यायेफु। देशय् सरकार व राज्य दुगु खःसा इमित शान्ति-सुरक्षा बीगु खँय् लिबाके मजिउ। तर, कडा सुरक्षा क्षेत्र दुने जूगु जमिम शाहया हत्याया ठोस अनुसन्धान यानाः अपराधीतय्त कारबाही यायेगु पलेसा सरकारया ध्यान थःगु हे कुर्सीया सुरक्षाय् अप्वः वंगु खने दु ।

थःगु कुर्सीया सुरक्षा उबलय् जक बांलाक जुइ, गबलय् शाहयात स्यायेगु ज्याय् संलग्न ग्याङ, ग्याङयात ग्वाहालि याइगु सत्ता-शक्तियात अनुसन्धानया घेरां पिने लाके फइ। लुमंकेबहः जू, भारतीय शासक वर्ग व मिडियाया प्रचारबाजी स्वयेबलय् जमिम शाहयात स्यायेधुकाः इमिसं यक्व हे आनन्दया सासः ल्हाःगु खने दु। उकिं गुम्हेसित थ्व हत्यां फाइदा जूगु दु, गुम्हेस्यां शाहयात स्याःगुलिं राहत महसुस याःगु दु, इमित अनुसन्धानया सीमा दुने लाके माःगु दु। उकिया लागि थःगु कुर्सी त्वःते माःसां त्वःतेगु आँट यायेमाः। उज्वःगु आँट भारतया बलं धनाच्वंगु थ्व सरकारयाके गन काः वनेगु ग्व ?

सरकारया ज्या धइगु हत्या, हिंसा व अपराध जुइधुकाः सान्त्वना बीगु थासय् तक जक सीमित खने दत। शान्ति-सुरक्षा व जीवनरक्षाया लागिं माःगु राज्यया फुक्क अंग नं ज्या लगे मजूगु खने दत। संक्रमणकालया नामय् सुरक्षा-क्षेत्र दुने हे मनू स्यानाः बिसिउँ वने फुगुलिं देशय् सरकार व राज्य मदुगु तथ्य हे क्यंगु दु। जमिम शाहया हत्यां देशय् राज्यहीनता व अराजकतायात हे उलाः क्यंगु दु ।

उकिं देशय् सरकार व राज्य दु धइगु क्यनेगु खःसा तुरुन्त हे हत्यारातय्त ज्वनेगुली ढिलासुस्ती यायेगु आत्मघाती जुइ। थ्व हत्याया पर्दा दुने च्वंगु कारण मालेगु आँट मयात धाःसा सरकार नेपाःया जनताया मिखां अझ बांमलाक कुतु वनी। थःगु हे देशय न्हिनय् हे खिचा स्याये थे स्याका च्वनेमाःगु भयावह परिस्थितिया अन्त्य मयात धाःसा सरकार व राज्य दु-मदुया अर्थ हे छु जुइ? उकिं थुज्वःगु हत्या-हिंसाया लागि जिम्मेवार शक्तितय्त कानुनी कारबाही यानाः शान्ति-सुरक्षाया बहाली मयायेगु खःसा नेपाःया जनतां नं वर्तमान राज्य व सरकारयात बेवास्ता व बहिष्कार यायेफु ।

More Stories Like this