झीगु नेवाः 'स्वात्त' राज्य !

सु-कि

संविधानसभां न्हूगु संविधान दयेकेगु तयारी यानाच्वंगु दु। अय् जुयाः झीथाय् 'नेवाः स्वायत्त राज्य' या नं खुब चर्चा जुयाच्वंगु दु। अज्याःगु चर्चा जुयाच्वंबलय् पासा छम्हेस्यां न्ववाइगु खँ आः वयाः तसकं लुमनाच्वन ।

झी नेवाःतय् धाःसा न्ह्यागुं शब्दयात शर्टकटं न्ववायेगु बानी। तेजनारायणयात 'तिनां' जक धाइगु। शेषनारायणयात 'सिनां' जक धाइगु। इतिहासय् ब्वने माःम्ह शिव सिंह महाराजयात ला सिमसिम महाराज धाइपिं। व पासां नं 'नेवाः स्वायत्त राज्य' धाइबलय् न्ह्याबलें 'नेवाः स्वात्त राज्य' जक धाइगु। 'स्वात्त मखु भाइ, स्वायत्त खः' धकाः जिं गुलि धया, तर अहँ माने हे जूगु मखु। न्ह्याबलय् स्वःसां 'स्वात्त राज्य' जक ।

उकुन्हु संविधानसभाया छगू समितिं झिंप्यंगू प्रदेशया छगू नक्सा हल। नक्साय् नेवाःतय्गु भूभाग खंबलय् नेवाःत हे अजू चाल। व नक्सा ला नेवाःतय् निंतिं 'नखाउँ भने दिनभरिको शिकार, खाउँ भने कान्छाबाउको अनुहार' धाःथें धकाः जुल। न जिउ धायेगु, न मजिउ धायेगु। छु धायेगु, छु धायेगु ।

जितः ला थ्व इलय् वहे पुलांम्ह पासा लुमनाच्वन। नेवाः स्वायत्त राज्ययात वं 'स्वात्त राज्य' धाइगु। वास्तवय् थ्व १४ प्रदेशय् नं नेवाः स्वायत्त राज्य मखु, नेवाः 'स्वात्त' राज्य हे तयातःगु जुयाच्वन। नेवाः राज्य ला स्वात्त हे ! कन्हय् अझ स्वात्त जुइ तिनि। नेवाःतय्सं फ्वनाच्वंगु स्वायत्त राज्य खः। तर संविधानसभां स्वात्त राज्य धकाःसा बिल। उकिं न्ववायेबलय् भचा बांलाक व स्पष्ट जुइक हे न्ववायेमाः धया। खय्तय् न्ह्यःने नं अथे हे 'स्वायत्त राज्य' मधासे 'स्वात्त राज्य, स्वात्त राज्य' धकाः न्ववाना जुल जुइ, अले बिया हल धकाः धाथेंया 'स्वात्त राज्य'। जिल मखुला आः ?

More Stories Like this