संविधान दयेकेत ई मखु इच्छाशक्ति मगात

आः वइगु जेठ १४ गते न्हूगु संविधान जारी यायेगु धकाः अन्तरिम संविधानय् हे उल्लेख याना तःसां नं वकुन्हु संविधान पिकाये फइगु सम्भावना क्षिण जुयावंगु जक मखु शुन्य हे जुयावंगु दु। उकिं आः संविधान पिकायेगु न्हि जेठ १४ गते मयासे वयां छुं भचा इ थपे यायेमाली धकाः संविधानसभा दुने प्रक्रिया नापं न्ह्याकेधुंकूगु दु। थुकिया निंतिं संविधान हे संशोधन यानाः ई थपे यायेत प्रक्रिया शुरु याःगु खः ।

तर संविधान दयेकेत ई थपे याःसां व थपे याःगु इलय् नं संविधान वइ धइगु ग्यारेन्टी धाःसा अझ नं मदुनि। छाय्धाःसां संविधान इलय् मवयेत्यंगु ई मगानाः मखु। संविधान इलय् मवयेत्यंगुया कारण राजनीतिक पार्टीतय् दथुइ समझदारी मगानाः खः। विवादय् वयाच्वंगु गुलिखे मुद्दाय् राजनीतिक पार्टीतय् दथुइ सहमति जुइ फयाच्वंगु मदु। गुलिखे खँ पार्टीतय् अहमं यानाःसा गुलिखे खँ सहमतिया कुतः हे मयाःगु कारणं ज्यंके फयाच्वंगु मदु। ई थपे यायेबलय् अज्याःगु समस्या ज्यंकेत अवसर ला चूलाइ तर ज्यंकेगु लागिं माःगु इच्छाशक्ति मंत धाःसा न्ह्याक्व हे ई थपे याःसां उकिं छुं जुइगु सम्भावना मदु। यदि संविधान दयेकेगु ज्याय् वयाच्वंगु समस्या समाधान यायेत थःपिं तयार दु धकाः इच्छाशक्ति क्यनाः ज्या न्ह्याकल धाःसा आः ल्यं दनिगु ई नं मगाःगु धाःसा मखु। पार्टीतय्गु आःया पहः स्वयेबलय् उमिके अझ नं अज्याःगु इच्छाशक्ति मगाःनि। उकिं ई थपे यानां जक संविधान इलय् वइ धकाः धाये फइगु अवस्था मदु। थुकिं देय्या ई व स्रोतया हन्ताः जक याइगु निश्चित दु। मुख्य खँ, पार्टीतय्गु प्रवृत्तिइ सुधार वयेमाःगु दु ।

More Stories Like this