छखा हे छेँया प्यम्हेसिया हत्या

येँ (सन्ध्या टाइम्स)/पाल्पाया सदरमुकाम तानसेनं थ्यंमथ्यं २५ किलोमिटर तापाक्क च्वंगु ठिमुरे गाविसय् छगू हे परिवारया प्यम्ह मनूयात म्हमसिउपिं मनूतय्सं स्याना बिउगु दु। ठिमुरे गाविस वडा नं. १ बुढिचौरया छखा छेँया प्यम्हेसित स्याना बिउगु मंगलवाः हे खःसां प्रहरीं धाःसा अथे घटना जूगु वंगु चान्हय् जक सिउगु खः ।

जिल्ला प्रहरी ज्याकू पाल्पां बिउगु जनकारी कथं उगु छेँया मू मनू ५६ दँया यामकुमारी बगाले, २५ दँया म्ह्याय् तुलसा घर्ती, ८ दँया छय् सन्ध्या घर्ती व ६ दँया काय सन्दीप घर्तीयात स्याना बिउगु खः। तुलसा छुं दिं न्ह्यः जक थःछेँय् वःम्ह खः। छय् सन्ध्याया सीम्ह छेँया दकलय् च्वय् च्वंगु तल्लाय् लुया वःगु खःसा मेपिनिगु सीम्ह धाःसा छ्यलिइ वांछ्वयातःगु लुयावःगु खः। पिनें तालं ग्वयातःगु उगु छेँय् ताः चायेकाः दुने स्वःगु इलय् अथे प्यम्हेसितं स्यानातःगु अवस्थाय् लुइकूगु खः ।

छखा हे छेँया प्यम्हेसित छकलं ल्वाभलं पालाः स्यानातःगु उगु घटना सुनां छाय् यात धकाः सीके फुगु मदुनिसा प्रहरीं धाःसा वंगु चान्हय्निसें हे अनुसन्धान न्ह्याकूगु दु ।

चन्डोलय् खुकुरीं पालाः ल्वापु

येँ (सन्ध्या टाइम्स)/येँ महानगरपालिकाया वडा नं. ५ लागाय् थौं सुथय् ठेकदार व मजदूरतय् दथुइ खुकुरीं पालाः ल्वापु जूगु दु। स्थानीय मनूतय्सं उगु ल्वापुइ लानाः प्यम्ह मनूत घाःपाः जूगु दु धकाः धाःगु दुसा महाराजगंज प्रहरीं धाःसा ल्वापु सामान्य जक खः धकाः धाःगु दु। उगु ल्वापुइ लानाः घाःपाः जूपिं मदु धकाः प्रहरीं धाःगु दुसा स्थानीय मनूतय्सं धाःसा प्यम्ह मध्ये छम्ह तच्वकं घाःपाः जूगु नापं वासः यायेत अस्पतालय् यंकल धकाः तकं धाःगु दु ।

प्रहरीं मजदूर व ठेकेदारया दथुइ ल्वापु जूगु खः धकाः पुष्टी याःगु दुसा उगु ल्वापु नाप स्वापू दुपिं प्यम्ह न्याम्हेसित नियन्त्रणय् कयातयागु खँ नं धाःगु दु ।

दुर्घटनाय् लानाः प्यम्ह सित

येँ (सन्ध्या टाइम्स)/थौं सुथय् देय्या थीथी थासय् जूगु थीथी सवारी दुर्घटनाय् लानाः प्यम्ह मनू सीगु दु। ओखलढुंगाय् छगः ट्याक्टर दुर्घटना जुयाः निम्ह मनू सीगु दु। अथे हे सर्लाहीया लालबन्दीइ ट्रक दुर्घटना जुयाः छम्ह मनू सीगु दुसा बाँकेय् ट्याक्टरं कुतुंवना छम्ह मनू सीगु दु। ओखलढुंगाया दुर्घटनाय् लानाः सीपिनिगु नां सीके फुगु मदुनिसा सर्लाहीइ रामबहादुर विश्वकर्मा सीगु खःसा बाँकेया दुर्घटनाय् लानाः राजकुमार तिमिल्सिना सीगु खः ।