नर्सरी व्यवसाय

मधु श्रेष्ठ

नेपाः प्राकृतिक रुपं तसकं बांलाःगु देय् खः। तर थौंकन्हय् अप्वयाच्वंगु आवादी व अव्यस्थित शहरीकरणं यानाः थ्व थाय् न्हियान्हिथं प्रदुषित जुजुं वनाच्वंगु दु। थज्याःगु अव्यस्थाया दुने नं नर्सरी व्यवसाय छगू थज्याःगु व्यवसाय खः गुकिं थ्व लागायात प्रदुषित मखु अझ सुन्दर दयेकेगु ज्या याइ ।

मनूतय्सं थीथी कथं याना वयाच्वंगु व्यापार, व्यवसाय मध्ये भचा अलग्ग खने दुगु व्यवसाय नर्सरी व्यवसाय नं खः। थुकिं यानाः म्हो जक खाली दुगु जग्गाय् नापनापं कःसि, गमलाय् नं स्वांमा, सिमा पीगु बानी याकेत ग्वाहालि जुयाच्वंगु दु। अव्यवस्थित कथं छेँ दयेकाः उजाड जुया वनाच्वंगु झीगु थाय्यात भचा जकसां वाउँसे च्वंकेत थ्व व्यवसायं ग्वाहालि हे याइ ।

थौंकन्हय् नर्सरी व्यवसायं नं छगू बांलाःगु थाय् कायेधुंकूगु खनेदु। अले छुं हद तक मनूतय्त लजगाः नं चूलाकूगु दु। झिंनिदँ न्ह्यवंनिसें येँया पकनाजोलय् नर्सरी व्यवसाय याना वयाच्वंम्ह कुमारी नर्सरीया थुवाः इन्द्र महर्जनं थुकिया फाइदा बारे थुकथं कनादी, 'न्हापा ला थ्व नर्सरीपाखें यक्व हे फाइदा जू तर थौंकन्हय् उलि मदु ।'

अथे खःसां थःत धाःसा थ्वहे व्यवसायपाखें आनन्द व सन्तोष दुगु खँ वय्कलं धयादी। वय्कलं नर्सरीया निंतिं छ्यलादीगु जग्गा राणातय्गु खः। वय्कलं थुगु व्यवसायया निंतिं छथाय् च्वंगु जग्गायात झिंनिद्वः तका बाः पुलादीगु दुसा मेखे च्वंगु जग्गा धाःसा बाः पुलेम्वाः। च्याम्ह कर्मचारी तयाः नर्सरी न्ह्याका च्वनादीम्ह महर्जनं धयादी, 'थनं जूगु आम्दानी तलब बीत जक पाय्छि जू, नीन्यासःनिसें न्याद्वः तक काइपिं थन दु ।'

थुगु नर्सरीया पुसा अमेरिका, हल्याण्ड, जर्मनी, जापान आदि थासं हइगु जुयाच्वन। झितकांनिसें स्वद्वः तका तक तूगु स्वांमा दु। अप्वः यानाः मध्यम वर्गया मनूत व होटलय् छायेपीगु लिसें थीथी अफिसं न्याः वइगु जुयाच्वन। थन गमलाय् हे सयेके जिउगु सि (फलफूल)या मा नं दु। थःपिनि व्यापार बारे महर्जनं कनादी, 'प्यदँ न्यादँ न्ह्यः न्हिथं झिद्वः झिन्याद्वः व्यापार दइगु खःसां थौंकन्हय् प्यद्वः न्याद्वः ति जक दु ।'

उखे झीथाय् हे च्वंगु आपालं स्वां सिमात मदया वनाच्वंगु खँय् धाःसा किपुली च्वंगु बुढाथोकी नर्सरीया थुवाः कृष्णभक्त बुढाथोकीं चिउताः प्वंकादी। वय्कलं धयादी, 'थन च्वंपिं मनूतय्सं स्वां-सिया महत्व उलि मसिउनि। स्वनिगलय् वाउँगु धइगु हे स्वये मदयेधुंकल। थथे हे जुल धाःसा स्वनिगःया भविष्य बांलाः मजू। उकिं नं थौंकन्हय् नर्सरीया महत्व अप्वः दु ।'

त्रिविविया १३ रोपनी जग्गाय् स्वीद्वः तका बाः पुलाः व्यवसाय यानाच्वंम्ह भाजु बुढाथोकीं प्यद्वःनिसें न्याद्वः तक बियाः छुं मनूतय्त रोजगारी बियातःगु दु। थन नं भारतया कलकत्ता व कालिङ्गपोङ्गं पुसा हयेगु यानाच्वंगु दु ।

ब्यापारय् वय्कः सन्तुष्ट हे दु। धयादी, 'थौंकन्हय् न्हिं झिन्यासः निसें निद्वः तक आम्दानी जू। थ्व बाहेक मनूतय् छेँय्छेँय् वनाः क्यब दयेकेगु ज्यां भचा आम्दानी जुयाच्वंगु दु।'
थुगु नर्सरीइ नं मेमेगु नर्सरीइ थें झितकांनिसें स्वद्वः प्यद्वः तका वंगु स्वांमात दु। यदि नगरया वातावरण बांलाकेगु खःसा थाय्थासय् सिमा, स्वांमा पिना तयेमाः व थुकिया निंतिं सरकारं नं ग्वाहालि यायेमाः धइगु वय्कःया बिचाः दु।
अथे हे थ्व व्यवसायय् भचा बिस्कं पहः ज्वनाः चायेकातःगु नर्सरी खः चमेली नर्सरी। यलया पूच्वय् थुकिया पसः दुसां मू फार्म हाउस धाःसा नौबिसेय् खः। विशेष यानाः मिसापिंत लजगाः बीगु आज्जुं थुगु नर्सरी चायेकागु दावी यानादी सञ्चालिका मय्जु लक्ष्मी प्रधानं। छुं पासापिं जानाः चायेकूगु थ्व नर्सरीया आज्जु तनावनेधुंकूगु मा मालाः हानं उत्पादन यायेगु खः। थुकिया मेम्ह थुवाः शिशिर रञ्जितकारं धयादी, 'थुलि हे व्यापार जुइ धइगु मदु। इहिपाया सिजनय् नीद्वः तका व्यापार जूसा मेबलय् अथेहे प्यद्वः न्याद्वः तकाया ब्यापार जू।' यदि सरकारं ग्वाहालि यात धाःसा देसं पिने नं नेपाःया स्वांमात छ्वये फइगु वय्कःया विश्वास दु ।

थौंकन्हय् ल्याय्म्ह ल्यासेतय् दथुइ प्रचलित भ्यालेन्टाइन डे व फ्रेण्डशीप डे नं नर्सरी व्यवसायया लागिं बांलाःगु अवसर खः। लिसें इहिपा, बुदिं, उसाँय् मदइबलय् स्वः वनेबलय् स्वां ज्वनाः वनेगु चलनं नं थ्व व्यवसाययात लबः हे बियाच्वंगु दु।
थौंकन्हय् मनूतय्सं दुसा खाली जग्गा, मदुसा कःसि, गमलाय् नं स्वांमा, तरकारी आदि पीगु याना हयाच्वंगु दु। मनूतय्के थज्याःगु बानीया विकास जूसा नर्सरी व्यवसायं नं लबः काये फइ ।

More Stories Like this