४८ घण्टे नागरिक सत्याग्रह

येँ (सन्ध्या टाइम्स)/नेपाःया अन्तरिम संविधानय् उल्लेख जुयाच्वं कथं वइगु जेष्ठ १४ गते हे संघीय गणतन्त्र नेपाःया न्हूगु संविधान जारी यायेमाः धइगु माग यासें लोकतन्त्र व शान्तिया नितिं नागरिक आन्दोलनपाखें संविधानसभाय् दुथ्याःगु राजनीतिक दल व संविधानसभाया सभासदतय्त दबाव बीगु निंतिं न्हूगु चरणया आन्दोलन घोषणा याःगु दु।
२०६१/०६२ या जनआन्दोलनय् महत्वपूर्णगु भूमिका म्हितूगु उगु आन्दोलनपाखें जनआन्दोलनया भावना कथं इलय् हे न्हूगु संविधान घोषणा यायेमाःगु माग यासें छुं न्हि न्ह्यः तिनि संविधानसभा भवन पिने २४ घण्टे धर्ना बिउगु खः।
डा. देवेन्द्रराज पाण्डेया नेतृत्वय् दुगु लोकतन्त्र व शान्तिया नितिं नागरिक आन्दोलनं थौं येँय् छगू पत्रकार सम्मेलनया यासें संविधान जारी जुइगु न्हि जेठ १४ गते तक राजधानी केन्द्रित खबरदारी नागरिक र्‍याली, खबरदारी नागरिक सभानिसें नागरिक खबरदारी सत्याग्रह थेंज्याःगु दबावमुलक ज्याझ्वः यायेगु घोषणा याःगु खः ।

थौं सार्वजनिक याःगु आन्दोलनया ज्याझ्वः कथं फागुन ४ गते स्वनिगःया कलंकी, चाबही, कोटेश्वर नापं थीथी न्यागू थासं छगू हे इलय् नागरिक जागरण अभियान र्‍याली पिकायेगु, फागुन १५ गते सुथय् ८ बजेनिसें संविधानसभा भवनया ३ नं. गेटय् मदिक्क निन्हु निचा अर्थात ४८ घण्टाया नागरिक खबरदारी सत्याग्रह यायेगु अले फागुन २५ गते न्हिनय् २ बजे संविधानसभा न्ह्यःने विशाल नागरिक खबरदारी सभा यायेगु ग्वसाः दयेकातःगु दु ।

दलतय्सं थुगु चरणया दवावयात नं वेवास्ता यानाः क्वःछिनातःगु इलय् हे न्हूगु संविधान घोषणा यायेगुपाखे मवन धाःसा फागुन महिना लिपा अझ सशक्त कथं प्रभावकारी जुइक दवाव ज्याझ्वः यायेगु धाःगु दु।
लिसें संविधानय् अधिकारसम्पन्न यायेमाःपिं जनजाति, मिसा व दलित पुचःलिसे अलग अलग हे च्वनाः अन्तर्क्रिया यायेगु ज्याझ्वः नं दयेकातःगु खँ आन्दोलन सूत्रं 'सन्ध्या टाइम्स'यात धाःगु दु ।