सागय् नेपाःया कासामितय् सफलता

बंगलादेशया राजधानी ढाकाय् न्ह्यानाच्वंगु सार्क कासा महोत्सवय् नेपाःया कासामितय्सं अन्तिम इलय् वयाः निराश नेपाःमितय् ख्वालय् मुस्कान हया बिउगु दु। न्हापांनिसें नेपाली कासामितय्सं थःपिनि कब्जाय् कयातःगु उसु, तेक्वान्दो, कराते थेंज्याःगु कासाय् थुगुसी नं स्वर्ण पदक त्याकाः थ्व क्षेत्रय् थुपिं कासाया उत्कृष्ट कासामि थःपिं हे खः धकाः हानं छक्वः पुष्टि याःगु दु। थुकिया निंतिं स्वर्ण त्याकूपिं सकलें कासामितय्त बधाई बी हे माः। ढाका वंपिं नेपाली खेल पदाधिकारीतय्सं बेइज्जतीपूर्ण क्रियाकलाप याःगु खःसां मेहनती व लगनशील नेपाःमि कासामितय्सं धाःसा नेपाःया नां तयेत सफलता चूलाकूगु दु। उकीसनं तेक्वान्दोया कुशल कासामि दिपक बिष्टं थुगुसी नं पदक त्याकाः नेपाः जक मुक्कं सार्क लागाय् हे लगातार प्यक्वः तक स्वर्ण त्याकेगु कीर्तिमान नं कायम याःगु दु। थ्व कीर्तिमान न्हापा बैकुण्ठ मानन्धरं तयातःगु खःसा आः उकियात तोडे यानाः दिपक बिष्टं तःगु दु। पुलांम्ह कासामिया रेकर्ड न्हूपिं कासामिं तोडे यायेगु धइगुया अर्थ देय्या कासाख्यलं प्रगति यानाच्वंगु व कासामित अझ दक्ष जुजुं वःगुया संकेत खः ।

नेपालय् तःदँ तक न्ह्याःगु द्वन्द्वं झीगु कासाख्यः नं प्रभावित जुल। तर चाहे जुल धाःसा अज्याःगु द्वन्द्वया इलय् नं कासा ख्यलं थःगु हे कथंया विकास यानाच्वने जिउ धइगु खँ थुगुसी तिनि सागय् ब्वति काः वःगु देय् अफगानिस्तानं क्यना बिउगु दु। खतुं छुं छुं कासाया नेपाली कासामितय्सं नं थ्व खँ पुष्टि मयाःगु मखु। यदि नेपाःया कासाख्यः राजनीतिं पीडित मखुगु जूसा कासामितय्सं अझ प्रगति यायेफु धइगु खँ थुकिं क्यना बिउ ।

More Stories Like this