च्वसु ब्वनाः झन् हे दिक्क !

रामशेखर

प्रतिक्रिया

माघ १४ गते विहिवाःया 'सन्ध्या टाइम्स'य् 'सिरपाः काकां हे दिक्क' शीर्षकया च्वसु ब्वना। उकी दुगु छुं छुं आपत्तिजनक अभिव्यक्तिं जिगु व्यक्तिगत चरित्रयात हाथ्या बिउगु दुःख छिनाप नं ब्याकाच्वना ।

वंगु पौष ३० गते जितः पेज ३ लाइफटाइम आचिभमेण्ट अवार्डं सम्मान बिउगु खः। वयां न्ह्यः पौष २६ गते ख्वपय् नवदुर्गा हलय् 'याकः म्ह्याय्' संकिपाया च्यारिटी शोलय् ईन्द्रायणी फिल्मस् प्रोडक्सनं व पौष २८ गते येँय् नेवाः जागरण संकिपाकःमि मञ्चं जितः नं हनेज्या याःगु खः।
लाइफटाइम अवार्ड फयाः कंस कुन्हु सप्तरत्न धइम्ह पासां धाल - शेखरदाइयात अवार्ड बिउगु बुखँ ब्वनाः लय्ताल। जिमि म्ह्याय् संगीतां नं थुगुसी ८६ प्रतिशत ल्याः हयाः सर्वोत्कृष्ट एसएलसी पास याःगु। सम्मान समारोह यानाः वइत नं जिल्ला विकास समितिं पीच्याद्वः तका, अमेरिकाय् च्वंपिं नेपाःमिपाखें स्वीद्वः तका, निर्माण व्यवसायी संघं न्याद्वः तका, बागीश्वरी स्कूलं स्वर्ण पदक बिल। छितः बिउगु अवार्ड ला झन तःधंगु अवार्ड, अले ध्यबा नं यक्व हे वल जुइ नि।' जिं धया - 'जितः बिउगु अवार्ड ध्यबा दुगु अवार्ड मखु गुर्जु। व अवार्ड जिं मनोरञ्जन ख्यलय् जीवंकाःछि ज्या यात धकाः सम्मानया अवार्ड बिउगु खः ।'

माघ ३ गतेपाखे जि 'सन्ध्या टाइम्स'या ज्याकुथि वया। तँसापौया संयाजक रमेशकाजीनाप अवार्ड सम्मानया खँय् अनौपचारिक खँल्हाबल्हा जुयाच्वंथाय् पत्रकार कृष्ण प्रजापति नं फ्यतू वल। खँल्हाबल्हाया झ्वलय् रमेशकाजीं धयादिल - 'छगू तःजिगु सिरपा कायेत ताःलाःम्ह व्यक्तियात वहे ज्वःगु वा व स्वयां नं तःजिगु सिरपा, सम्मान बीगु ज्या जुइमाःथाय् चीधंगु सम्मान नं बियाच्वन, सम्मानित व्यक्तिं व सम्मान फया नं च्वन। थ्व पाय्छि खःला?' व धाये थ्व धाये मदयाः जिं प्याच्च धया - 'सम्मान फयाः हंकाच्वनेगु नं मछिंक कातुमतु काः खनिं ।'

कृष्णं प्वाक्क न्यन - 'अथे छाय् थें ?'
जिं धया - 'पत्राचार यानाः पूर्व स्वीकृति हे मकासे बिना जानकारीं जितः नं हनीगु बुखँ पिथना हइगु। अले छन्हु न्ह्यः म्हमसिउपिं पासापिंसं फोनं धया हइगु - 'थुगु संस्थां छन्त नं हनीगु खँ सिल हे जुइ। थ्व खुन्हु, थन, पाय्छि थ्व इलय् थ्यंकः वयेमाल न्है।' अथेहे हनीगु छन्हु निन्हु न्ह्यः म्हमसिउपिं पासापिं अप्रत्यासित कथं जिथाय् वयाः 'फलाना थासय् थ्वखुन्हु छन्त नं हनेगु ज्याझ्वः तयागु दु' धकाः धाः वइगु। जितः छु याये छु याये जुइगु। पासापिनिगु ख्वालं हनीगु संस्थाया इज्जत सम्मान तयेत नं हंकः वनाच्वने हे माल ।'

रमेशकाजीं धयादिल - 'आः अथे हंकः वने मजिल का।'
जिं धया - 'आ... मजिल थें हे च्वना नं वल। मेपिंसं स्वये सम्मान, अवार्डय् मेगु छुं गुलि नं दइ धइथें च्वं। तर अमिगु सोचाइ कथं दुगु ला मखु ।'

कृष्णं कापीइ च्वयेगु यात। रमेशकाजीं धयादिल - 'अय् कृष्ण, आम छं छु यानागु? अन्तर्वार्ता खःसा अन्तर्वार्ता हे धायेमाः।' अन्तर्वार्ता मखु धाधां कृष्ण दना हे वन ।

तर कृष्णं अन्तर्वार्ताया कथं हे थथे नं च्वया बिल - 'लाइफटाइम अवार्ड कयाहःगु इलय् नं कान्छीम्ह म्ह्याचं अबुं छु ज्वनावल थें धकाः उत्सुक जुयाः स्वःवःगु खः। तर समारोहस बियाहल, अवार्डया नामय् वहे छकूचा भ्वं जक खः। छेँजः व मेमेपिनि छुं छुं ज्वनाः वइथें धइगु आशा। पिने नं लाइफटाइम अवार्डय् छुं तःधंगु हे दइला धइगु अनुमान तर दुगु ला वहे हनापौ हे जक मखा। थज्याःगु हे मछिं मचाःगुया हुनिं हे वयकःयात अवार्ड व सिरपाः धाल कि हे वितृष्णा। थःत आःतक प्राप्त जूगु सम्मान व सिरपाः वास्तवय् आवश्यकता स्वयां नं अप्वः जूगु वय्कःया बिचाः दु ।'

च्वय्या खँपुं थ्वहे भ्रामक सन्देश बीत स्वःगु खनेदत कि लाइफटाइम अवार्ड धइगु वास्तवय् छकूचा भ्वं जक खः। अवार्डय् रामशेखर व वया छेँजःपिंसं आर्थिक अनुदानया नं लोभ लालच याःगु खः। तर अनुदान फसय् ब्वःगुलिं रामशेखरयात आः अवार्ड व सिरपाः धालकि हे वितृष्णा।
सम्पादकजु, इण्डियन टिभि च्यानलय् नं फिल्म फेयर अवार्ड व अज्याःगु हे फिल्म सम्बन्धि मेमेगु अवार्ड समारोहया प्रत्यक्ष प्रशारण झीसं नं स्वया वयाच्वना। अन नं बीमाःपिंत लाइफटाइम अवार्ड बिउगु खना। तर अवार्ड धकाः बीगु इलय् छपा ल्हातिं म्हूचिनाः ज्वने जिउगु प्रतीक चिं मूर्ति छगू हे जक बीगु खना। उकी ध्यबा नं बिउगु झीसं गबलें मखना धाःसा रामशेखरं पेज थ्री लाइफटाइम अवार्डय् ध्यबा नं दइ धइगु लोभ लालच याये छिं ला, फइ ला`?

खः जितः मछिं, मचाः खः। जीवनय् मछिं, मचाः ला दया हे च्वनी धाःसा रामशेखरयात अवार्ड सिरपाः धालकि वितृष्णा छु वहे अवार्डय् ध्यबा नं मदइगुलिं हे खइला ले ?

जिं स्वये अवार्ड, सम्मान, सिरपाः थुलि जक आवश्यक, थुलि अप्वः अनावश्यक धइगु लिमिटेशन नं दइथें मच्वं। मन्त, मगात, माल, हजि धाःसां नं सुनां बीगु नं मखु। व्यक्तिं याःगु योगदानया लिधंसाय् जक बीगु मूल्य, मान्यताजन्य वस्तु खः व ला ! जितः नं न्यागू दशकं मयाक भाषा, साहित्य, कला, संस्कृति व संकिपाः आदि मनोरञ्जन ख्यलय् यानागु ज्याया मूल्याङ्कन कथं लाइफटाइम अवार्ड बिल। व अवार्ड कृष्ण प्रजापतिं खं थें छकूचा भ्वं जकया अवार्ड निश्चित रुपं मखु। भव्य समारोहस दोसल्लां न्ययेकाः वःपुमछिं खादागा क्वखायेकाः जितः बिउगु अवार्ड खः। काष्ठ कलाया फ्रेम दुने, मेटल प्लेटय् गुकी जिं जीवंकाःछि पानागुया मूल्याङ्कन उल्लेख दु। अपाय्जिगु महत्वपूर्ण गरिमामय अवार्ड छकूचा भ्वं जक खंकेगु धृष्टता छाय् यायेमाल थें कृष्णं?
कृष्णं थथे नं च्वइबिल - 'सिरपाः व सम्मान बीगु मयः धयां हाकनं थ्वहे सिरपाः व सम्मान लाःगु लसताय् धकाः ख्वपया मेमेगु संघ संस्थातय्सं सगं बियाः थप हनेज्या यानाच्वंगु दु। उकिं झन हे दिक्क ।'

न्हिले ला ख्वये ला ! झन हे दिक्क ला कृष्णया थजाः थजाःगु हे असत्य, भ्रामक, ताक्सिं, कपोलकल्पित च्वसु ब्वनेमालाः जुल। सिरपाः, सम्मान लाःगु लसताय् धकाः ख्वपया छु संघ संस्थां सगं बियाः हनेज्या यात जितः? कृष्णं छगू जक दसु बिउसां गाः सम्पादकजु ।

More Stories Like this