उपराष्ट्रपति झायात छाय् बधाई मबीगु ?

यजुसा, येँ

उपराष्ट्रपति परमानन्द झां हिन्दी भाषां सपथ ग्रहण यायेधुंकाः छथ्वः नेपालीतय्गु मानसपटलय् भुखाय् ब्वःगु सकसिनं सिउ। अज्याःपिंसं खय् भासं सपथ ग्रहण यायेमाः धकाः हाला जुल। आखिरय् अदालतं नं उपराष्ट्रपति परमानन्द झा नं खय् भासं हे सपथ ग्रहण यायेमाः धकाः फैसला बिल। अदालतया फैसलायात माने मयासे उपराष्ट्रपति परमानन्द झा बरु क्रियाशील मजुसे सुम्क च्वनादिल, तर थम्हं हिन्दी भाषां याःगु सपथ ग्रहणयात हिलाः खय् भासं सपथ ग्रहण मयात। आः वयाः खय् भासं सपथ ग्रहण मयाःसां थःगु मांभासं नं सपथ ग्रहण याये फइगु प्रावधान तयाः संविधान संशोधन याना बिउगु दु। संभवतः थ्व च्वसु पिहां वइबलय् वय्कलं खय् भाय् बाहेक नेपाःयागु मेगु न्ह्यागुसां राष्ट्रभाषां सपथ ग्रहण यायेधुंकी। (जुइफु आः वय्कलं वय्कःया मांभाय् मैथिली भाषां सपथ ग्रहण याइ धयागु खँ वयाच्वंगु दु।)

थ्व बुखँ पिहां वःबलय् जितः छगू खँ मतिइ लुल। हिन्दी भाषां सपथ ग्रहण याःगु मुद्दाय् सु त्यात, सु बुत?
म्हिगः तक खय् भाय् बाहेक मेगु भाषां सपथ ग्रहण याये मजिउ धयाजूपिंत संविधान संशोधनं इमित म्वाय् चुइका बिउगु दु। थ्व कारणं नेपालय् खय् भासं जक सपथ ग्रहण यायेमाः धकाः तर्क याना जूपिंत ला छकू नयां क्वँय् (हलुवाय् वालुवा) धाः थें जूगु दु। थथे हे थःगु मांभाय् दयेकं हिन्दी भाषाया मोह घाना जूपिं परमानन्द झा लगायत मेपिं मधेशीवादी नेतातय्गु हालत नं इमिगु थें जूगु दु। संसदय् हिन्दी न्ववाना जूसां इमिगु हिन्दी भाषाया सपथयात संसदं स्वीकार मयात ।

थुकथं स्वयेबलय् खय् भासं जक सपथ ग्रहण यायेमाः धाःपिं व हिन्दीं शपथ ग्रहण यायेमाः धाइपिं मधेशीवादीत नं बूगु दु।
तर थनथाय् वयाः नेपालय् थीथी राष्ट्रभाषाया सः तया वयाच्वंपिं जातित धाःसा बांलाक हे त्याःगु दु। थ्व घटनां नेपालय् न्ह्यागु क्षेत्रय् नं खय् भाय् जक छ्यलेमाः धकाः मेगु भाय्या जातितय्त दमन, शोषण याना वयाच्वंपिं मनूत धाःसा बांलाक हे घाइते जूगु दयेमाः। इमिगु मू मूगु धँवा मध्ये छपु मू धँवा थ्व घटनां त्वःथुला बिउगु दु ।

राष्ट्रपति, उपराष्ट्रपति, प्रधानमन्त्री लगायत मेपिंसं नं थःगु मांभासं सपथ ग्रहण याये दुगु धयागु जातीय सः तयावयाच्वंपिं न्हिया न्हिथं त्याना वयाच्वंगु व म्हिगःया खय् साम्प्रदायिकवादीतय्सं त्याके मफया वनाच्वंगु चिं खः। (थनथाय् थ्व नं लुमंकेमाः कि आः अज्याःपिं खय् साम्प्रदायिकत न्हिया न्हिथं पराजय जुया वंगुलिं आः जातीय संघीयताया विरोध यायेगु ज्या नं तीव्र नक्सां याना हःगु दु।)

यदि परमानन्द झा नं अडान मकाःगु जूसा खय् साम्प्रदायिकतय्सं अझ नं मेगु राष्ट्रभाषीतय्त दमन यायेत छ्यं ल्ह्वनीगु खँय् शंका मदु। थ्व संघर्षया लागि उपराष्ट्रपति परमानन्द झायात बधाई गथे मबीगु ?

More Stories Like this